మరువలేను నిన్ను మాతృమూర్తి - పద్యశతకం
మరువలేను నిన్ను మాతృమూర్తి, అమ్మ, తల్లి ప్రేమ, మాతృమూర్తి, మాతృభక్తి, అమ్మపై పద్యాలు, తెలుగు పద్యాలు, ఆటవెలది, తెలుగు కవిత్వం, తల్లి త్యాగం, మమకారం, వాత్సల్యం, మాతృదేవోభవ, కుటుంబ విలువలు, తెలుగు సాహిత్యం, భావ కవిత్వం, గొట్టాపు శ్రీనివాసరావు, అమ్మ గొప్పతనం, తల్లి ఆశీర్వాదం, స్ఫూర్తిదాయక పద్యాలు
Maruvalenu Ninnu Mathrumurthi - Padya Sathakam | Gottapu Srinivasa Rao
మరువలేను నిన్ను మాతృమూర్తి - పద్యశతకం | గొట్టపు శ్రీనివాస రావు
Published In manatelugukathalu.com On 21/07/2026
అమ్మ ప్రేమను మాటల్లో పూర్తిగా వర్ణించడం అసాధ్యం. అయినప్పటికీ కవి తన హృదయంలోని కృతజ్ఞతను పద్యరూపంలో వ్యక్తపరిచిన అరుదైన కవితా సంపుటి "మరువలేను నిన్ను మాతృమూర్తి". వందకు పైగా ఆటవెలది పద్యాల ద్వారా తల్లి గర్భధారణ నుంచి పెంపకం, త్యాగం, మమకారం, విద్య, సంస్కారం, దైవత్వం వరకు ప్రతి కోణాన్ని హృద్యంగా ఆవిష్కరించిన ఈ రచన ప్రతి పాఠకుడి హృదయాన్ని తాకుతుంది. మాతృదేవోభవ భావనను సజీవంగా ప్రతిబింబించే ఈ పద్యమాలిక, తల్లికి అంకితమైన అపూర్వమైన నివాళిగా నిలుస్తుంది.
1.ఆ.వె.
అమ్మ! నీదు ఘనత నాటవెలది యందు
జెప్ప దలచి తీను గొప్ప గాను
సహకరించుమమ్మ, చల్లగా దీవించి
మరువలేను నిన్ను మాతృమూర్తి
2.ఆ.వె.
అవతరించ లేక యజుడన్నిచోట్లనూ
నిన్ను పంపినాడు నన్ను బ్రోవ
అమ్మ! నీదు ప్రేమ యతడినే మురిపించె
మరువలేను నిన్ను మాతృమూర్తి
3.ఆ.వె.
తెలుగు భాష యందు తీయనైన పదము
మనిషి మదిని దాగు మంచిపదము
‘అమ్మ’ మొదటి మాట అవని భాషలలోను
మరువలేను నిన్ను మాతృమూర్తి
4.ఆ.వె.
పుడమి భాషలన్ని వడకట్టి వెదకినా
అమ్మ పదము కన్న అందమేది?
అమ్మ యనగ హృదిని అమృతము కురిసేను
మరువలేను నిన్ను మాతృమూర్తి
5.ఆ.వె.
పిండ దశను నేను పిడిగుద్దుల నిడిన
నీదు గర్భగుడిని నెలల నాడు
తన్మయత్వముగను తల్లివై మోసితి
మరువలేను నిన్ను మాతృమూర్తి
6.ఆ. వె.
కష్టమైన దినుచు పౌష్టికాహారము
కన్నతల్లి! నీదు కందు కొరకు
నెలలు నిండు వరకు నెలవు నాకైతివి
మరువలేను నిన్ను మాతృమూర్తి
7.ఆ.వె.
గర్భమున కదులుచు గడబిడ చేయగ
కడుపు పైన నీదు కరము బెట్టి
తనివి దీర నన్ను తల్లి! తాకితివీవు
మరువలేను నిన్ను మాతృమూర్తి
8.ఆ.వె.
పంటిబిగువు నణచి ప్రసవ వేదన యంత
ఊపిరూది పిదప యుగ్గు పట్టి
నాకు జన్మ నిడెడి నడయాడు దేవతా
మరువలేను నిన్ను మాతృమూర్తి
9.ఆ.వె.
