పల్లె పిలిచింది - 1

#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #పల్లెపిలిచింది, #PallePilichindi, #సీసం, #తేటగీతి, #కావ్యము

Palle Pilichindi - 1 - New Telugu Poem Written By T. V. L. Gayathri

Published In manatelugukathalu.com On 25/04/2025

పల్లె పిలిచింది - 1 - తెలుగు కవిత ప్రథమాశ్వాసము

రచన: T. V. L. గాయత్రి

పల్లె పిలిచింది.

(స్వతంత్ర కావ్యము )

ప్రథమాశ్వాసము

******************************

1.

సీసం.

ఆంధ్రదేశంబున కన్నపూర్ణగ వెల్గె 

రాజుపాలెంబను గ్రామమొకటి 

యారుకాలంబుల నాయూరి రైతులు 

జాతికై శ్రమియించ సమధికముగ

పాడిపంటలు పొంగ పశుగణంబులు పొర్ల 

పసిడి రాశులు నిండ పల్లె మురిసె 

కలిమితో గృహములు కళకళలాడంగ 

నూరిలోన జరుగు నుత్సవములు //

తేటగీతి.

సజ్జనాత్ములై నచ్చోటి జనులు కలసి 

భవ్యమైనట్టి ప్రగతికి బాటవేయ 

సకల మౌ వృత్తులఁ జనులు జయముఁ బొంద 

కళలకాణాచిగా నూరు ఖ్యాతి బడసె.//

తాత్పర్యము.

ఆంధ్రదేశంలో రాజుపాలెము అనే ఊరు ఉంది. ఆ ఊరిలో చక్కగా పంటలు పండుతాయి. పాడిపంటలతో, పశుసంపదతో ఆ ఊరు కళకళలాడుతూ ఉంటుంది. ఆ ఊరిలోని ప్రజలందరూ చాలా మంచివాళ్ళు. కష్టపడే మనస్తత్వం కలవాళ్లు. వారి వారి కులవృత్తులు చేసుకుంటూ ఆ ఊరి ప్రజలు దేశప్రగతికి తోడ్పడుతుంటారు. సకల కళలకు కాణాచిగా ఆ గ్రామము ప్రసిద్ధిపొందింది.//

2.

సీసం.

ఎడ్లపందాలలో నెదురన్నది కనని 

కోడెగిత్తల జోరు గుబ్బతిల్ల

కబడీ కబడియని గంతులు వైచుచు 

యువత చెల్గెదరు తా ముద్యమించి 

బిళ్ళగోడులనాడి పిల్లవాండ్రు సతము

 విస్మరింతు రహహ!వేళలెపుడు!

కోలాటములు వేయు కుఱ్ఱకారును గాంచి 

పెద్దలు దీవింత్రు ప్రీతిమీర //

తేటగీతి.

రచ్చబండను జేరిన ప్రాజ్ఞులచట 

మంచి చెడ్డలన్ వీక్షించి మానితముగ

తగిన సలహాల నందించి దారిచూప

ప్రభుతనడుపుదురా గ్రామ పాలకతతి//

తాత్పర్యము.

పెద్దవాళ్ళు ఎడ్ల పందాలు, కోలాటం ఆడుతూ ఉంటే, పిల్లలు కబడీ, బిళ్ళగోడులాంటి ఆటలు ఆడుతుంటారు. ఆ పిల్లల్ని చూచి పెద్దవాళ్ళు కుర్రవాళ్ళను ముద్దుగా దీవిస్తూ ఉంటారు. ఆ ఊరి రచ్చబండను చేరి పెద్దవాళ్ళు గ్రామ పరిస్థితుల్ని ఎప్పటికప్పుడు చర్చిస్తూ, చక్కగా ప్రభుత్వాన్ని నడుపుతూ ఉంటారు.//

3.

తేటగీతి.

కలిమితో విలసిల్లెడి గ్రామమందు 

వేదవిద్యల నేర్పెడి విబుధవరులు 

గురుకులంబులు నడుపంగ కూర్మితోడ 

చదువుకొనుచుందు రా యూరి ఛాత్రులెపుడు.//

ఆ ఊరిలో అందరూ ధనవంతులే. గురుకులాన్ని నడుపుతూ అక్కడి పండితులు పిల్లలకు వేదవిద్యలు నేర్పిస్తూ ఉంటే అక్కడి విద్యార్థులు శ్రద్ధగా చదువుకొంటూ ఉంటారు.//

4.

తోవకము.

న, జ జ, య.

యతి -8.

వణిజులు సల్పగ వర్తక మెల్లన్ 

ఘనమగు సంపద గ్రామము గాంచెన్ 

ధనకనకంబులు దండిగ రాగా 

జనులట పొందిరి శాంతిశుభంబుల్.//

తాత్పర్యము.

ఆ గ్రామము నందు ఉన్న వర్తకులు చక్కగా వ్యాపారాలు చేస్తూ ఉంటారు. అలా ఆ సంపన్న గ్రామములోని జనులు శాంతి,శుభాలతో విలసిల్లారు.//

5.

కందం.

అరుగులు కల గేహములట 

నిరతముదానములుసల్పునియతిసుశీలుర్

పురుషోత్తములు కలరచట

మరియాదనుజూపుచుండిమసలెడి వారల్.//

తాత్పర్యము.

ఆ గ్రామములో ప్రతి ఇంటికి పెద్ద పెద్ద అరుగులు ఉంటాయి. ఆ ఊరి ప్రజలు దానశీలురు. వారంతా చాలా మర్యాదస్తులు.మంచివాళ్ళు.//

పల్లె పిలిచింది పార్ట్ 2 కోసం ఇక్కడ క్లిక్ చేయండి.

టి. వి. యెల్. గాయత్రి.

పూణే. మహారాష్ట్ర.

Profile Link:

https://www.manatelugukathalu.com/profile/tvlgayathri