కొత్త COVID అలర్ట్: ‘సికాడా’ వేరియంట్పై ప్రపంచ దృష్టి
- Dr. Krishna Kumar Vepakomma
- 2 days ago
- 3 min read
కొత్త వేరియంట్… కొత్త ప్రశ్నలు! భయపడకండి – కానీ నిర్లక్ష్యం చేయకండి.
జాగ్రత్తే ఉత్తమ రక్షణ.
New COVID Alert: Global Attention on the ‘Cicada’ Variant - Special Article | Dr. Krishna Kumar Vepepakomma - డా. కృష్ణ కుమార్ వేపకొమ్మ
కొత్త COVID అలర్ట్: ‘సికాడా’ వేరియంట్పై ప్రపంచ దృష్టి | ప్రత్యేక వ్యాసం | డా. కృష్ణ కుమార్ వేపకొమ్మ
Published in manatelugukathalu.com on 31/03/2026
కొవిడ్ మహమ్మారి జ్ఞాపకాలు ఇప్పటికీ పూర్తిగా చెదరిపోలేదు. ప్రపంచం మామూలు జీవితానికి తిరిగి వచ్చినట్టే అనిపిస్తున్నా, వైరస్ మాత్రం తన రూపాన్ని మార్చుకుంటూనే ఉంది. ఇలాంటి సమయంలో కొత్త వేరియంట్ గురించి వినిపించే ప్రతి వార్త సహజంగానే ఒక కలవరం రేపుతుంది. అలాంటి సందర్భంలోనే COVID-19 కు చెందిన కొత్త సబ్వేరియంట్ BA.3.2, “సికాడా” వేరియంట్గా ప్రపంచ దృష్టిని ఆకర్షిస్తోంది.
Centers for Disease Control and Prevention (CDC) విడుదల చేసిన తాజా అధ్యయనం ప్రకారం, 2026 ఫిబ్రవరి 11 నాటికి కనీసం 23 దేశాల్లో ఈ వేరియంట్ గుర్తించబడింది. ఈ వేరియంట్ అంతర్జాతీయంగా క్రమంగా వ్యాపిస్తున్నదనికి సంకేతాలు కనిపిస్తున్నాయి.అయితే, ఈ వేరియంట్ పూర్తిగా కొత్తది కాదు. 2024 నవంబరులో దక్షిణాఫ్రికాలోని ఒక శ్వాసకోశ నమూనాలో ఇది మొదట గుర్తించబడింది. అనంతరం క్రమంగా ఇతర దేశాలకు వ్యాపించింది. 2025 జూన్లో నెదర్లాండ్స్ నుంచి వచ్చిన ఒక ప్రయాణికుడిలో అమెరికాలో ఇది నిర్ధారించబడింది. అదే సంవత్సరం చివరికి డెన్మార్క్, జర్మనీ, నెదర్లాండ్స్ వంటి యూరప్ దేశాల్లో సీక్వెన్స్ చేసిన కేసుల్లో సుమారు 30 శాతం వరకు ఈ వేరియంట్ నమోదైంది.
ప్రస్తుతం ఈ వేరియంట్పై శాస్త్రవేత్తల దృష్టి ఎక్కువగా కేంద్రీకృతమవడానికి ప్రధాన కారణం దాని మ్యూటేషన్ల సంఖ్య. ప్రాథమిక విశ్లేషణల ప్రకారం “సికాడా” వేరియంట్లో సుమారు 75 మార్పులు ఉన్నట్లు అంచనా. ఇది JN.1 వంటి పూర్వ వేరియంట్లతో పోలిస్తే దాదాపు రెండింతలు ఎక్కువ. ముఖ్యంగా, ఈ మార్పుల్లో ఎక్కువ భాగం వైరస్లోని స్పైక్ ప్రోటీన్లోనే కనిపిస్తున్నాయి. ఈ స్పైక్ ప్రోటీన్ వైరస్ మన శరీర కణాల్లోకి ప్రవేశించేందుకు కీలకం. వ్యాక్సిన్ తీసుకున్నప్పుడు లేదా ముందు ఇన్ఫెక్షన్ వచ్చినప్పుడు శరీరంలో ఏర్పడే యాంటీబాడీలు ఈ స్పైక్ ప్రోటీన్ను లక్ష్యంగా చేసుకుని వైరస్ను ఎదుర్కొంటాయి.
ఈ అధిక మ్యూటేషన్ల కారణంగా BA.3.2 వేరియంట్ కొంతవరకు ఇమ్యూనిటీని తప్పించుకునే సామర్థ్యం కలిగి ఉండవచ్చని పరిశోధనలు సూచిస్తున్నాయి. ల్యాబ్ అధ్యయనాలు కూడా ఇందులో “ఇమ్యూన్ ఎస్కేప్” స్థాయి ఎక్కువగా ఉండే అవకాశం ఉందని సూచిస్తున్నాయి. అంటే వ్యాక్సిన్ తీసుకున్న లేదా గతంలో COVID బారిన పడ్డ వ్యక్తుల శరీరంలో ఉన్న యాంటీబాడీలు ఈ వేరియంట్ను పూర్తిగా నిరోధించడంలో కొంతవరకు తక్కువ ప్రభావం చూపవచ్చని తెలుస్తోంది.
