వంకాయ కూర ఖరీదు యాభై వేలు
Vankaya Kura Kharidu Yabhai Velu - Telugu Family Comedy Story | Mohana Krishna Tata
వంకాయ కూర ఖరీదు యాభై వేలు - తెలుగు కుటుంబ హాస్య కథ | తాత మోహనకృష్ణ
Published in manatelugukathalu.com on 29/07/2023
Republished in manatelugukathalu.com on 05/11/2026
కథా పఠనం: మల్లవరపు సీతారాం కుమార్
వంకాయ కూర ఖరీదు యాభై వేలు రచయిత తాత మోహనకృష్ణ రాసిన వినోదభరితమైన తెలుగు హాస్యకథ. భర్త కళ్యాణ్ పుట్టినరోజుకు గుత్తి వంకాయ కూర చేయాలని సూపర్ మార్కెట్‌కు వెళ్లిన కాంతం, అనుకోకుండా స్నేహితులతో షాపింగ్‌లో మునిగిపోతుంది. చేతిలో కొత్త క్రెడిట్ కార్డు ఉండటంతో రెస్టారెంట్ బిల్లు, చీరలు, నగలు, డిస్కౌంట్ కొనుగోళ్లు కలిసి ₹50,000 ఖర్చవుతాయి. భార్యాభర్తల సరదా సంభాషణలతో పాటు అనవసరపు ఖర్చులపై ఆలోచింపజేసే ఈ కథను మనతెలుగుకథలు.కామ్‌లో చదవండి.
కాంతం వీధి గుమ్మం దగ్గర నిల్చొని, ఎవరి కోసమో చూస్తోంది.
"కాంతం! ఎవరైనా వస్తున్నారా మన ఇంటికి?" అడిగాడు భర్త పేపర్ చదువుతూ.
"లేదండీ! మెసేజ్ వచ్చిందండీ ఉదయం, క్రెడిట్ కార్డు వస్తుందని!"
"క్రెడిట్ కార్డు అంటే అప్పు—తెలుసా? మీ పుట్టింటివారు పంపించే కట్నం కాదు."
"తెలుసులెండి! మీకు ప్రతిదీ వెటకారమే!"
"వచ్చిందండీ.. కొరియర్.."
కాంతం ముఖం వంద వాట్స్ బల్బులా వెలిగిపోయింది. క్రెడిట్ కార్డు తీసుకొని దాచేసుకుంది కాంతం.
"ఏవండీ! రేపు మీ పుట్టినరోజు కదండీ! మీకు ఇష్టమైన గుత్తి వంకాయ కూర చేయనా?"
అప్పుడే నోట్లో నీళ్ళు ఊరుతున్నాయి భర్త కళ్యాణ్‌కు. "అలాగే చెయ్యవే! గుత్తి వంకాయలో ఉల్లిపాయలు సన్నగా తరిగి, కొత్తిమీర, కారం దట్టించి చెయ్యవే కాంతం. నా బర్త్‌డే స్పెషల్‌గా ఉంటుంది."
మర్నాడు ఉదయం..
"ఏవండీ! నన్ను సూపర్ మార్కెట్‌లో డ్రాప్ చేయండి. మీ ఆఫీస్‌కు వెళ్ళే దారిలోనే కదా."
"ఏం కొంటావ్ ఏమిటి?"
"మంచి తాజా వంకాయలండి."
కాంతం సూపర్ మార్కెట్‌లోకి వెళ్ళింది. కళ్యాణ్ డ్రాప్ చేసిన తర్వాత ఆఫీస్‌కు వెళ్ళాడు.
వంకాయలు ఎంచుతోంది కాంతం. ఈలోపు వెనుకనుంచి..
"కాంతం! ఎలా ఉన్నావ్?"
"సంగీతా! ఎలా ఉన్నావే?"
"బానే ఉన్నానే కాంతం."
"నీ షాపింగ్ అయ్యాక, మనం ఎదురుగా ఉన్న రెస్టారెంట్‌కు వెళదాం."
"అలాగే," అంది కాంతం.
కాంతం వంకాయలు తీసుకుంది. తన ఫ్రెండ్ వెంటనే పిలిచింది. ఇద్దరూ రెస్టారెంట్‌కు వెళ్లారు. ఫ్రెండ్‌తో కాసేపు ముచ్చట్లు పెట్టింది కాంతం. సంగీత మెనూ కార్డ్ తీసుకొని, చకచకా పది ఐటమ్స్ ఆర్డర్ చేసింది.
"బ్రేక్‌ఫాస్ట్ చేయలేదే కాంతం! బాగా ఆకలి వేస్తోంది. నువ్వూ.. ఏమైనా తీస్కో."
"నాకు ఒక కాఫీ చాలు."
"కాంతం! నీ కొత్త సంసారం ఎలాగుందే? మీ ఆయన బాగా చూసుకుంటున్నాడా?"