నన్ను గర్భగుడిని నవమాసములు మోసి
జన్మ నొసగితీవు సాధ్వి వీవు
నీదు సేవ యిచ్చు నిజమైన ముక్తిని
మరువలేను నిన్ను మాతృమూర్తి
10.ఆ.వె.
పురిటి నొప్పినంత పూర్తిగ భరియించి
మృత్యువును జయించి మేదిని వలె
సహనమెంచి నాకు జన్మనిచ్చెడి అమ్మ!
మరువలేను నిన్ను మాతృమూర్తి
11.ఆ.వె.
తల్లి నిన్ను చూచి తనువు పులకరించే
కనులు నిన్ను చూచి కాంతులీనె
మనసు నిన్ను తలచి మైమరచెనుగద
మరువలేను నిన్ను మాతృమూర్తి
12.ఆ.వె.
జన్మనిడితివీవు జవసత్వములు బోసి
నీదు కష్టమిలను నిరుపమమ్మ
నా కనులకు నీవె నడిచేటి కోవెల
మరువలేని నిన్ను మాతృమూర్తి
13.ఆ.వె.
ఆకలి గొని నేను శోకము పెట్టగా
మనసు కరుగ నీవు మమత చూపి
పాల నిచ్చితీవు వాత్సల్యమును నింపి
మరువలేని నిన్ను మాతృమూర్తి
14.ఆ.వె.
అమ్మ నీదు మాట కమ్మగా నుండును
అమ్మ నీదు పాట అమృత ధార
అమ్మ నీదు ప్రేమ ఆకాశమును మించు
మరువలేని నిన్ను మాతృమూర్తి
15.ఆ.వె.
పండు వెన్నెలేల పట్టు పరుపులేల
అమ్మ జోల పాట నాలపించ
మమతలూరు నీదు మధుర గాన మదియే
మరువలేను నిన్ను మాతృమూర్తి
17.ఆ.వె.
జోల పాట పాడి జో కొట్టి జో కొట్టి
హృదిని పాన్పు చేసి నిదుర బుచ్చి
పెంచినట్టి నిన్ను ప్రేమగా సేవింతు
మరువలేను నిన్ను మాతృమూర్తి
18.ఆ.వె.
ముద్దు మాటలు విని ముద్దుగ నను గాంచి
మురిసిపోతివమ్మ ముదము గాను
ముసి ముసి నగవులను మోముపై నింపితి
మరువలేని నిన్ను మాతృమూర్తి
19.ఆ.వె.
కన్నతల్లి మనసు వెన్నలాంటి మనసు
బిడ్డ బాగుకోరు దొడ్డ మనసు
అమ్మ నీదు మనసు కమ్మనైన మనసు
మరువలేను నిన్ను మాతృమూర్తి
20.ఆ.వె.
రాత్రి యందు గాచు రజనీశుడిల లోన
దినము నందు గాచు దినకరుండు
నన్ను నీవు గాచు నన్నివేళల యందు
మరువలేను నిన్ను మాతృమూర్తి
21. ఆ. వె.
మాట నాకు నేర్పి మమతను పంచియు
చదువు నేర్పితీవు చక్కదిద్ది
ఆది గురువు నీవె ఆదర్శమూర్తివి
మరువలేని నిన్ను మాతృమూర్తి
22.ఆ.వె.
విసనకర్రతోటి వేసవి కాలాన
చల్లగాలి నిచ్చి చలువపరిచి
వేసవంత నీవు వెన్నెల జేసితి
మరువలేని నిన్ను మాతృమూర్తి
23.ఆ.వె.
అలకపాన్పు నెక్కి ఆకలై నేనుంటే
బువ్వ పెడితే వీవు బుజ్జగించి
మమత పంచి యలక మరిపింప జేసితి
మరువలేను నిన్ను మాతృమూర్తి
24. ఆ. వె.
బిక్కు బిక్కు మనుచు భీతి చెందిన వేళ
దైవము వలె నాకు ధైర్యమున్ను
బలములనొసగితివి బాధ్యత నేర్పుచు
మరువలేను నిన్ను మాతృమూర్తి
25.ఆ.వె.
హద్దులేని ప్రేమ హాయిగా పంచియు
ముద్దు మురిపెమంత మూటగట్టి
బుద్ధులెన్నో తెలిపి శుద్ధిగా పెంచితి
మరువలేని నిన్ను మాతృమూర్తి
26. ఆ. వె.
