కాగితపు పడవలు

#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #KagithapuPadavalu, #కాగితపుపడవలు, #కలముబలము, #తేటగీతి

గాయత్రి గారి కవితలు పార్ట్ 23

Kagithapu padavalu - Gayathri Gari Kavithalu Part 23 - New Telugu Poems Written By T. V. L. Gayathri Published In manatelugukathalu.com On 29/05/2025

కాగితపు పడవలు - గాయత్రి గారి కవితలు పార్ట్ 23 - తెలుగు కవితలు

రచన: T. V. L. గాయత్రి

కాగితపు పడవలు

(కవిత )

**********************************

చిరుజల్లులప్పుడే చిటపటా రాలాయి

మురిసిపోవుచు పల్లె భూములట తడిశాయి

నల్లనౌ మేఘాలు నలువైపులా చేర

చల్లనౌ వాయువులు సాయముగ వచ్చాయి

నెమలి బృందంబులట నెనరుతో నాడగా

సమతతో వృక్షాలు  స్వాగతించేశాయి

వీధి గుమ్మాలకడ వేడుకగ నిలుచుండి

చిన్న పిల్లలు కలిసి చిందులేస్తున్నారు

కాగితపు పడవలను గబగబా చేయుచూ

వేగముగ నీటిలో విడిచిపెట్టేశారు

అదిగదిగొ నా పడవ అక్కడే ఉందంటు

ముదముతో పిల్లలట పొంగిపోతున్నారు

పళ్ళాలతో పునుగు బజ్జీలు పట్టుకొని

తల్లులా సమయాన తరలివచ్చేశారు

గోలచేసెడి చిన్నకుర్ర వాళ్లందరూ 

చాలు నీ యాటలని చల్లగా వచ్చారు

చిరుతిండి తినుచుండి చెలిమితో మెలిగారు

మరికొంత సేపటికి మరల పరిగెత్తారు

వానమ్మ పిల్లలను వాత్సల్యముగ చూచి

కూనలను మురిపించ గొప్పగా కురిసింది.//

************************************

కలము - బలము 

(తేటగీతి పద్యమాలిక )

కలముఁ గనుగొన్న మానిసి క్షణములోన 

వ్రాయ సాగెను తనకథ వైభవముగ

కథలు కబురులు కావ్యాలు కాలగతిని 

బూర్జ పత్రాలపై నిల్చె పుడమి యందు.

బలము కల్గిన వారలు ప్రభువు లగుచు 

కలము పట్టిన జాతికి గౌరవంబు 

నొసగి పోషింప కవులెల్ల నుర్విపైన 

వ్రాయ సాగిరి తమయొక్క ప్రతిభ జూపి 

ప్రభుత చేసెడి తప్పులన్ ప్రజల కెపుడు

తెలియ పరుచంగ కవులకు విలువ పెరిగె

క్రూరమతులగు రాజులన్ గూల ద్రోయ

కలము మారెను పదునైన కత్తి వోలె

విబుధ వరులకు దొరికె నీ పెన్నిధి యన

వివిధ కాలము లందున పృథ్వి పైన

మార్పు చెందుచు లేఖిని మనుజ తతికి

బంధు వాయెను సతతము బలము నిడుచు

కాగితంబుపై వ్రాయగా కలముతోడ

జగతి యందున కార్యముల్ సాగుచుండు

నలువ రాణికి రూపమీ కలము యనుచు

ప్రాంజలింతురు ప్రజలెల్ల భక్తిమీర//

*******************************

టి. వి. యెల్. గాయత్రి.

పూణే. మహారాష్ట్ర.

Profile Link:

https://www.manatelugukathalu.com/profile/tvlgayathri