"మా ఆయనకేమీ.. బంగారం! బాగా చూసుకుంటున్నాడు. ఏమీ అడగరు పాపం. వారానికి రెండు సార్లు వంకాయ కూర, అప్పుడప్పుడు పూరీ చేస్తే ఆయన హ్యాపీ. రాత్రి కాళ్లు పట్టి, సుఖపెడితే చాలు."
"సంతోషమే కాంతం!"
ఈలోపు వెయిటర్ బిల్ తీసుకొచ్చాడు. కాంతం బిల్ చూసింది; 4000/- అయ్యింది.
"నేను అంత డబ్బులు తేలేదే! నువ్వు ఏమైనా తెచ్చావా?" అంది సంగీత.
కాంతం బ్యాగ్ చూస్తున్నప్పుడు కార్డు కింద పడింది.
"నీకు క్రెడిట్ కార్డు ఉంది కదా! బిల్ పే చెయ్యవే," అంది సంగీత.
తప్పక కాంతం కార్డు ఇచ్చింది. కార్డు బోణీ కొట్టింది.
"నేను ఇక వెళ్తానే సంగీత, లేట్ అయ్యింది."
ఇద్దరూ బయటకు వస్తుంటే, మరో ఫ్రెండ్ జ్యోతి ఎదురుపడింది.
ఇద్దరు ఫ్రెండ్స్‌నూ చూసి జ్యోతి.. "ఇక్కడే ఉన్నారా? నా పెళ్ళి కుదిరిందే, షాపింగ్‌కి వెళ్ళాలి. కాంతం! నువ్వు చీరలు బాగా కడతావు కదా.. నీ శారీస్ బాగుంటాయి.. రావే నాతో.. సంగీత! నువ్వూ రావే సరదాగా.. "
"కంగ్రాట్స్ జ్యోతి!" అన్నారు ఇద్దరు.
తప్పక వెళ్ళింది కాంతం షాపింగ్‌కి.. అతి పెద్ద షాపింగ్ మాల్‌కి వెళ్లారు.
"ఫస్ట్ చీరలు చూద్దాము ఫ్రెండ్స్!" అంది జ్యోతి.
జ్యోతి ఒక 300 చీరలు చూసింది. చీరలు చూపించే అతను అలసిపోయి ఇప్పటికే లీటర్ జ్యూస్ తెప్పించుకొని తాగాల్సి వచ్చింది.
"మాకూ జ్యూస్ తెప్పించు బాబు! మా జ్యోతి బాగా అలసిపోయింది!"
చివరకు రెండు చీరలు తీసుకుంది జ్యోతి. "ఏమిటో కాంతం! కలర్ బాగుంటే, డిజైన్ బాగోదు. రెండూ బాగుంటే, బోర్డర్ బాగుండదు!"
"హమ్మయ్యా..!!!" అని ఊపిరి పీల్చుకున్నాడు షాపువాడు. "ఇలాంటి కస్టమర్స్ రోజుకు నలుగురు వస్తే, నేను హాస్పిటల్‌లో జాయిన్ అవ్వాల్సిందే!"
"కాంతం! నువ్వు కూడా తీసుకోవే రెండు చీరలు."
"ఇప్పుడెందుకే జ్యోతి.. తీసుకోవచ్చనుకో.. కానీ.."
"తీసుకోవే.. ఈ రెండు చీరలు నీకు బాగుంటాయి.. నచ్చాయా?"
"బాగున్నాయి!" మొహమాటం కొద్దీ తీసుకుంది నచ్చిన 2 చీరలు.
"నీ బిల్ నువ్వే పే చేసుకోవాలే మరి. నాకు అంత బడ్జెట్ లేదు!" అంది జ్యోతి.
కార్డు మళ్ళీ స్వైప్ చేసింది కాంతం..
"ఇప్పుడు నగలు సెక్షన్‌కు పదండి ఫ్రెండ్స్!"
నగలవాడు ఆల్రెడీ జ్యూస్ తాగి రెడీగా ఉన్నాడు. డిజైనర్ నగలన్నీ ఒక్కొక్కటిగా తీయించి, ట్రై చేస్తోంది జ్యోతి.
"అది బాగుంది.. చూపించండి.. ఇది ఇంకా బాగుంది..
ఈ డిజైన్ ఎలా ఉందే కాంతం?..
ఆ నెక్లెస్ చూపించండి.. ఆ పైన నెక్లెస్ చూపించండి.. అన్నిటికన్నా పైన ఉన్న ఆ హారం కూడా చూపించండి.."
తెగ హడావిడి చేసింది జ్యోతి.
ఒక నెక్లెస్ మాత్రం కాంతానికి బాగా నచ్చేసింది..
"తీసుకోవే అయితే," అంది జ్యోతి.
కాంతం బ్యాగ్‌లో క్రెడిట్ కార్డు.. "నేను ఉన్నాను కదా! గో ఎహెడ్" అంటోంది..
