నీ పాపం పండెను నేడు

#NallabatiRaghavendraRao, #నల్లబాటిరాఘవేంద్రరావు, #నీపాపంపండెనునేడు, #NeePapamPandenuNedu, #TeluguComedyStories, #తెలుగుహాస్యకథలు

నీ పాపం పండెను నేడు నీ భరతం పడతా చూడు

మంచి సరదా కథ

Nee Papam Pandenu Nedu - New Telugu Story Written By - Nallabati Raghavendra Rao Published In manatelugukathalu.com On 28/08/2025

నీ పాపం పండెను నేడు - తెలుగు కథ

రచన: నల్లబాటి రాఘవేంద్ర రావు

ప్రముఖ రచయిత బిరుదు గ్రహీత

కథా పఠనం: మల్లవరపు సీతారాం కుమార్

కార్తీక మాసం సందర్భంగా నీకు మంచి చీర కొనాలి అనుకుంటున్నానోయ్.. " అన్నాడు రవి భార్య లలితను వాటేసుకుంటూ. 

"ఒక్కసారి వదలండి".. అంటూ విడిపించుకుని బయటికి వెళ్లి చూసి వచ్చింది.. లలిత. 

"అదేమిటి ".. అడిగాడు రవి. 

"బయట సడన్గా వర్షం పడుతుందేమోనని అనుమానం వచ్చింది. ".. అంది లలిత. 

"ఈ సంవత్సరంలో నాలుగు సార్లు అడిగావు. కరోనా కరోనా అంటూ.. దాట వేశాను. పైగా నువ్వు ఫంక్షన్లకు, గట్రాలకు వెళ్ళడానికి అని కనీసం మూడు వేల రూపాయల చీర కొనండి అన్నావు.. 3000 అంటే పెద్ద అమౌంట్ కదా. అందుకు కొంచెం లేట్ అయింది. సరే గతం గతః.

ఇప్పుడు డబ్బు రెడీగా ఉందోయ్.. నడు..” అంటూ భార్యను కంగారు పెట్టి క్లాత్ మార్కెట్ కి తీసుకె ళ్ళాడు.. రవి. 

మోటార్ సైకిల్ వెనకాతల కూర్చుని.. దారిలో. 

"నిజమేనా".. అంటూ అనుమానంగా భర్త రవి కళ్ళల్లోకి చూసే అవకాశం లేక.. వీపు గోకుతూ అడిగింది లలిత. 

"నిజమేనోయ్".. అన్నాడు రవి. 

"మళ్లీ చెప్పండి నిజమేనా.. "?

"నిజమేనోయ్"

"గిల్లి చెప్పండి.. నిజంగా నిజమేనా?"

"ఇదిగో గిల్లితున్నాను నిజంగా నిజం" రవి డ్రైవింగ్ చేస్తూనే వెనక్కు చెయ్యి పెట్టి గట్టిగాగిల్లి చెప్పాడు. 

''అబ్బా రోడ్డుమీదే సరదాల పండుగ చేసేస్తున్నారు

గిల్ల మని అన్నది చెయ్యి మీద.. ఎక్కడపడితే అక్కడ గిల్లితే ఎలా ?.. ''. అన్నది గారాలు పోతూ. 

లలిత.. "సత్యమంగళిషాప్ కు వెళ్దాం".. అంది. 

"నేను.. అదే అనుకుంటున్నాను.. ఇదివరలో అదే షాపు అయితేనే వస్తాను అన్నావుగా నాకు గుర్తుంది.. అక్కడికే వెళ్దాం పద" అంటూ తీసుకెళ్లి షాపు లోపలకు ప్రవేశించారు. 

సేల్స్ బాయ్ ఆహ్వానించి చీరలు చూపించడం మొదలు పెట్టాడు. 

చాలా చీరలు చూశాక.. 

"ఆ కవరులో ఉన్నది ఏమిటి " అని అడిగింది లలిత.. 

