క్షీరసాగర మథనము - 17
- T. V. L. Gayathri
- Mar 28
- 2 min read
Updated: Apr 3
#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KsheerasagaraMathanamu, #క్షీరసాగరమథనము, #తేటగీతి
(శ్రీమహా భాగవతపురాణము నుండి అనువాదము )
Ksheerasagara Mathanamu - 17 - New Telugu Poems Written By T. V. L. Gayathri
Published In manatelugukathalu.com On 28/03/2025
క్షీరసాగర మథనము - 17 - తెలుగు పద్యాలు
రచన: T. V. L. గాయత్రి
ఇక క్షీరసాగర మథనము - 17 చదవండి..
93.
వచనము.
తదనంతరంబున యధావిధిగ దైత్యులు, దేవతలు కూడి క్షీరసాగరమథనము
గావించుచుండగా.
94.
తేటగీతి.
వారుణీదేవి కన్యయై ప్రభవమొంద
నసురులద్దేవిని వరించి యభిషలించ
వారికడకేగి వారుణి వరములొసగ
సంతసించిరా సురలట సమధికముగ.//
తాత్పర్యము.
ఆ పాల సముద్రమునుండి వారుణీదేవి (ఒకరకమైన మోహము కలిగించే దేవత) పుట్టింది. ఆమెను చూచి రాక్షసులు ఆమె తమకు కావాలని కోరుకున్నారు. అలా ఆ వారుణీదేవి రాక్షసుల దగ్గరకు చేరి వరములిస్తూ ఉంటే వారంతా చాలా సంతోషించారు.//
95.
తేటగీతి.
దైత్యదేవతాగణములు తెరిపిలేక
జలధి మథియించుచుండగా జలమునుండి
దివ్య పురుషుడేతెంచెనా దిశలు వెలుగ
మునులు, సిద్ధులు భక్తితో మ్రొక్కుకొనిరి.//
తాత్పర్యము.
దేవతలు, రాక్షసులు విశ్రాంతి తీసికోకుండా పాలసముద్రాన్నిచిలుకుతూ ఉన్నారు.అప్పుడు ఆ పాలసముద్రమునుండి ఒక దివ్యమైన పురుషుడు దిక్కులందు వెలుగులు చిమ్ముతూ వచ్చాడు. అతడిని చూచి మునులు, సిద్ధులు భక్తితో మ్రొక్కుకున్నారు.//
96.
తేటగీతి.
అరుణవర్ణంపు నయనంబు లదరుచుండ
కంబుకంఠంబు కలవాడు కలిమిపంట
దీర్ఘభుజబల సంపన్న దివ్యతేజు
నల్ల నైనట్టి దేహంబు నవ్వుమొగము!//
తాత్పర్యము.
అతని కన్నులు ఎర్రగా ఉన్నాయి. శంఖము వంటి కంఠము కలవాడు. సిరులకు నెలవైనవాడు. అతని భుజములు పొడుగ్గా బలంగా ఉన్నాయి. నల్లని శరీరముతో అతడు దివ్యమైన తేజస్సుతో నవ్వుతూ ఉన్నాడు.//
97.
తేటగీతి.
సింహవిక్రముండాతడు శ్రీకరుండు
పీతవస్త్రమున్ ధరియించు పెద్దయతడు
రత్నకుండలంబులవాడు రహిని జిల్కు
సుందరంబగు మూర్తియా శోభనుండు.//
తాత్పర్యము.
సింహమువంటి పరాక్రమము కలవాడు. శుభమైనవాడు, పట్టువస్త్రాన్ని ధరించాడు. అందరికంటే పెద్దవాడు.అతని చెవులకున్న రత్నాల భూషణములు వెలుగుతో ప్రకాశిస్తూ ఉండగా సుందరంగా ఉన్నాడు.//
98.
తేటగీతి.
కంకణంబులు గల్గిన కరములందు
పసిడి కలశంబు చేకొని వచ్చియుండె
వేదవైద్యశాస్త్రంబుకు పెన్నిధియట
నంశరూపమై హరికి తా నలరుచుండె.//
తాత్పర్యము.
అతని చేతులకు కంకణములు ఉన్నాయి. ఆ చేతులతో ఒక బంగారు కళాశాన్ని పట్టుకొని వచ్చాడు. అతడు వేదవైద్యశాస్త్రమునకు ఆద్యుడు. అతడు విష్ణుమూర్తి అంశగా అవతరించాడు.//
99.
తేటగీతి.
యజ్ఞభోక్తగా నిల్చిన యగ్నిసముడు
ఘనుడు ధన్వంతరి యనుచు గౌరవించి
ప్రణతులర్పించి దేవతల్ ప్రాంజలించ
యోగిగణముల్ మ్రొక్కిరి సాగిలబడి.//
తాత్పర్యము.
అతడు యజ్ఞములలో హవిస్సును స్వీకరించే అగ్నిదేవునివంటివాడు. అతడే గొప్పవాడైన 'ధన్వంతరి 'అని దేవతలు భక్తితో నమస్కారములు చేయగా,అప్పుడు యోగిసమూహాలు సాగిలిబడి మ్రొక్కాయట//
(సశేషం )
టి. వి. యెల్. గాయత్రి.
పూణే. మహారాష్ట్ర.
Profile Link:
లలితమైన పదాలతోడి పద్యాలతో భావం విడిగా ఇవ్వకపోయినా అర్థం చేసుకునేందుకు వీలైనంత తీరున మీ రచన సాగించారు. ధన్యవాదములు తల్లీ