కార్డు స్వైప్ చేసిన మెసేజ్ 30,000 వచ్చింది.
ముగ్గురూ కలిసి షాపింగ్ బ్యాగ్స్‌తో బయటకు వచ్చారు..
కాంతం ఇంటికి బయల్దేరింది..
అయ్యో! వంకాయ కూరకు కావాల్సిన పోపు సామాన్లు నిండుకున్నాయి.. మర్చిపోయానని మళ్ళీ సూపర్ మార్కెట్‌కు వెళ్ళింది కాంతం.
పోపు సామాన్ల ప్యాకెట్లు ట్రాలీలో వేసింది.. ఈలోపు పక్కన డిస్కౌంట్స్ బోర్డు చూసింది..
50 శాతం డిస్కౌంట్ సేల్..
ఇంట్లో ఉన్నవి, లేనివి, అవసరం లేనివి.. అన్నీ ట్రాలీలో వేసేసింది..
క్రెడిట్ కార్డు మళ్ళీ హ్యాండ్ బ్యాగ్‌లోంచి ఎప్పుడు బయటకు వద్దామా అని చూస్తోంది..
"ఎంత బాబు అయ్యింది?"
"10,000/- మేడమ్."
కాంతం కార్డు స్వైప్ చేసింది..
టైమ్ చూస్తే సాయంత్రం 5 అయ్యింది..
అన్నీ మోసుకొని, ఇంటి దారి పట్టింది కాంతం..
ఇంటి దగ్గర వెయిట్ చేస్తున్నాడు కళ్యాణ్..
"ఎంత సేపు అయిందండి వచ్చి? ఫోన్ చెయ్యచ్చు కదండీ!" అని ఫోన్ చూసింది.. 10 మిస్డ్ కాల్స్ ఉన్నాయ్..
"అయ్యో!.. ఫోన్ చూసుకోలేదండీ!" అంటూ తలుపు తాళం తీసింది కాంతం.
"ఇంత లేట్ అయ్యిందేమిటి కాంతం?" అడిగాడు కళ్యాణ్.
జరిగిందంతా చెప్పింది కాంతం.
"అయితే.. నా వంకాయ కూర ఖరీదు 50 వేలు.." అని తల పట్టుకున్నాడు కళ్యాణ్.
మర్నాడు ఉదయం వంకాయలు తుడుస్తూ.. "ఏవండీ! హ్యాపీ బర్త్‌డే.." అని భయపడుతూ చెప్పింది కాంతం.
***
తాత మోహనకృష్ణ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
యూట్యూబ్ లోకి అప్లోడ్ చెయ్యబడ్డ తాత మోహనకృష్ణ గారి కథల కోసం ప్లే లిస్ట్ లింక్ క్లిక్ చేయండి.
📢 మనతెలుగుకథలు.కామ్ WhatsApp ఛానల్‌ను ఉచితంగా ఫాలో అవ్వండి!
మనతెలుగుకథలు.కామ్‌లో ప్రచురించే కథలు • కవితలు • ప్రత్యేక వ్యాసాలు • సీరియల్ ఎపిసోడ్స్ - వాటి తాజా లింక్స్‌ను మా WhatsApp ఛానల్‌లో పొందవచ్చు.
✅ ఛానల్‌ను Follow చేయండి✅ WhatsAppలో Updates → Channels ద్వారా మా పోస్టులు చూడండి✅ మీకు నచ్చిన కథ లేదా పోస్టు లింక్‌పై క్లిక్ చేసి చదవండి✅ కొత్త పోస్టులు మిస్ కాకుండా Notifications 🔔 ON చేసుకోండి✅ మీ స్నేహితులు, సన్నిహితులతో మా ఛానల్‌ను Share చేయండి
👉 మా WhatsApp ఛానల్: https://whatsapp.com/channel/0029VbE7RFB3mFY84MHHSb3y
రచయిత పరిచయం:
నా పేరు తాత మోహనకృష్ణ. నాకు చిన్నతనం నుండి కథలంటే ఇష్టం. చందమామ, వార పత్రికలలో కథలు, జోక్స్ చదివేవాడిని. అలా, నాకు సొంతంగా కథలు రాయాలని ఆలోచన వచ్చింది. చిన్నప్పుడు, నేను రాసిన జోక్స్, కథలు, కొన్ని వార పత్రికలలో ప్రచురింపబడ్డాయి. నేను వ్రాసిన కధలు గోతెలుగు.కామ్, మనతెలుగుకథలు.కామ్ లాంటి వెబ్ పత్రికలలో ప్రచురింపబడ్డాయి. బాలల కథలు, కామెడీ కథలు, ప్రేమ కథలు, క్రైం కథలు రాయడమంటే ఇష్టం.
ధన్యవాదాలు తాత మోహనకృష్ణ
Comments