అంతులేని ప్రేమ నమ్మయే జూపును
అమ్మ కన్న గొప్ప బొమ్మ యేది
అమ్మ సూపునెప్పుడనురాగ మంతయు
మరువలేను నిన్ను మాతృమూర్తి
27. ఆ. వె.
అమ్మ గోరుముద్ద లమృతము వలెనుండు
నిత్యసత్య మిదియె నేలపైన
అమరులైన పొందరమ్మ చేతి సుధను
మరువలేను నిన్ను మాతృమూర్తి
28. ఆ. వె.
స్వచ్ఛమైన ప్రేమ మచ్చ లేకుండగ
పంచి తీవుతల్లి యంచితముగ
అమ్మ నీదు ప్రేమ అమృతమ్ము ధరణిని
మరువలేను నిన్ను మాతృమూర్తి
29. ఆ. వె.
కస్సుబుస్సు మనక కరుణ జూపితివీవు
చిలిపి చేష్టలెల్ల జేసినపుడు
మంచి చెప్పినపుడు మమతను పంచితి
మరువలేని నిన్ను మాతృమూర్తి
30. ఆ. వె.
చెడును విడువమనుచు చిన్ని శిక్షలు వేసి
శ్రీలనొసగితీవు శ్రీలు పలికి
తల్లి నిన్ను మించు తత్త్వశాస్త్రములేదు
మరువలేను నిన్ను మాతృమూర్తి
31.ఆ.వె
అందనట్టి మామ ఆకాశమందున
అందు చందమామ అమ్మ కాదె?
అమ్మ కన్న చలువ అవనిని యున్నదా?
మరువలేను నిన్ను మాతృమూర్తి
32.ఆ.వె.
గోల చేసి నేను గొడవ చేయునపుడు
ఊరడించితీవు ఓర్మితోడ
విసుగు జెందకుండ విలువలు నేర్పితి
మరువలేని నిన్ను మాతృమూర్తి
33.ఆ.వె.
అలక పాల్పునెక్కి ఆకలై నేనుంటె
బువ్వ పెడితి వీవు బుజ్జగించి
మమత పంచి యలక మరిపింపజేసితి
మరువలేను నిన్ను మాతృమూర్తి
34.ఆ. వె.
అడగకుండా పెట్టు అమ్మ వెన్న మనసు
అమ్మ పెట్టుననిరి అడిగినపుడు
నేల మీద ఘనము నీదు వాత్సల్యము
మరువలేను నిన్ను మాతృమూర్తి
35. ఆ. వె.
నీతి కథలు చెప్పి నీతిగా నడిపించి
తీర్చిదిద్దితీవు తీరుగాను
ధర్మశాస్త్రములను దండిగా నేర్పితి
మరువలేను నిన్ను మాతృమూర్తి
36. ఆ. వె.
తినగ తినగ మరల తినవలెననిపించు
పంచభక్ష్యములను మించి పోవు
అమ్మ నీదు చేతి అమృతపు వంటలు
మరువలేను నిన్ను మాతృమూర్తి
36.ఆ.వె.
చందమామ చూపి సంతోషముగ బువ్వ
కడుపు నిండునటుల కుడుపుతీవు
కన్న పేగు కంటే గట్టి బంధము లేదు
మరువలేను నిన్ను మాతృమూర్తి
37.ఆ.వె.
కరువు కాటకాలు కాటు వేయగరాగ
కలత పడక చూపి కన్న ప్రేమ
కడుపు నింపితీవు కష్టమునకు నోర్చి
మరువలేను నిన్ను మాతృమూర్తి
38.ఆ.వె.
తప్పు చేసినపుడు దండన గావించి
మేలు పనులు చేయ మెప్పునిచ్చి
బతుకునందు నీతి బాట చూపించితి
మరువలేను నిన్ను మాతృమూర్తి
39.ఆ.వె.
అమ్మదేవత వలె ఆశీస్సులు నొసగి
ప్రేమ తోడ మమ్ము పెంచితీవు
బతుకునందు నీతి బాట చూపించితి
మరువలేను నిన్ను మాతృమూర్తి
40.ఆ.వె.
అమ్మ నాకు నీవె ఆత్మ నిదర్శనం
త్యాగమూర్తి వీవు తనువునిడితి
ధర్మ పదము చూపు ధర్మమూర్తివి నీవు
మరువలేను నిన్ను మాతృమూర్తి
41.ఆ.వె.
