మోసం
- Sudha Vishwam Akondi
- May 30
- 5 min read
Mosam- New Telugu Story Written By Sudhavishwam Akondi
Published In manatelugukathalu.com On 30/05/2025
మోసం - తెలుగు కథ
రచన: సుధావిశ్వం ఆకొండి
నారాయణ, మాలతి దంపతులది లోయర్ మిడిల్ క్లాస్ ఫ్యామిలీ. నారాయణ ఓ పేరున్న కాలేజీలో ఆఫీస్ అసిస్టెంట్ గా పని చేస్తున్నాడు. మాలతి గృహిణి. భర్త జీతం అంతంత మాత్రం అవ్వడంతో తనకు తెలిసిన టైలరింగ్ పని చేస్తూ వేన్నీళ్లకు చన్నీళ్లుగా కొంత సంపాదిస్తోంది. వచ్చిన డబ్బు పొదుపుగా వాడుకుంటూ, ఆడపిల్లలు అయినా పిల్లలిద్దరినీ చదివిస్తున్నారు.
వారి పిల్లలు సమత, సవిత. ఇద్దరు అక్కాచెల్లెళ్ళు చక్కగా చదువుకుంటున్నారు. సవిత డిగ్రీ చదువుతోంది. సమత డిగ్రీ పూర్తి చేసింది. ఆ తర్వాత పై చదువులు చదవడానికి మొత్తం భారం తండ్రిపై వేయకూడదని అనుకుని, తల్లిదండ్రులను ఒప్పించి, ఓ చిన్న ప్రయివేటు కంపెనీలో క్లర్క్ గా ఈ మధ్యే చేరింది.
ఆ కంపెనీ యాజమాన్యం తను చదువుకోడానికి వెసలుబాటుగా టైమింగ్స్ ఇచ్చారు సమతకు. దాంతో ఆ వచ్చే డబ్బులతో ఫీజులు కట్టుకోవచ్చు అనుకుంది.
అలా ఓ నెల గడిచిపోయింది. జీవితంలో మొట్టమొదటి శాలరీ అందుకున్న సమతకు చాలా ఆనందం కలిగింది.
కాలేజీ నుంచి వస్తూ, అక్క ఆఫీసుకు వచ్చింది సవిత. ఒక్కోసారి క్లాస్ లేట్ అయినప్పుడు, అక్క ఆఫీసుకు వస్తుంది. ఇద్దరూ కలిసి ఇంటికి వెళతారు.
ఆ రోజు కూడా అలాగే వచ్చింది.
"అక్కా! అయిపోయిందా? ఇంటికి వస్తున్నావా?" అని అడిగింది.
"వర్క్ అయిపోయింది. వస్తున్నా! వుండు" తన టేబుల్ సర్దుకుని, మేనేజర్ కు చెప్పి, బయలుదేరింది.
బయటకు రాగానే..
"సవీ! ఇవ్వాళ నాకు జీతం వచ్చిందే! నా జీవితంలో నే మొట్టమొదటి జీతం కదా! చాలా హ్యాపీగా ఉంది. ఈ జీతంలో అమ్మకు, నాన్నకు బట్టలు తీసుకుంటాను. నీకో మంచి డ్రెస్ తీసుకుంటా! షాపింగ్ కి కోఠి వెళదామా! అమ్మకు ఫోన్ చేసి ఫ్రెండ్ ఇంటికి వెళ్లి, వస్తామని చెబుదాం. తర్వాత సర్ప్రైజ్ చేద్దాం! ఏమంటావ్?" అన్నది సమత.
"మంచి ఐడియా! కానీ అమ్మకు, నాన్నకు తీసుకోగా మిగిలిన డబ్బులకు తగ్గ విధంగా, ఇద్దరం తీసుకుందాం డ్రెస్సులు. అయితేనే ఓకే!" అన్నది.
"అలాగేలే! అమ్మకు కాల్ చేస్తానుండు" అని ఆఫీసు నుంచి పక్కింట్లో ఆంటి ఇంటికి కాల్ చేసి, తల్లిని పిలిపించి మాట్లాడారు. ఫ్రెండ్ ఇంటికి వెళ్లి వస్తామని చెప్పి, కోఠీ బయలుదేరారు.
