భావ తరంగాల 'నేటి నిజం'

#NetiNijam, #నేటినిజం, #KandarpaMurthy, #కందర్పమూర్తి, #TeluguKavithalu, #Kavitha, #Kavithalu, #TeluguPoems

Bhava Tharangala Neti Nijam - New Telugu Poem Written By Kandarpa Murthy

Published In manatelugukathalu.com On 09/07/2025

భావ తరంగాల 'నేటి నిజం'  - తెలుగు కవిత

రచన: కందర్ప మూర్తి

మదిలో మెదిలే భావాలను

కలంతో కాగితం మీద రాయాలను కుంటాను

ఏమని రాయను ఏదని రాయను

భ్రష్టు పట్టిన దేశ రాజకీయాల గురించా,

సభ్యత మరిచి వేదికల మీద అసంబద్ధ

వాక్బాణాలతో నాయకుల ప్రసంగాల గురించా,

ప్రజలకు దశ దిశ నిర్దేశం చేసే రాజకీయ

నాయకుల వినలేని బూతు పదాలు, మాటల తీరు

అసలైన సినీ హీరోలను మించిన విన్యాసాలు

టీవీలలో చూస్తూ వింటూ నవ్వుకుంటున్న ప్రజలు

పార్టీలో కలసి ఉంటె అలాయ్ బలాయ్

లేదంటే సిగపట్ల బూతు పురాణం

ఏ నాయకుడు ఏపార్టీలో ఎన్నాళ్ళు ఉంటాడో

అక్కడా ఇమడలేక మరో పార్టీ కండువా

కప్పుకునే జంప్ జిలానీల కప్పగెంతుల గురించా,

భర్త ఒకపార్టీ, భార్య ఇంకో పార్టీ, కొడుకు వేరే పార్టీ

 సిగపట్ల రాజకీయ కుటుంబ కోట్లాటలా

ఏమని రాసేది, ఏదని చెప్పేది.

పాదయాత్రలు బస్సు యాత్రలంటు

ఢిల్లీ నుంచి గల్లీల వరకు నాయకుల 

ఊకదంపుడు ఉపన్యాసాల గోల

ఎన్నికల వేళ మేనిఫెస్టోల విడుదల

వాగ్దానాలతో అరచేతిలో వైకుంఠం చూపి

నోట్లతో ఓట్లు కొని అవినీతి రాజకీయాలు

జరిపే నాయకుల నిర్వాకం గురించా

ఏదని రాయను, ఏమని రాయను

దివాలా తీసిన ఆర్థిక స్థితిగతుల విషయమా

బ్యాంకులను కొల్లగొట్టి వేల కోట్ల రూపాయలతో

విదేశాలకు పారిపోయిన మిలియనీర్ల నిర్వాకమా

చెమటోడ్చి పండించిన పంటకు గిట్టుపాటు ధరలేక

రోడ్డెక్కిన రైతు సోదరుల కోపాగ్ని జ్వాలల విషయమా

బ్యాంకుల రుణాలు అందక దళారుల చేత చిక్కి

బక్కచిక్కి దిక్కు తోచక ఆత్మ హత్యలకు పాల్పడుతున్న 

అన్నదాతల విషాధ గాధలా

ఏమని రాసేది దేని గురించి వివరించేది

డిగ్రీ పట్టాలతో ఉద్యోగాల వేటలో కార్యాలయాల చుట్టూ తిరిగే

నేటి నిరుద్యోగ యువత వేదన గురించా

అంతర్జాల ప్రపంచంలో అసభ్య అశ్లీల చిత్రాలు, స్మార్టుఫోన్లతో సెల్ఫీలు

క్లబ్బులు పబ్బుల్లో మద్యం మత్తులో గమ్మత్తుగా చిత్తవుతున్న

నేటి యువతరం నాగరిక సొగసుల విషయమా

 ఏమని రాయను ఎలా రాయను

పెళ్లయినా పర్వదినమైనా వీడియో వాట్సప్ ఫేస్ బుక్ లతో సరిపెడుతూ

ఆప్యాయ పలకరింపులకు దూరమవుతున్న నేటి కుటుంబ వ్యవస్థ విషయమా

తల్లి తండ్రులు డబ్బు వెదజల్లి తమ పిల్లల చదువులు కొంటూ

మాతృభాషను మరుగున పెట్టి పరాయి భాషను నెత్తిన పెట్టుకొంటున్న

నేటి కార్పొరేట్ విద్యా సంస్కృతి విషయమా

ధనార్జన కోసం జన్మ భూమిని వదిలి వృద్ధ తల్లి తండ్రుల్ని

ఆశ్రమాల కప్పగించి విదేశాల కేగుతున్న సుపుత్రుల గురించా

తాగిన మత్తులో వావి వరుసలు మరిచి చెల్లినీ కూతుర్నీ చెరిచే కామాంధుల విషయమా

పరాయి మగని వ్యామోహంలో కట్టుకున్న భర్త, కన్నపిల్లల్నీ కడతేర్చే

అపర పతివ్రతల కథలా

వయసుతో సంబంధం లేకుండా పసిమొగ్గలను

అమాయక అబలలను ముదిమి వయసు మహిళలను

నిర్భయంగా మానభంగం చేసి కబళిస్తున్న మృగాళ్ల గురించా

నింగిలో చంద్రయాన్ విజయం, విక్రమ్ లేండర్

చంద్ర మండలం మీద కాలు మోపిన వేళ 

ఇస్రో శాస్త్రవేత్తల ఘనత గురించా

మత విద్వేషాల మారణ హోమంలో అమాయక జనం బలి

అణ్వాయుధాల మదంతో ఒకరి నొకరు శాసించుకునే

ప్రపంచ దేశాల అధినాయకుల అహంభావమా

 ఏమని రాయను ఏదని రాయను

ఉద్వేగంతో రాయనా లేక వేదనతో రాయనా!

 *** *** ***

కందర్ప మూర్తి

https://www.manatelugukathalu.com/profile/kandarpamurthy