గతుకుల బతుకులకు గమ్యమునొసగియు
సంతు బాగు కోరి సంతసించి
తపన పడితివమ్మ తాపసివి యగుచు
మరువలేను నిన్ను మాతృమూర్తి
42.ఆ.వె.
ఆపదయిన వేళ నండగా నీవుండి
నన్ను ప్రోత్సహించి వెన్ను తట్టి
తోవచూపి తీవు జీవిత గమనమున్
మరువలేను నిన్ను మాతృమూర్తి
43.ఆ.వె.
నీవు తినక దాచి నీదు సంతుకు బెట్టి
త్యాగమూర్తి వైతి ధరణి పైన
నిలువుటద్దమీవె నిస్వార్ధ ప్రేమకు
మరువలేను నిన్ను మాతృమూర్తి
44.ఆ.వె.
పైన భానుడుండె వసుధ రక్షణకును
విశ్వ మందు రక్ష విష్ణు వలన
నీవు రక్ష ణిచ్చు నీ ఇంటికెప్పుడు
మరువలేను నిన్ను మాతృమూర్తి
45.ఆ.వె.
పండగంటి పూట పిండివంటలు చేసి
సంతు కిచ్చితీవు సంతసమున
అమ్మ నీదు సేవలానందకరమగు
మరువలేను నిన్ను మాతృమూర్తి
46.ఆ.వె.
కోరినపుడు నాకు కొండంత అండగా
సాయపడితివీవు చక్కగాను
సాన్నిహిత్యమునకు సాక్ష్యమే నీవమ్మా!
మరువలేను నిన్ను మాతృమూర్తి
47.ఆ.వె.
మట్టిలోన దొర్లి బట్టలన్నియు మాపి
ఇంటి ముందు నిలిచి యేడ్చినపుడు
నాకు లాల పోసి సోకులు చేసితి
మరువలేను నిన్ను మాతృమూర్తి
48.ఆ.వె
పరిసరాల నెపుడు పరిశుభ్రముగనుంచి
స్వస్థత నిడితీవు సహనమెంచి
స్వార్థమింత లేని సాధ్వి నీవవుదువు
మరువలేను నిన్ను మాతృమూర్తి
49.ఆ.వె
పెద్ద బాలశిక్ష శ్రద్ధగా చదివించి
వృద్ధి చేయునాదు బుద్ధి నీవు
జ్ఞాన తృష్ణకివే జనని వై నిలిచితి
మరువలేను నిన్ను మాతృమూర్తి
50.ఆ.వె.
తల్లి ప్రేమ చూడ తరగతి నిధియగు
తుహిన గిరుల యందు తుహినము వలె
తల్లి నీదు ప్రేమ చలము నీరే గదే!
మరువలేను నిన్ను మాతృమూర్తి
51.ఆ.వె
అమ్మ మాకు నీవె యాదర్శమూర్తివి
మంచి గుణములన్ని యెంచి నేర్పి
ప్రగతి రథము పైన పయనింప జేసితి
మరువలేను నిన్ను మాతృమూర్తి
52.ఆ.వె.
కలలు నిజము చేయు కల్పతరువు నీవు
శిలను మార్చితీవు శిల్పము వలె
ఇలను నీవె అమ్మ యిలవేల్పువైతివి
మరువలేని నిన్ను మాతృమూర్తి
53.ఆ.వె
సులభ సూత్రములను సూటిగా సూచించి
చదువు సంధ్యలందు పదును పెట్టి
నన్ను పెంచినట్టి నా సరస్వతి వీవు
మరువలేను నిన్ను మాతృమూర్తి
54.ఆ.వె.
అమ్మ నీవే చూతువన్ని మంచి చెడులు
బాధ్యతలను మోసి భారమైన
నీవు లేని యిల్లు నిప్పుల కొలిమియే
మరువలేను నిన్ను మాతృమూర్తి
55.ఆ.వె
అమ్మ పంచినట్టి ఆత్మీయ ప్రేమది
పంచభూతములను మించు సుమ్మి
అమ్మ ప్రేమ సాటి అమృతమ్ము దొరకునా
మరువలేను నిన్ను మాతృమూర్తి
56.ఆ.వె.
తండ్రి వద్ద విద్య ధనము నందించును
గురువు నేర్పు విద్య కూడు పెట్టు
అమ్మ నీదు విద్య ఆత్మసాక్షి నిడును
మరువలేను నిన్ను మాతృమూర్తి
57.ఆ.వె.
