వందకు అవుట్
- Mohana Krishna Tata
- Jul 11
- 5 min read
#MohanaKrishnaTata, #తాతమోహనకృష్ణ, #VandakuOut, #వందకుఅవుట్, #TeluguComedyStories, #తెలుగుహాస్యకథలు
Vandaku Out - New Telugu Story Written By Mohana Krishna Tata
Published In manatelugukathalu.com On 11/07/2025
వందకు అవుట్ - తెలుగు కథ
రచన: తాత మోహనకృష్ణ
"రాధా..! ఎక్కడ నుంచి వస్తున్నావు?" అడిగాడు భర్త రవి.. అప్పుడే ఇంటికి వచ్చిన భార్యని చూసి.
"అదేనండి..మన వీధి చివర అమ్మాయి పార్టీకి పిలిచింది"
"ఏ పార్టీ..? బర్త్డే ?"
"కాదు.."
"మరి ఏంటి? నిన్ను సింగల్ గా పిలిచింది..ఏమిటో అంత స్పెషల్?"
"వాళ్ళ అబ్బాయికి చాలా రోజుల తర్వాత ఫ్రీగా మోషన్ అయ్యిందంట..ఫ్రీగా మోషన్ అయితే, పది మంది ఆడవారికి ప్రీమియం కాఫీ తాగిస్తానని మొక్కుకుంది..అంతే!"
"ఇదీ ఒక మొక్కేనా? మీ ఆడవారి పనే బాగుంది..మేము రోజంతా ఆఫీస్ లో కష్టపడితే, మీరేమో మొక్కులంటూ రోజుకొక పార్టీ చేసుకుంటున్నారు.."
"మీ మగవారు మాత్రం పార్టీ చేసుకోరా..? మాకు అన్నీ తెలుసులెండి..! వీకెండ్ వస్తే చాలు, మీరు నా మొహమే చూడరు..ఎప్పుడూ బయటే కదా?"
"మేమా..డబ్బులు వేసుకొని పార్టీ చేసుకోవాలి..మీ లాగా మమల్ని ఎవరు ఫ్రీగా పిలవరు..కొత్త చీర కొంటె పార్టీ, షాప్ వాడు డిస్కౌంట్ ఇస్తే పార్టీ.. ప్రతీదానికే పార్టీయే మీకు"
"మీ మాటల్లో పడి మరచాను..ఉండండి డైరీ చూసుకోవాలి. ఈ రోజు ఇంకా ఎవరి ఇంట్లో పార్టీ ఉందో..ఈ రోజు శ్యామల, రేపు సుచిత్ర ఇలా డేట్స్ అన్నీ సేవ్ చేసుకోవాలి"
"ఎందుకు వీరంతా పార్టీలు ఇస్తున్నారు..? ఇప్పుడు ఎవరికైనా వాంతులు? విరోచనాలు?"
"మీరు మరీనూ..మా ఆడవారు ఎప్పుడూ ఒకేలాగ ఉండము. మీకు తెలియాలంటే, వివరంగా చెప్పాలి...
శ్యామల మొన్న ఫోన్ చేసింది.."ఈ రోజు పార్టీ ఉంది..మా ఇంటికి రావాలి" అని చెప్పింది.
"ఎందుకు?" అని అడిగాను.
"రోజూ తాగొచ్చి తిట్టే మా ఆయన..నిన్న తాగలేదు..పైగా షాపింగ్ కి తీసుకుని వెళ్ళాడు..అందుకే అందరికి పార్టీ"
"మీ ఆయన మారినందుకు పార్టీ ఇస్తున్నందుకు చాలా సంతోషం.." అని అన్నాను.
"ఆయన తాగినా నాకు పర్వాలేదు.. అలవాటైపోయింది.. దానికి కాదు పార్టీ. మా ఆయన షాపింగ్ కి తీసుకెళ్ళి చాలా రోజులయింది..అందుకూ ఈ పార్టీ. ఆయన మూడ్ చూసి, నాలుగు పట్టు చీరలు, రెండు నెక్లెస్ లు కోనేసుకున్నా..ఇంక ఆయన ఎంత తాగినా, ఎన్ని తిట్టినా, ఆ చీరలు, నగలు చూసుకుని అన్నీ పడొచ్చు.."
