జెండా సందేశం

#TeluguPoems, #GadwalaSomanna, #గద్వాలసోమన్న, #JendaSandesam, #జెండాసందేశం, #సోమన్నగారికవితలు, #బాలగేయాలు

సోమన్న గారి కవితలు పార్ట్ 110

Jenda Sandesam - Somanna Gari Kavithalu Part 110 - New Telugu Poem Written By Gadwala Somanna Published In manatelugukathalu.com On 18/08/2025

జెండా సందేశం - సోమన్న గారి కవితలు పార్ట్ 110 - తెలుగు కవితలు

రచన: గద్వాల సోమన్న

జెండా సందేశం

------------------------

మువ్వన్నెల జెండా

ముచ్చటైన జెండా

నింగిలో స్వేచ్ఛగా

ఎగిరే ఘన జెండా

భారతమ్మ ఖ్యాతిని

అంతులేని నీతిని

బోధించే జెండా

తలపించును జ్యోతిని

పైపైకి ఎగురుతుంది

ఎదగమని నేర్పుతుంది

జెండా సందేశం

అది అందరి కోసం

తెల్లని హృదయాలను

పచ్చని జీవితాలను

ఉండాలని కోరిక

ఎరుపులాంటి త్యాగమును

ఆలోచించు కొంచెం!

---------------------------------------

స్ఫూర్తినిచ్చు మాటలతో

మేలు చేయు చేతలతో

నలుగురికి సాయపడుతూ

బ్రతకాలోయ్! ప్రేమతో

గురుదేవుల నీడలో

విజ్ఞాన వీధిలో

ముందడుగు వేయాలోయ్!

అభివృద్ధి త్రోవలో

కన్నవారి సేవలో

వారి గొప్ప మనసులో

ప్రథమ స్థానముండాలి

ఆదర్శం చూపాలి

ఉల్లాసపు ఓడలో

మమకారపు మేడలో

హాయిగా ఉండాలోయ్!

అమూల్యమైన చెలిమిలో

ప్రణమిల్లి మ్రోక్కాలి

--------------------------------------

ఎగురుతుంది మన జెండా

గౌరవించు మది నిండా

సమర యోధుల త్యాగాలు

స్మరించు తప్పకుండా

సాధించిన ఘన స్వేచ్ఛకు

పర పాలన ముగింపుకు

సాక్ష్యమే ఈ జెండా

అయింది మన అజెండా

ఆంగ్లేయుల చేతిలోన

వేసిన చెరసాలలోన

బలియైపోయిన అమరులకు

జోహార్ వారి మనసులకు

స్వాతంత్ర్య ఉద్యమానికి

ఊపిరి పోసిన వనితలకు

కృతజ్ఞతలు తెలపాలి

ఇల ప్రణమిల్లి మ్రోక్కాలి

చిన్నారుల ఆకాంక్ష

--------------------------------------

తెలుగు పాట పాడుతాం

వెలుగు బాట సాగుతాం

మువ్వన్నెల జెండాను

కలసి ఎగరవేస్తాం

త్యాగధనుల సేవలు

వారికున్న విలువలు

నెమరువేసుకుంటాం

మదిని దాచుకుంటాం

అమర వీరుల స్ఫూర్తిని

సమరయోధుల కీర్తిని

జగతిలోన చాటుతాం

ప్రగతిలోన నడుస్తాం

గుండెలో దేశభక్తి

నిలువెల్లా అనురక్తి

నిండుగా నింపుకుంటాం

పండుగ చేసుకుంటాం

చులకన భావన వద్దు

--------------------------------------

చిన్నవని చులకనగా

ఏమాత్రం చూడకు

అవసరాన గొప్పగా

అవే కన్పించు తుదకు

గడ్డి పోచలొకటైతే

మదపుటేనుగునైనా

బంధించ సాధ్యమే

ఈ సత్యము విదితమే

చీమలైనా కూడా

సర్పాన్ని చంపగలవు

గాంచుము తప్పకుండా

నిజాలెన్నో కలవు

ప్రతిదీ సృష్టిలోన

పనికి వచ్చును సదా

యోచించు మనసులోన

ఏదీ కాదు వృథా

-గద్వాల సోమన్న

https://www.manatelugukathalu.com/profile/somanna