చదవ నన్న నాడు చదువు విలువ తెల్పి
మదిని తీర్చి దిద్ది చదివినట్లు
విధిని తెలియ పరిచి వినయము నేర్పితి
మరువలేను నిన్ను మాతృమూర్తి
58.ఆ.వె.
తెల్లవారు వేళ తల్లి కాళ్లకు మొక్కి
పనులు చేయగ తగు ఫలిత మందు
తల్లి దీవెనిలను దైవమిడినయట్లు
మరువలేను నిన్ను మాతృమూర్తి
59.ఆ.వె.
ఉల్లమందు ప్రేమ పల్లవులూదుచూ
నీవు చేర్చితీవు నిజ పధమున
శిలగ యున్న నన్ను శిల్పము జేసితి
మరువలేను నిన్ను మాతృమూర్తి
60.ఆ.వె.
వీనులకును విందు వినగనీదు పలుకు
కన్నులార కంటి కరుణ నీది
ఇంటి దీపమీవె యింటిల్లిపాదికి
మరువలేను నిన్ను మాతృమూర్తి
61.ఆ. వె.
తనకు పాత చీరె మనసు తృప్తి యనుచు
కొత్త బట్టలిచ్చు కొడుకుకెపుడు
త్యాగమనగ నీవె తల్లి! అయవని యందు
మరువలేని నిన్ను మాతృమూర్తి
62.ఆ. వె.
కన్న తండ్రి నన్ను కన్నీటి పాల్జేయ
కట్టుకున్న భార్య కసురుకున్న
కన్నతల్లి! నీవు కంటిపాపగ సాకె
మరువలేని నిన్ను మాతృమూర్తి
63.ఆ. వె.
నన్ను కన్న తల్లి నాయింటనుండగా
వెతుకుటేల వేరు వేల్పు కొరకు
తల్లి నిన్ను మించు దైవము లేదులే
మరువలేను నిన్ను మాతృమూర్తి
64.ఆ. వె.
అదును బట్టి మారు అన్నదమ్ముల ప్రేమ
నడత బట్టి యుండు నాన్న ప్రేమ
అమ్మ! నీదు ప్రేమ అజరామరము గదా!
మరువలేను నిన్ను మాతృమూర్తి
65.ఆ.వె.
అమ్మ నీదు ప్రేమ ఆకాశమంతది
దయను చూపితీవు ధరణి వోలె
నీదు క్షమను కొలువ నీరధికి సమము
మరువలేను నిన్ను మాతృమూర్తి
66.ఆ. వె.
ముదిమి మీద పడిన మోము ముడతలయిన
తల్లి! నీదు ప్రేమ తరిగిపోదు
ఎల్లలేనిదమ్మ తల్లి! నీదు రుణము
మరువలేను నిన్ను మాతృమూర్తి
67.ఆ.వె.
రాజు రాజ్యమైన రాజ భోగములైన
భువిని సంపదైన దివిజులైన
నమ్మకన్న గొప్ప అంశములవి కావు
మరువలేను నిన్ను మాతృమూర్తి
68.ఆ.వె.
కోట్ల ఆస్తికన్న నోట్ల కట్టలకన్న
పట్టు బట్ట కన్న పసిడి కన్న
అవని మెప్పు కన్న అమ్మసేవయె మిన్న
మరువలేని నిన్ను మాతృమూర్తి
69.ఆ.వె.
అంతరంగమందు నాత్మీయ ప్రేమను
కన్నతల్లి పంచు కచ్చితముగ
హాయి గొలుపు హృదయమమ్మను చూడగా
మరువలేని నిన్ను మాతృమూర్తి
70.ఆ.వె.
ఉర్వి కలిగియున్న యోర్పునంత కలిపి
బొమ్మనాడు చేసెనమ్మ సృష్టి
సహన మందు నీకు సాటివారెవ్వరు
మరువలేను నిన్ను మాతృమూర్తి
71.ఆ.వె.
కోటి దేవతలను కూడి యా బ్రహ్మయే
నిన్ను తెచ్చినాడు నేలపైకి
అమ్మయున్న చాలునవనియే నాకము
మరువలేను నిన్ను మాతృమూర్తి
72.ఆ.వె.