"ఎంత మాట..! మీ ఆడవారు అంతే..! మొగుడు మారాలని దేవుడుని కోరుకోకుండా..మా ఆయన చీరలు, నగలు కొనమని కోరుకుంటారు" అంటూ ఆశ్చర్యపోయాడు రవి.
"ఇంక సుచిత్ర..స్పూన్ కొంటె, కుక్కర్ ఫ్రీగా వచ్చిందని రేపు పార్టీ ఇస్తోంది.."
"ఇంతకీ స్పూన్ ఎంతో?"
"ఎంతోనా..? వెయ్యి.. అంతే..!"
"నేను చాలా బెటర్ కదండీ..అందరి ఆడవాళ్ళ లాగ కాదు.. పార్టీలూ గట్రా ఇవ్వను.. డబ్బులు వేస్ట్ చెయ్యను. మాటల్లో పడి మరచాను. ఈ ఆదివారం మనం బయటకు వెళ్ళాలి.. ప్రిపేర్ అవండి"
"ఎందుకోయ్..!"
"జస్ట్ రొటీన్ షాపింగ్ అంతే..! నన్ను షాపింగ్ కు తీసుకుని వెళ్లి అప్పుడే వారం అయిపోయింది..తెలుసా?"
"వారానికి ఒకసారి ఎవరూ షాపింగ్ చెయ్యరే..! పోయిన వారం ఒకసారి గుర్తుచేసుకో.. నువ్వు ఎంత డబ్బులు ఖర్చు చేసింది తెలుస్తుంది. నా దగ్గర డబ్బులు చాలకపోతే, నా బండి తాకట్టు పెట్టి, ఇంటికి బస్సులో రాలేదా?"
"షాపింగ్ ముఖ్యం..మనం ఇంటికి ఎలా వస్తే ఏమిటి? మీరు ఆఫీస్ కి వెళ్ళడం కోసమైన బండి విడిపిస్తారని నాకు తెలుసు"
"మళ్ళీ షాపింగ్ ఎందుకు చెప్పు.. కాస్త రెస్ట్ తీసుకో.."
"ఒకసారి పైన తిరిగే ఆ ఫ్యాన్ కేసి చూసి, ఫ్లాష్ బ్యాక్ లోకి వెళ్ళండి.. అందరికీ మన విషయం తెలియాలి కదా" అంటూ ఫ్యాన్ కేసి చూస్తూ అంది రాధ.
********
"అమ్మా..! మళ్ళీ పెళ్ళిచూపులా?"
"ఇప్పుడు కాకపోతే ఎప్పుడు రా రవి ..ఇప్పటికే నీకు ముందు ఒక ఎకరం పోయింది. తొంబై తొమ్మిది పెళ్ళిచూపులకి వెళ్లి, ఫెయిల్ చేసావు. కనీసం ఈ వందోది సక్సెస్ కాకపోతే, నీకు ఇక పెళ్ళికాదని ఒక స్వామీజీ చెప్పారు"
"మరి నాకు అమ్మాయి నచ్చాలి కదా..?"
"పదేళ్ళ నుంచి ఇలాగే అంటున్నావు. అప్పుడు అమ్మాయి ఎంత బాగున్నా, ఏదో వంకతో నో అనేసావు. ఇప్పుడు నీకు సంబంధం రావడమే గొప్ప. మళ్ళీ ఛాయిస్ కూడాను. నిన్ను ఆ అమ్మాయి రిజెక్ట్ చెయ్యకుండా చూసుకో. ఆ అమ్మాయి నో అందో, నేను అండమాన్ వెళ్ళిపోతాను.. ఇక కనిపించను.
"అంత మాట అనకే అమ్మా..! నాకు ఉన్నది నువ్వు మాత్రమే. అలాగే ట్రై చేస్తాను..దానికి నేను ఏం చెయ్యాలో చెప్పు"
"పెళ్ళిచూపులలో అమ్మాయి ఏది అడిగినా, షరతులు పెట్టినా, అన్నిటికి ఓకే చెప్పెయ్..తర్వాత చూసుకోవొచ్చు.. నీకు పెళ్లవడం ముఖ్యం"
"నీకోసం..అలాగే అమ్మా"
"నువ్వు నా బంగారం.."
***
మర్నాడు పెళ్ళిచూపులలో...