సిటీ బస్ ఎక్కి కోఠీ చౌరస్తాలో దిగారు. అక్కడ్నుంచి రెండు వైపులా షాప్స్. రకరకాల షాప్స్ ఏమేమో ఆఫర్స్ తో. జ్యుయలరీ షాప్స్, బాగ్స్ షాప్స్. అలా అన్నీ వింతగా చూస్తూ నడుస్తున్నారు.
నడుస్తుంటే కొందరు కుర్రాళ్ళు పై పైకి వస్తూ..
"మా షాప్ లోకి రండి మేడమ్! మంచిగున్నాయి. తక్కువ రేటు" అంటూ రేటు చెబుతూ అరుస్తున్నాడు.
"ఇలా పైకి వస్తున్నారేమే! ఇంత తక్కువ రేటా!" అన్న సమతతో
"అక్కా! ఇక్కడ ఇలాగే వస్తారట. నా ఫ్రెండ్ చెప్పింది. వాళ్ళను పట్టించుకోకుండా నచ్చిన షాప్ వచ్చినప్పుడు వెళ్లి, చూద్దాం"
అక్కాచెల్లెళ్ళు షాపింగ్ కు రావడం ఇదే మొదటిసారి. ఎప్పుడూ వాళ్ళ అమ్మనే మెటీరియల్ తీసుకుని కుట్టి ఇస్తే వేసుకునేవాళ్ళు.
'నవ్య షాపింగ్ సెంటర్' పేరుతో ఉన్న షాప్ చూసారు. పట్టులా వుండే సిల్క్ శారీస్ బొమ్మలకు కట్టి, కనిపిస్తున్నాయి.
అది చూసి..
"అక్కా! ఇక్కడ చూద్దామా?"
"చాలా రేట్ వుంటుందేమోనే! మన డబ్బు సరిపోదు"
"అసలు ఊరికే అడిగేసి, ఎక్కువ రేట్ ఉంటే నచ్చలేదని వచ్చేద్దాం. అంతే! సింపుల్" అని తేల్చింది సవిత.
సరేననుకుని వెళ్లారు. షాప్ చూడడానికి చాలా బాగుంది.
ఆ షాప్ కు ముందు కొన్ని మెట్లున్నాయి. పక్కన ఉన్న షాప్స్ కన్నా కొంచెం హైట్ లో కట్టినట్టున్నారు. ఆ మెట్ల వద్ద ఓ కుర్రాడు నిల్చుని కస్టమర్లని పిలుస్తూ అరుస్తున్నాడు. వీళ్ళు కనిపించగానే..
"రండి మేడమ్! లేటెస్ట్ ఫ్యాషన్స్ వచ్చాయి. అన్నీ తక్కువ ధరకే" అని అంటున్నాడు.
మెట్లెక్కి లోపలికి అడుగుపెట్టారు..
ఒక్కొవైపు ఒక్కో రేటుతో ఉన్నాయి. డ్రెస్ మెటీరియల్, శారీస్ మొదలైన ఆడవాళ్ళ డ్రెస్సెస్ అన్నీ ఉన్నాయి.
అన్నీ చూస్తూ వెళుతున్నారు.
"ఏ టైప్ డ్రెస్సెస్ కావాలి? ప్యాంటు, టాప్స్ కావాలా? మామూలు డ్రెస్ నా? మెటీరియల్ నా?" అడుగుతున్నాడు సేల్స్ మాన్
"ముందు అమ్మకు శారీస్ చూద్దామా?" అన్నది లోగొంతుకతో సమత సవితతో
"ఓకే అక్కా!. ముందు అసలు ఇదేం మెటీరియల్? ఇలా అడగాలి. తర్వాత రేటు అడిగి, మన బడ్జెట్ లో రాకపోతే, అటు ఇటు తిప్పి చూసి, కలర్ బాలేదని, ఏదో ఒకటి చెప్పి వెళ్లిపోదాం" అంది సవిత
అంతా కొత్తగా ఏదోలా ఉంది సమతకు. తన చేతిలోని పర్సు గట్టిగా పట్టుకుని ఆ టేబుల్ వద్దకు వెళ్ళింది.