తల్లి నిన్ను మించు తత్వంబు లేదమ్మ
తల్లి యొడిని మించు తలము లేదు
తల్లి నిన్ను మించు దైవంబు లేదమ్మ
మరువలేను నిన్ను మాతృమూర్తి
73.ఆ.వె.
ఆకు లెండి పిదప అవని పై రాలును
ఫలము పండి పిదప పగిలిపోవు
అమ్మ నీది ప్రేమకంతమే లేదమ్మ
మరువలేను నిన్ను మాతృమూర్తి
74.ఆ.వె.
తల్లి కన్నదైన తల్లి పెంచినదైన
ఉల్లమందు ప్రేమ తల్లి కుండు
తల్లి తల్లియె గద ధరణి యందు
మరువలేను నిన్ను మాతృమూర్తి
75.ఆ.వె.
కన్నతల్లి మనసు వెన్న వంటిదగును
పెంచినమ్మ కూడా ప్రేమ పంచు
అమ్మ ఎవరికైన అమ్మయేయౌ కదా
మరువలేను నిన్ను మాతృమూర్తి
76.ఆ.వె.
మాతృమూర్తి అన్న మమకార నిధియగు
మాతృమూర్తి నీదు మనసు మనసు మనసు
మాతృమూర్తి నీవె మమతల కోవెల
మరువలేను నిన్ను మాతృమూర్తి
77.ఆ.వె.
వింటి నీదు పాట చంటి బిడ్డగ నేను
కంటి నీదు రూపు కంటి నిండ
కన్నతల్లి నీవె కరుణారసనిధివి
మరువలేను నిన్ను మాతృమూర్తి
78.ఆ.వె.
వయసు మీద పడిన వణికి పోవుచునున్న
నాదు క్షేమము కరుణమున తలచి
అమ్మ యనెడి మాటకర్థము చాటితి
మరువలేను నిన్ను మాతృమూర్తి
79.ఆ.వె.
కాసులెన్నొ పోసి కనకమ్ము కొన్ననూ
అమ్మ సేవ కొలువ సొమ్ము కలదె?
ధనము కంటె తల్లి ఘనము ధరణి యందు
మరువలేను నిన్ను మాతృమూర్తి
80.ఆ.వె.
తల్లి సేవ చేయు తనయుడు తనయుడు
మాతృ సేవ చేయు మనిషి మనిషి
తల్లి నీదు సేవ తరగని భాగ్యము
మరువలేను నిన్ను మాతృమూర్తి
81.ఆ.వె.
అవని సంపద యయిన నధికారమైనను
పూజ్యమైన ప్రభుని రాజ్యమైన
అమ్మతనము కన్న నత్యుత్తమము కాదు
మరువలేను నిన్ను మాతృమూర్తి
82.ఆ.వె
అమ్మ మనసు విరిచి యమ్మనే మరచిన
పుత్రుడధముడగును పుడమిపైన
అధముడయిన గాని ప్రధముడందువు వాణి
మరువలేని నిన్ను మాతృమూర్తి
83.ఆ.వె.
ఆపదెంత యయిన అవసరమేదైన
అమ్మ నీవె యున్న నభయ మగును
అట్టి యాత్మశక్తి యమ్మకే సాధ్యము
మరువలేను నిన్ను మాతృమూర్తి
84.ఆ.వె.
అవనియందు నీవె యనురాగ దేవత
అలుపెరుగని యోర్పు వమ్మ నీవు
నీదు ప్రేమ దొరకు నీ వద్ద మాత్రమే
మరువలేను నిన్ను మాతృమూర్తి
85.ఆ. వె.
అమ్మ! నిన్ను తప్ప నమ్మరాదెవరిని
భువిని ప్రేమలెల్ల బూటకములు
అమ్మ నీవు కాదె నమ్మకానికి అమ్మ
మరువలేను నిన్ను మాతృమూర్తి
86.ఆ.వె.
బంధు ప్రేమ లెపుడు బహులాభములకేను
దరికి చేరినపుడె తండ్రి ప్రేమ
తల్లి! నీదు ప్రేమ త్యాగమే నిత్యమూ
మరువలేను నిన్ను మాతృమూర్తి
87.ఆ. వె.
ఏది మొదటి మాట ఏభాషనయిననూ?
అమ్మ మాట గాదె అవని పైన
అమ్మ! నీదు మాట అమృతమ్ము నిడుటచే
మరువలేను నిన్ను మాతృమూర్తి
88.ఆ. వె.
