ఛిద్రం

#MKKumar, #ఎంకెకుమార్, #TeluguKavithalu, #Kavitha, #Kavithalu, #TeluguPoems, #ఛిద్రం, #Chidram

Chidram - New Telugu Poem Written By - M K Kumar

Published In manatelugukathalu.com On 25/01/2025

ఛిద్రం - తెలుగు కవిత

రచన: ఎం. కె. కుమార్

విరిగిన శరీరాలను మోసిన నదులు

అడవి గుండెలపై  కథలు రాశాయి 

కన్నీటి గీతాలుగా నడిచే చరిత్ర

రక్తపు దారుల్లో ప్రగతికి చిహ్నం అయింది 

మోసిన మట్టిలో మిగిలిన శరీరాలు

పేలిన తూటాల చిత్రాలను   ముద్రించాయి

నదిలో తేలే శరీరాలు 

మళ్లీ చీకటిలో వెలుగు కథలు చెప్తాయి 

ఆ చెట్లు  గాలిని జల్లెడ పట్టాయి 

పొదల్లో  విసిరబడిన మోదుగుపూలు 

పుత్తడి ఒడిలో సేద తీరి 

తరతరాల జ్ఞాపకాల పాటలు రాస్తాయి 

వాళ్లు చరిత్రల్ని తిరిగి రాయగలరు 

తమ ఆలోచనలతో రుధిర శిలలకు 

జీవం పోయగల చతుర్ముఖ బ్రహ్మలు 

నిర్జీవ శరీరాల   వెనుక దాగిన సూర్య కిరణాలు

కొత్త ప్రపంచానికి పునాదుల్లా నిలుస్తాయి.

వాళ్ల కాళ్ల నడకే కొత్త గేయం

వాళ్ల రక్తపు నదులే జీవానికి సంకేతం

భద్రతా వలయాల్లో చిక్కుకున్న నింగి నక్షత్రాలు 

ఎడారి వనంలో పువ్వులు పంటలను పూయిస్తాయి 

నింగి నుండి రాలిన చందమామలు

నిర్జీవ దేహాలను భుజాలపై మోసాయి 

రేపటి రోజున నూతన సూర్యుడిలా

అడవి గుండెల్లో మళ్లీ చరిత్రను వెలిగిస్తాయి.

భద్రతా వలయాల్లో నింగి చూసే కన్నుల

పాలిట వెలుగులే వారి బాటలపై పూస్తున్న పువ్వులు.

శరీరాల చలనం ఆగిన చోట

రక్తపు చరిత్ర కొత్త బాటలు వేసింది.

అడవి ఒడిలో మోదుగుపూల వాసన

పొదల గుండెల్లో గాయాల గీతలు,

నిశ్చల శిలల్లో నిలచిన విప్లవం

తరతరాల జ్ఞాపకాల వెలుగును కనింది 

వాళ్లే తిరిగి రాయగల కథల పుస్తకాలు,

తమ రక్తంతో చెక్కగల సత్య శిల్పాలు,

నిజం కోసం వ్రేలాడిన కలాలు

కొత్త ప్రపంచానికి పునాదులుగా మారతాయి.

వాళ్ల నడకలే కొత్త భూమికి ధ్వని,

వాళ్ల త్యాగాలే ఆకాశానికిచ్చే వెలుగు,

నింగిలో చిగురించిన ప్రతి తారకు

వాళ్ల పాటలే ఆరాధ్యమై నిలుస్తాయి.

చరిత్రకు పునర్జన్మ ఇచ్చే శరీరాలు

కళ్లలో కొత్త సూర్యుడిని మొలిపించి

విరిగిన రాళ్లపై విత్తనాలు చల్లుతాయి

మళ్లీ నదులు మోసే నవ జీవితాల కోసం.

-ఎం. కె. కుమార్

https://www.manatelugukathalu.com/profile/mkkumar