''ఇది 3000 రూపాయలు ఖరీదు అయిన చీర. అమ్మగారు.. ఈచీర ఎమ్మెల్యే గారి భార్య కోసం ఉంచాము.. అలాంటిది ఒకటే ఉంది ఈ చీర అమ్మడం కుదర”దని అన్నాడు సేల్స్బాయ్. 

పైగా ఆ చీరను కనపడకుండా పక్కన పెట్టేసాడు. 

''అలాంటప్పుడు ఆ చీర అమ్మేసినట్టే కదా.. చీర అమ్మేసాక.. మీరు ఇక్కడ ఉంచకూడదు. క్యాష్ కౌంటర్ లో కింద అరలలో ఎక్కడైనా పెట్టుకోవాలి. లేదా మీ గొడౌన్ లో దాచుకోవాలి.. కస్టమర్ల కు కనబడేలా పెట్టి ఆ చీర అమ్మేది కాదు అంటే ఎలా కుదురుతుంది. 

పైగా పదే పదే నాకు కనపడేలా.. ఉంచారు. నాకు ఆ "చీరే" కావాలి.. ఆ కలరు, ప్రింటు, బోర్డరు.. క్వాలిటీ నాకు బాగా నచ్చాయి 3000 అయినా పర్వాలేదు.. మేం కొనలేము అనుకుంటున్నారా?

సరే మిమ్మల్ని ట్రబుల్ పెట్టడo నాకు ఇష్టం లేదు. కానీ ఒక నెల రోజులు అయినా పర్వాలేదు.. అలాంటి చీర వస్తే మా నెంబర్ కౌంటర్లో ఇచ్చి వెళ్తాను ఫోన్ చేయండి. '' అంటూ గబగబా వెళ్ళి పోవాలి అన్న ఉద్దేశంతో పైకి లేచింది లలిత. 

"ఉండండి మేడం కోప్పడకండి.. 5 నిమిషాల్లో ఓనర్ గారితో మాట్లాడి వస్తాను.. ఉండండి.. '' అంటూ సేల్స్ బాయ్ షాపు ఓనర్ తో ఏదో మాట్లాడి.. తిరిగి వచ్చి లలిత ను ఆ చీర తీసుకోమని ఇచ్చేశాడు. 

లలిత బిల్లు చెల్లించి చీరతో భర్తతో ఆనందంగా ఇంటికి వచ్చేసింది.. 

  ఇంటర్ మిషన్

వారం గడిచాక.. ఆ చీర కట్టుకొని లలిత గుడికి వెళ్లి కొబ్బరికాయ కొట్టి తిరిగి ఇంటికి వస్తూ.. అప్పుడే గుడిలోకి వస్తున్న సత్యమంగళి షాపు సేల్స్బాయ్ ని గుర్తుపట్టి అతనివైపుచూసింది. 

అతను తనను చూసి "కిసుక్కున పుసుక్కున గబుక్కున".. నవ్వుకోవడం లలిత కనిపెట్టింది.. 

సేల్స్బాయ్ చాలాసేపు అలా నవ్వుతూనే ఉన్నా డు.. ఎక్కడో కొట్టింది లలితకు.. ఏదో ఒక కథ ఉండి ఉండవచ్చు అని.. ఆమె బుర్రలో గొంగలి పురుగు దొలిచేస్తుంది. అది అలా దొలిచి దొలిచి దొలిచి తన చిన్న మెదడును రంధ్రాలు చేసేస్తోంది.. 

అంతే. ఆ అబ్బాయి ని పిలిచి "నువ్వు సత్యమంగళి క్లాత్ షాప్ లో సేల్స్ బాయ్ కదా.. నేను కట్టుకున్న ఈ కొత్త చీర నాకు అమ్మింది నువ్వే కదా.. నాకు ఈ చీర నప్పలేదా.. ఎందుకు నన్ను చూసి అలా నవ్వుతూన్నావు.. ?" అని అడిగింది. 