ఈ పరిస్థితిని నిపుణులు జాగ్రత్తగా గమనిస్తున్నప్పటికీ, ప్రస్తుతం పెద్దగా ఆందోళన చెందాల్సిన అవసరం లేదని చెబుతున్నారు. ప్రపంచ ఆరోగ్య సంస్థ (WHO) ప్రకారం, ప్రస్తుతం అందుబాటులో ఉన్న వ్యాక్సిన్లు,యాంటీవైరల్ చికిత్సలు తీవ్రమైన అనారోగ్యాన్ని నివారించడంలో ఇంకా ప్రభావవంతంగానే ఉన్నాయి. అయితే ఈ మ్యూటేషన్ల అసలు ప్రభావం ఎంతవరకు ఉందో పూర్తిగా అర్థం చేసుకోవడానికి మరింత ప్రత్యక్ష సమాచారం అవసరమని శాస్త్రవేత్తలు భావిస్తున్నారు.
ఆరోగ్య నిపుణుల ప్రకారం, సాధారణ కోవిడ్ లక్షణాలతో పాటు ‘సికాడా’ వేరియంట్ కారణంగా తీవ్రమైన గొంతు నొప్పి, ముక్కు దిబ్బడ లేదా కారడం, నిరంతర దగ్గు, జ్వరం లేదా చలి వంటి లక్షణాలు ఎక్కువగా కనిపిస్తున్నాయి.అలాగే అలసట, ఒళ్లు నొప్పులు, తలనొప్పి వంటి సమస్యలతో పాటు కొందరిలో రుచి లేదా వాసన కోల్పోవడం కూడా గమనించబడుతోంది.
ఈ వేరియంట్కు సంబంధించిన లక్షణాలు, ఇప్పటివరకు లభ్యమవుతున్న సమాచారం ప్రకారం, ఇతర ఒమిక్రాన్ వేరియంట్ల మాదిరిగానే తేలికపాటివిగా కనిపిస్తున్నాయి. ఆసుపత్రి చేరికలు లేదా మరణాల రేటులో గణనీయమైన పెరుగుదల నమోదైనట్లు ఆధారాలు లేవు. ఎక్కువగా ఈ వేరియంట్ ప్రభావం దగ్గు, జలుబు వంటి సాధారణ లక్షణాలకే పరిమితమై ఉన్నట్లు కనిపిస్తోంది.
BA.3.2 వేరియంట్ మనకు ఒక ముఖ్యమైన విషయాన్ని గుర్తుచేస్తోంది; COVID వైరస్ ఇంకా పూర్తిగా ముగియలేదు, అది నిరంతరం మార్పులు చెందుతూనే ఉంది. అయితే ఇప్పటివరకు ఉన్న ఆధారాలు ఇది మరింత ప్రమాదకరమని సూచించట్లేదు. అందువల్ల భయపడాల్సిన అవసరం లేకపోయినా, నిర్లక్ష్యం చేయకుండా అప్రమత్తంగా ఉండటం, వ్యాక్సినేషన్ కొనసాగించడం, అవసరమైన జాగ్రత్తలు పాటించడం అవసరం. వైరస్ వ్యాప్తిని అడ్డుకోవడానికి తగిన జాగ్రత్తలు తీసుకోవాలని, ఇన్ఫెక్షన్ సోకకుండా చూసుకోవడమే అత్యుత్తమ మార్గమని వైద్యులు సూచిస్తున్నారు.
———————————
డా. కృష్ణకుమార్ వేపకొమ్మ
***
డా. కృష్ణ కుమార్ వేపకొమ్మ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx/docs రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం:
నమస్కారం,
నేను డా. వేపకొమ్మ కృష్ణకుమార్, జువాలజీ లో డాక్టరేట్ పొందిన విశ్రాంతి ప్రొఫెసర్; మాజీ ప్రిన్సిపల్. విద్యారంగంలో 30 సంవత్సరాల పైగా అనుభవం కలిగి, పుస్తక రచయిత, పరిశోధక, విద్యా నిపుణుడిగా సేవలందించాను. ప్రస్తుతం పలు ప్రముఖ పత్రికల్లో కాలమిస్టుగా సామాజిక, విద్యా, సమకాలీన అంశాలపై విశ్లేషణాత్మక వ్యాసాలు రాస్తూ ప్రజల్లో చైతన్యం కలిగిస్తున్నాను.
మీ సంస్థలో నా అనుభవాన్ని ఉపయోగించి గుణాత్మక, ఆసక్తికర వ్యాసాలు అందించగలనని తెలియజేయడం నాకు సంతోషంగా ఉంది.
డాక్టర్ కృష్ణ కుమార్ వేపకొమ్మ
ప్రొఫెసర్ & ప్రిన్సిపాల్ (రిటైర్డ్)
వార్తాపత్రిక కాలమిస్ట్
రాజీవ్ నగర్, హైదరాబాద్
#KrishnaKumarVepakomma #వేపకొమ్మకృష్ణకుమార్, COVID variant 2026, BA.3.2 cicada variant, covid symptoms latest, coronavirus new variant, omicron subvariant, WHO covid update |
Comments