"శారీస్ చూస్తారా? రండి! మీకేనా? మంచి శారీస్ ఉన్నాయి. హీరోయిన్స్ కట్టినవి ఉన్నాయి" వీళ్ళ బెరుకు చూసిన ఆ షాప్ వాడు చెప్పుకు పోతున్నాడు
సవిత కూడా ఆ టేబుల్ వద్దకు వెళ్లి,
"మా అమ్మకోసం తీసుకోవాలి. మంచి శారీస్ చూపించండి! చాలా బాగుండాలి!" అన్నది
"మంచి కలర్స్ ఉన్నాయి. మంచి శారీస్. మీకే కాదు. మీ అమ్మకూ నచ్చుతుంది" అంటూ గబగబా శారీస్ ఓపెన్ చేసి ఆ టేబుల్ పైన పరిచి చూపిస్తున్నాడు.
కొన్ని కలర్స్ చాలా బావున్నాయి. ఇద్దరికీ నచ్చాయి. ఓసారి మనసులోనే డబ్బులు లెక్కకట్టుకున్నారు.
వాళ్లకు నచ్చిన శారీస్ 2000 రూపాయలు చెప్పాడు.
'బేరం చేస్తే 1500 కి ఇవ్వొచ్చు. నాన్నకు ప్యాంటు, షర్ట్ వస్తుందిలే! తర్వాత తమకు చూసుకోవచ్చు' అని మనసులో లెక్కలు వేసుకుంది సమత
ఉత్సాహంగా..
"ఈ టైప్ శారీస్ అన్నీ పక్కన పెట్టండి. కలర్ సెలెక్ట్ చేసుకుంటాం! కానీ 1500కి ఇస్తేనే తీసుకుంటాం!" అన్నది
అక్క వైపు చూసింది సవిత. 'పర్లేదు' అని సైగ చేసింది.
"కలర్స్ చూడవే! అమ్మకు ఏది బావుంటుంది? ఈ బ్రైట్ కలర్ తీసుకుందామా? లైట్ కలర్ తీసుకుందామా?"
సవిత అన్నీ చెక్ చేయసాగింది, తన ఫ్రెండ్స్ చెప్పిన విషయాలు గుర్తు తెచ్చుకుంటూ.
కొద్దిసేపటికి బ్రైట్ కలర్స్ లో పింక్ కి గోల్డెన్ బార్డర్ తో చిన్న చిన్న పువ్వులతో అందంగా అనిపించింది. అది సెలెక్ట్ చేసుకున్నారు.
"ఇది తీసుకుంటాం కానీ 1500 రూపీస్ కి ఇవ్వండి" అన్న సమతతో
ఆ దుకాణాదారు..
"అలాగే! తీసుకోండి! అంత తక్కువ ఇవ్వం కానీ, సాయంత్రం బోణీ, కస్టమర్లు మళ్లీ రావాలని ఇస్తున్నాం. అమౌంట్ ఇవ్వండి!" అని ప్యాక్ చేసివ్వమని సేల్స్ మేన్ కి చెప్పాడు
సరేనని చూసుకునేసరికి, సమత చేతిలో పర్స్ లేదు. గుండె గుభిల్లుమంది.
అందులోనే ఈరోజు తీసుకున్న 5000 జీతం ఉంది. ఇంకా ఏవో చిల్లర ఇంటికి, ఆఫీసుకు వెళ్ళడానికి. సెల్ ఫోన్ తీసుకోలేదు, అదో ఖర్చు అనుకుని. కంపెనీ వాళ్ళు ఫోన్ ఇవ్వలేదు. బస్ పాస్, క్యాష్ మాత్రం ఉన్నాయి. ఇంతే కదా అని చేతిలో పట్టుకునే పర్స్ మాత్రమే వాడుతుంది.
సవిత కాలేజీ బ్యాగ్ ఉంది. కానీ షాపింగ్ అప్పుడు తీయడం కష్టం అని పర్స్ చేతిలోనే పట్టుకుంది. శారీస్ చూస్తున్నప్పుడు టేబుల్ పైన తన పక్కనే పెట్టుకుంది.