అక్షరములు నాకు హాయిగా నేర్పితి
ఒడిని బడిగ మలచి ఓర్పుగాను
మొదటి ఒజ్జ వమ్మ ముదమార నిను గొల్వ
మరువలేను నిన్ను మాతృమూర్తి
89.ఆ. వె.
ఇల్లు అలికి రంగ వల్లికలను పెట్టి
బట్టలుతికి యారు బయటనూడ్చి
వండి వార్చి బతుకు బండిని నడిపితి
మరువలేను నిన్ను మాతృమూర్తి
90.ఆ.వె.
వెతికితీను సత్య ప్రేమజాడ కొరకు
ఆర్తితో నెరిగితి యసలు ప్రేమ
తల్లి నీదు ప్రేమ త్యాగ తత్వ ప్రేమ
మరువలేను నిన్ను మాతృమూర్తి
91.ఆ.వె.
హరిని బోలి యమ్మ యాహారము నిడును
హరునిబోలి యమ్మ సిరులు గూర్చు
నలువ వోలె యమ్మ నాకు జన్మనిడితి
మరువలేను నిన్ను మాతృమూర్తి
92.ఆ.వె.
దైవ సేవ చేయ దైవమిలను లేడు
తల్లినీదు సేవ దైవ సేవ
నీదు సేవ యిచ్చు నిజమైన మోక్షమ్ము
మరువలేను నిన్ను మాతృమూర్తి
93.ఆ.వె.
మాతృమూర్తి చాలు మాణిక్యమెందుకు?
అమ్మ నీవు చాలు నాస్తులేల?
తల్లి నీదు సేవ నిజమైన వేడుక
మరువలేను నిన్ను మాతృమూర్తి
94.ఆ.వె
అమ్మ సేవ చేయు హస్తము హస్తము
అమ్మ పైన కలిగిననుగుననుగు
తల్లి నిన్ను గూర్చి తర్కము తర్కము
మరువలేను నిన్ను మాతృమూర్తి
95.ఆ.వె.
మ్రొక్కి లాభమేమి ముక్కోటి సురులకు
మోక్ష సిద్ధి కొరకు దీక్షలేల
అమ్మ నీదు సేవ అందించదాముక్తి
మరువలేను నిన్ను మాతృమూర్తి
96.ఆ.వె
ఆపదయిన చోట అమ్మా తనయులున్న
మాతృమూర్తి సుతిని మనికి గోరు
త్యాగరూపివీవు తల్లి ధరణి యందు
మరువలేను నిన్ను మాతృమూర్తి
97.ఆ.వె.
వేయి మార్లు కాశి వెళ్లి వచ్చిన నేమి
వసుధ చుట్టు తిరిగి వచ్చె నేని
అమ్మకిడిన జోతకవనిని సమమేమి
మరువలేను నిన్ను మాతృమూర్తి
98.ఆ.వె.
మాతృ సేవచేసి మాతౄణముందదీర్చి
మహిని మెలగవలయు మాన్యమతిని
ఇట్టి బుద్ధినిచ్చి ఇంపార మది బ్రోచె
మరువలేను నిన్ను మాతృమూర్తి
99.ఆ.వె.
తాటి చెట్టు వోలే తనువెంత యెదిగినన్
పరుల సేవ కొరకు పాటుపడిన
బుద్ధి నాకు కలిగి భూమియంతను పూచు
మరువలేను నిన్ను మాతృమూర్తి
100.ఆ.వె.
పంచదార కన్న పట్టు తేనెయ కన్న
తేట తెలుగు కన్న తీపి కన్న
నీదు పాద పద్మ నిధియగు మధురంబు
మరువలేను నిన్ను మాతృమూర్తి
101.ఆ.వె.
ఆకలైన వేళ ఆహారమడిగిన
పస్తులిండి తెచ్చి పాయసమ్ము
కుడిపితీవు నీవు కడుపార నాకును
మరువలేను నిన్ను మాతృమూర్తి
102.ఆ.వె.
సురుల గణము కన్న సురరాజు కన్నను
సృష్టికర్త కన్న సృష్టి కన్న
జన్మనిచ్చినట్టి జనని నీవే ఘనము
మరువలేను నిన్ను మాతృమూర్తి
103.ఆ.వె.