"అబ్బాయి బాగున్నాడు కానీ వయసెంతో..?" అడిగింది పెళ్ళికూతురు తల్లి.
"ఎంతోనా..? ఈ రోజుల్లో మా అబ్బాయి వయసుకి ఇంకా ఎవరూ పెళ్ళి గురించి కూడా ఆలోచించట్లేదు.. మావాడే ఇంకా తొందరపడుతున్నాడు"
"అమ్మాయి కలర్ తక్కువ ఉందే అమ్మా.." చెవిలో చెప్పాడు రవి.
"నేను చెప్పిన మాటలు గుర్తుపెట్టుకో..అండమాన్"
"గుర్తుంది! అలాగే..అలాగే"
"పెళ్ళికూతురు మీతో విడిగా మాట్లడాలంట.." అంటూ కబురు వచ్చింది.
"ఏవండీ! చెప్పండి" అన్నాడు రవి అమ్మాయితో.
"మీకు నేను నచ్చానా..?" అని మెల్లగా అడిగింది అమ్మాయి.
"మీకేమండీ సూపర్ గా ఉన్నారు" అని ముందుగా ప్రిపేర్ అయిన డైలాగ్ అనేసాడు రవి.
(ఏమి సూపర్..తప్పదు కదా నాకు..దీనికన్నా ముందు చూసిన తొంబై తొమ్మిది అమ్మాయిలే బెటర్ - రవి మైండ్ వాయిస్)
"మరి నేనో?" ఆత్రుతగా అడిగేసాడు రవి.
"మీకు ఇంతవరకు ఎందుకు పెళ్ళి కాలేదు..? ఇంతవరకు ఎంతమంది అమ్మాయిలని చూసారు?"
"మీలాంటి అమ్మాయి దొరకలేదు..మీకోసమే నాకు ఇంకా పెళ్ళి కాలేదేమో! నన్ను మీరు వందకు అవుట్ చేసేసారు" అన్నాడు రవి.
"లేకపోతే.. డబుల్ సెంచరీ చేస్తారా ఏమిటి..?" నవ్వుతూ అంది రాధ.
బయటకు వచ్చిన రవిని...
"అమ్మాయి లోపల ఏం మాట్లాడింది రా.?" ఆత్రుతగా అడిగింది తల్లి.
"అదా..! ఒక షరతు పెట్టింది"
"ఒప్పుకున్నావా?"
"'ఎస్' అనేసాను..ఇక నా పెళ్ళి ఏర్పాట్లు చేసుకోవడమే"
"ఇంతకీ ఏమిటో ఆ షరతు?"
"పెళ్ళైన తర్వాత..వారానికి ఒకసారైనా షాపింగ్ కి తీసుకుని వెళ్ళాలనేదే ఆమె షరతు.."
"ఎంత పని చేసావురా..! ఆడవారు ఇల్లులు కొనమన్నా కొనొచ్చు పర్వాలేదు.. కార్లు కొనమన్నా కొనచ్చు ఏమీ బాధలేదు. కానీ.. షాపింగ్ కి అసలే ఒప్పుకోకూడదు నాయనా! దేనికైనా ఒక లిమిట్ ఉంటుంది..కానీ ఆడవారి షాపింగ్ కు లిమిట్ అస్సలు ఉండదు. మీ నాన్న కూడా ఇలానే నాకు మాట ఇచ్చి, రెండెకరాలు నాకోసం అర్పించి, మధ్యలోనే మాట తప్పి పైకి పోయారు"
"నిజమా..!"
(అంటే, మీ ఆడవారంతా ఇంతేనా? - రవి మైండ్ వాయిస్)
"ఇప్పుడు నీకు ఈ సంబంధం వద్దంటే, నీకు ఎప్పటికీ పెళ్ళి కాదు..ఏం చేస్తాం? ఎలా జరిగితే అలా జరుగుతుంది.. నాలుగు అక్షింతలు వేసేస్తాను"
ఈ లోపు పెళ్ళికూతురు ఇంట్లో...
"రాధా! పెళ్ళికొడుకు సంబంధం ఓకే చేసాడంట… నీ షరతులకు ఒప్పుకున్నాడా.?" అడిగింది తల్లి.
"ఏమనుకున్నావు..! నా షరతులు చూసి ఎవరు నన్ను పెళ్ళి చేసుకోరు అన్నావుగా.."