"అయ్యో! నా పర్స్.. నా పర్స్ పోయింది. కౌంటర్ కు అటు పడిందేమో చూడండి!" అంది భయంగా
"ఏమీ పడలేదు మేడమ్! చూసుకోండి! అయినా మీరు అడిగారని చూస్తున్నా!" అంటూ అటు ఇటు చూసి లేదన్నాడు సేల్స్ మేన్
"అయ్యో! నేనిక్కడే పెట్టాను. ఇక్కడే ఎక్కడో పడాలి. బస్ పాస్, డబ్బులు అందులోనే ఉన్నాయి. సరిగ్గా చూడండి!" అంది సమత లోపల్నుంచి ఏడుపు తన్నుకొస్తోంది.
"నువ్వే తీసావా? సరిగ్గా చూడు. ఇక్కడే పెట్టింది ఎలా, ఎక్కడ పోతుంది?"అని దబాయించింది సవిత.
"మా షాప్ ఒక్కటే ఉందా? ఇక్కడికి వచ్చిన వాళ్ళు అన్ని షాప్స్ చూసుకుంటూ వస్తారు. ఏ షాప్ లో పోగొట్టుకున్నారో? అన్ని షాప్స్ తిరిగి చూసుకోండి!" అన్నాడు వాడు పెడసరంగా.
"నువ్వే తీసి ఉంటావు. అందుకే ఇలా అంటున్నావు" అంటూ గట్టిగా అరిచింది సవిత.
ఇంతలో ఆ షాప్ ఓనర్ వచ్చాడు అక్కడికి.
"ఏమైందిరా?" అన్నాడు సేల్స్ మెన్ తో.
"సార్! వీళ్ళు శారీస్ సెలెక్ట్ చేసుకొని, డబ్బు కట్టేయమంటే, పర్స్ పోయింది అంటున్నారు. నేనే తీసానంటున్నారు"
"అదేంటమ్మా! మా వాడు అలాంటి వాడు కాదు. ఎక్కడ పడేసుకున్నారో చూసుకోండి!"
"లేదండీ! ఇక్కడే టేబుల్ పై పెట్టాను. శారీస్ సెలెక్ట్ చేసి, చూసుకునేసరికి లేదు. అందులో నా శాలరీ, బస్ పాస్ ఉన్నాయి. అవి పోతే వెళ్లడమే కష్టం" అంటుంటే కళ్ళల్లో నీళ్ళు తిరిగాయి సమతకు.
"చూడరా" అని
"లేదంటున్నాడు కదమ్మా! ఈ డబ్బులు తీసుకో! బస్సుకు డబ్బులు లేవంటున్నావు" అంటూ ఓ 50 రూపాయలు ఇవ్వబోయాడు.
కోపంతో సవిత ఏమో అనబోగా వద్దని లాక్కుని బయటకు వచ్చింది.
"ఒకవేళ వేరే షాప్ లో వదిలి వేశానా? చూద్దామా!"
"మనం వేరే షాప్ కి వెళ్లలేదే! షాప్ ముందు నుంచి నడిచాం. అంతే! వాడే కొట్టేసాడు. అందుకే అలా నోరు పారేసుకున్నాడు. ఏదో సాయం చేసేవాడిలా బిల్డప్ ఇచ్చాడు" అంది కోపంగా.
"ఏం చేస్తాము! మనం గొడవ పెట్టుకున్నా వాడు ఇవ్వడు. అందరూ వాడి వైపు మాట్లాడతారు" అన్నది.
"ఒక ఐదు నిముషాలు అటు షాప్స్ వైపు అలా నడిచి, మళ్లీ ఇటు వద్దాం! దేవుడి దయ వల్ల ఏదైనా దారి దొరకొచ్చు" అని సవిత అనగానే సరేనంది.
*****
సమత, సవిత మళ్లీ మొదట చూసిన 'నవ్య షాపింగ్ సెంటర్' వద్దకు వస్తున్నారు. మళ్లీ ఏదో గొడవ కనిపించింది.