తల్లి నన్ను పెంచె దయతోడ ప్రేమగా
ఉల్లమందు నుండు తల్లి యట్టి
తల్లి పైన పద్యమల్లుట కష్టమా?
మరువలేను నిన్ను మాతృమూర్తి
104.ఆ.వె.
ఈశ్వరుండు తపము లెవ్వరి కోసము
ఆస్తి కొరకు గాదె అమ్మ కొరకు
ధన్యతనొనగూర్చ తల్లి జపము సుమ్మి
మరువలేను నిన్ను మాతృమూర్తి
105.ఆ.వె.
ఎవరు నచ్చకున్నా నెవరు నొచ్చుకొనిన
తల్లినీదు ప్రేమ తనయుడేను
ఈశ్వరీచ్చనొందు ననేకదంతుడె సుమ్మి
మరువలేను నిన్ను మాతృమూర్తి
106.ఆ.వె
ఆదిశక్తి పోయె నాత్రిమూర్తులు పుట్ట
తల్లి కోరునట్టి తనయు బ్రతుకు
త్యాగమనగ నీవె తల్లి జగతి యందు
మరువలేను నిన్ను త్యాగమంటే నీవే
107.ఆ.వె.
అమ్మ లేదు గనుక హరుడు బిక్షమడిగె
గజపు తోలు తొడిగె గరళకంఠ
కన్నతల్లి యున్న కడగండ్లు ముట్టునా?
మరువలేను నిన్ను మాతృమూర్తి
108.ఆ.వె.
తల్లి నీదు ఋణము తనయునిగా నేను
తీర్చలేక కృతిని కూర్చితీను
దీవెన వరమివ్వు దివినుండి దైవమై
మరువలేను నిన్ను మాతృమూర్తి
109.ఆ. వె.
ఆకలనిన గాని ఆపదైనను గాని
అండగా నిలచితి వమ్మ నీవు
ద్రౌపది మొర వినిన గోపాలుని వలెను
మరువలేను నిన్ను మాతృమూర్తి
110. ఆ. వె.
ప్రాణమునిడి పిదప వరముగా నొసగితి
ముగ్గురమ్మలంశములను నీవు
బతుకు బండి పైన పరమాత్మ రూపమా
మరువలేను నిన్ను మాతృమూర్తి
-గొట్టాపు శ్రీనివాస రావు
గొట్టాపు శ్రీనివాస రావు గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
విజయదశమి 2026 కథల పోటీల వివరాల కోసం
ఉగాది షడ్రుచుల కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం: గొట్టాపు శ్రీనివాస రావు
నమస్తే అండీ!
మీకు ధన్యవాదములు🙏
నావివరాలు
పూర్తి పేరు: గొట్టాపు శ్రీనివాస రావు
జన్మస్థలం: సాలూరు
తల్లిదండ్రులు: నాగమ్మ, శివున్నాయుడు
భార్య: హారిక
పిల్లలు: శివనగేష్, ఆదిత్య
చదువు
ఉద్యోగం పేరు: పాఠశాల సహాయకుడు
ఉద్యోగంలో చేరినతేది-మొదటిస్టేషన్/స్కూల్: 19-10-2009
పనిచేసిన స్థలాలు-హోదా
1. జిల్లా పరిషత్ ఉన్నత పాఠశాల, గడసాం, దత్తిరాజేరు మండలం, విజయనగరం జిల్లా
2. జిల్లా పరిషత్ ఉన్నత పాఠశాల, పాంచాలి , పాచిపెంట మండలం, పార్వతీపురం మన్యం జిల్లా.
3. మండల ప్రాధమికోన్నత పాఠశాల, మంచాడ వలస, పాచిపెంట మండలం, పార్వతీపురం మన్యం జిల్లా.
అభిరుచులు: సాహిత్య పఠనం , రచన
ప్రచురణ అయిన పుస్తకాలు: 1. మరువలేను నిన్ను మాతృమూర్తి
2. క్రియా నిఘంటువు (తెలుగు నుండి ఇంగ్లీషు)
3. విశ్వా గజల్స్
అవార్డులు: 1. నేషన్ బిల్డర్
ఇన్నర్ వీల్ క్లబ్, సాలూరు
2. పార్వతీపురం జిల్లా ఉత్తమ ఉపాధ్యాయ 2024 అవార్డు
సేవాకార్యక్రమాలు: సాహిత్య సేవ
చాలా బాగుంది అమ్మ శతకం