"అవును..అందుకే తొంబై తొమ్మిది పెళ్ళికొడుకులు పారిపోయారు..ఇతను ఎలా ఒప్పుకున్నాడో?"
"అతనికీ ఇది వందో పెళ్ళిచూపులు.."
"హ్యాపీ గా సాగుతున్న అతని జీవితం వందకు అవుట్ చేసావా? అతని ఖర్మ..! నీ షాపింగ్ సునామీకి ఏమైపోతాడో అని భయంగా ఉందే! అసలే గంటకు ఒక చీర కట్టే నువ్వు, కొత్త మోడల్స్ అని చెప్పి..పెట్టని నగలు పెడతావు.. ఎలాగో ఏమిటో"
"చేసుకున్నాకా ఆయనకు తప్పదు" అంది రాధ నవ్వుతూ.
********
"ఫ్లాష్ బ్యాక్ లోంచి బయటకు రండి..ఇప్పుడు నా మొహం చూసి చెప్పండి" అంది రాధ భర్తతో.
"ఇంకేం చెబుతాను..అంత సినిమా చూపించిన తర్వాత!"
"రోజుకొక డిజైన్, కొత్త కొత్త మోడల్స్ మార్కెట్లోకి వస్తున్నాయి.. మీరు నాకు ఏమీ చెయ్యకపోయినా పర్వాలేదు, వారానికి ఒకసారి నన్ను షాపింగ్ కి తీసుకెళ్ళాలి.. బిల్ ఎంతైనా నన్ను ఏమీ అనకూడదు.. నవ్వుతూ కట్టేయ్యాలి. ఇదే కదా పెళ్ళిచూపులలో మీరు నాకు ఇచ్చిన మాట.. గుర్తుచేసుకోండి"
(వారానికి ఒకసారి షాపింగ్ అంటే, ఏ వందో, రెండు వందలో అవుతుందేమో.. ప్రతివారం కొనడానికి ఏమీ ఉండవు కదా అనుకున్నాను. అమ్మ చెప్పింది నిజమే! 'అమ్మా!నువ్వేమో రాధను నాకిచ్చి పెళ్ళి చేసి... స్వర్గంలో అయితే, పట్టు వస్త్రాలు ఉంటాయని నాన్న కలలో చెప్పారని పైన నాన్న దగ్గరకు వెళ్తున్నాను అని వెళ్ళిపోయావు.. ఇక్కడ నన్ను ఎవరు కాపాడుతారు? - రవి మైండ్ వాయిస్)
"వారానికి ఎంత బిల్ అవుతుందో తెలుసా..? ఎంత అప్పు చేయాల్సి వస్తుందో తెలుసా రాధా? దీనికన్నా మీ ఫ్రెండ్స్ లాగ పార్టీలే బెటర్ ఏమో.. కొంచం ఆలోచించు"
"ఎవరి రూట్ వారిది...నా రూటే సెపరేటు" అంది రాధ తన స్టైల్ లో
*********
తాత మోహనకృష్ణ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
యూట్యూబ్ లోకి అప్లోడ్ చేయబడ్డ తాత మోహనకృష్ణ గారి కథలకు సంబంధించిన ప్లే లిస్ట్ కోసం
విజయదశమి 2025 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం:
Profile Link:
YouTube Playlist Link:
నా పేరు తాత మోహనకృష్ణ. నాకు చిన్నతనం నుండి కథలంటే ఇష్టం. చందమామ, వార పత్రికలలో కథలు, జోక్స్ చదివేవాడిని. అలా, నాకు సొంతంగా కథలు రాయాలని ఆలోచన వచ్చింది. చిన్నప్పుడు, నేను రాసిన జోక్స్, కథలు, కొన్ని వార పత్రికలలో ప్రచురింపబడ్డాయి. నేను వ్రాసిన కధలు గోతెలుగు.కామ్, మనతెలుగుకథలు.కామ్ లాంటి వెబ్ పత్రికలలో ప్రచురింపబడ్డాయి. బాలల కథలు, కామెడీ కథలు, ప్రేమ కథలు, క్రైం కథలు రాయడమంటే ఇష్టం.
ధన్యవాదాలు
తాత మోహనకృష్ణ
Comments