ఒకావిడ ఆ షాప్ వాడి కాలర్ పట్టుకుని నాలుగు దెబ్బలు వేసింది. ఆవిడ ఎవరో ఒడ్డూ పొడుగూ బావుంది. చీర కట్టుకుని ఉంది. చేతిలో కర్ర పట్టుకుని ఉంది. ఆమెతో పాటు ఇంకో ఇద్దరూ వున్నారు.
దగ్గరకు వెళ్లి చూసారు.
"ఏరా! షాప్ పెట్టుకుని, న్యాయంగా అమ్మకుండా, షాపింగ్ చేయడానికి వచ్చిన లేడీస్ పర్సులు, బ్యాగులూ కొట్టేసి, డబ్బులు దొబ్బేస్తున్నావు. ఇప్పటికే చాలా కంప్లైంట్స్ వచ్చాయి మాకు. పదా! పోలీస్ స్టేషన్ కు" అంటోందావిడ.
అది విని, వెంటనే అక్కాచెల్లెళ్ళు ఆవిడ దగ్గరకు పరుగెత్తారు.
"మేడమ్! ఓ పది నిముషాలు క్రితం మా పర్స్ కూడా కొట్టేసాడు. అది ఇప్పించండి. నా మొదటి జీతం డబ్బులు, బస్ పాస్ ఉన్నాయి. జాబ్ చేసుకుంటూ చదువుకుంటున్నాను. మొదటిసారి జీతంతో అమ్మకు శారీ కొనాలని ఇటు వచ్చాను చెల్లితో కలిసి. వీళ్ళు కొట్టేశారు" అంది ఏడుపు వస్తుండగా
"ఏరా! నిజమేనా! తియ్యి పర్స్! పాపం ఆడపిల్లల పర్స్ కొట్టేస్తావా? " అని మరో నాలుగు లాఠీ దెబ్బలు తగిలించింది.
వెంటనే ఆ సేల్స్ మేన్ తెచ్చి ఇచ్చాడు. అది చూసి కళ్ళు మెరిసాయి.
"ఇది నాదే మేడమ్ పర్స్"
"అన్ని ఉన్నాయో లేవో చూసుకోమ్మా!"
గబగబా ఓపెన్ చేసి చూసింది. అన్నీ ఉన్నాయి.
"హమ్మయ్య! థాంక్స్ మేడమ్! టైమ్ కు దేవతలా వచ్చారు" అని దండం పెట్టింది.
"గాడ్ బ్లెస్ యూ మా! జాగ్రత్తగా ఉండాలి ఎప్పుడూ" అని..
"చూడరా! చిన్న పిల్లలు జాబ్ చేసుకుంటూ చదువుకుంటూ, పేరెంట్స్ కు హెల్ప్ చేస్తున్నారు. బేవార్స్ గా తిరగడానికి ఇలా డబ్బులు సంపాదించాలని చూస్తున్నారు మీరు" అని నాలుగు ఉతికి ఆ షాప్ సీల్ చేయించి, వాళ్ళను పోలీసు స్టేషన్ కు తీసుకెళ్లింది.
ఆ తర్వాత మరో మంచి షాప్ లోకి ధైర్యంగా అడుగుపెట్టి, అమ్మకు చీర, నాన్నకు ప్యాంటు, షర్ట్, వాళ్లకు సింపుల్ చూడీదార్స్ తీసుకుని ఇంటికి బయలుదేరారు అక్కాచెల్లెళ్ళు.
మోసం చేస్తే, ఎప్పుడో ఒకప్పుడు బయటపడుతుంది. దాని పాప ఫలితం అనుభవించాల్సి వస్తుంది. అందుకే ఎప్పటిలా ఎంతో చాకచక్యంగా చీరలు చూపిస్తూనే టేబుల్ పై పరుస్తూ, బ్యాగ్ ను కవర్ చేసి, కిందకు లాగేసి బ్యాగ్ కొట్టేద్దామని ప్రయత్నించాడు. కానీ పోలీసులకు దొరికిపోయాడు.
-సుధావిశ్వం
Comments