అతను ఇంకా ఆగ కుండా తెగ నవ్వుకుంటున్నాడు. 

లలిత ఆ అబ్బాయికి ఏదైనా ఆశ చూపితేనే కానీ నోరు విప్పడని అతనికి తనచేతిలోని కొబ్బరి చిప్ప ఇచ్చేసి

"అసలు ఎందుకు నవ్వుతున్నావు?" అంటూ నిలదీసింది. అయినా అతను అలా నవ్వుతూనే ఉన్నాడు. 

కసుక్కున పుసుక్కున గబుక్కున.. ఆ నవ్వు చాలా గందరగోళంగా ఉంది. చాలామంది చాలా రకరకాల నవ్వులు చూసింది గానీ.. ఈ టైప్ ఆఫ్ నవ్వు లలితకు ఈ భూప్రపంచం మీద ఎక్కడా కనిపించలేదు. 

నవ్వు నాలుగు విధాల చేటు అన్నారు.. పూర్వం పెద్దలు. వాళ్ళు చెప్పింది కరెక్ట్ కాదు. అప్పటికీ అది కరెక్ట్ ఏమో గాని ఇప్పుడు నవ్వు 5 విధాల చేటు అనాలి!?

లలితకు అనుమానం బాగా పెరిగిపోయింది. అగ్ని పర్వతం నుంచి లావా పొంగిపోయి భూ ప్రపంచం అంతా వెదజల్ల పడుతున్నట్లు.. మనసు కకా వికలం అయిపోతుంది.. చిందరవందర అయిపోతుంది.. ఇంకా చెప్పాలంటే ఎర్రబెందడి మట్టి ముఖమంతా రాసుకున్నట్టు ఉంది లలిత పరిస్థితి. 

ఈ నవ్వు సమస్యకు పరిష్కారం ఇది కాదు అను కుంది మనసులో.. వెంటనే ఆలోచించకుండా.. 

''తమ్ముడు.. సాయంత్రం ఒకసారి మా ఇంటికి రా నాలుగు బెల్లంపాకంగారెలు ఉన్నాయి పెడతాను. ఇదిగో శ్రీనగర్ కాలనీ కి వచ్చి.. లలితగారు.. అంటే ఎవరైనా చెప్తారు. సరేగాని తమ్ముడు.. ఈ 100 రూపాయలు.. నీ జేబులో ఉంచుకో. ఎప్పుడైనా సినిమాకు వెళ్లడానికి పనికొస్తాయి''.. 

అంటూ వంద నోటు పర్సులో నుంచి తీసి అతని జేబులో పెట్టింది. 

"అమ్మగారు.. మీ ఫేసు చాలా అమాయకంగా కనిపిస్తుంది.. మీరు "ఎవరికీ చెప్పను" అంటే ఒక మాట చెప్తానండి.. నేను మీ ఇంటి పక్క వీధిలోనే ఉంటున్నానండి. అయ్యగారు నాకు.. కొంచెం తెలుసు.. 

అసలు విషయం ఏమిటంటే.. మీరు ఎవరికీ చెప్పరు కదా మరి. అయ్యగారిని కూడా అడగ కూడదు.. 

సీక్రెట్ ఏమిటి అంటే.. అయ్యాగారు మొన్న నాకు యాభై రూపాయలు ఇచ్చి మిమ్మల్ని సత్యమంగళంషాపుకు తీసుకుని వచ్చినప్పుడు.. 1000 రూపాయల చీర 3000 అని చెప్పమన్నారు.. 

పైగా అది ఎమ్మెల్యే గారి భార్య తీసుకున్నారు అని అబద్దమాడమన్నారు. ".. 

అంటూ ఇంకా పిచ్చిగా నవ్వుకుంటూ పరుగున వెళ్లలేదు.. వెళ్ళబోయాడు.. ఆ అబ్బాయి. 

''ఏరా బడుద్దాయి.. నా మొఖం నీకు అమాయకం గా కనిపిస్తుందా.. ఇంకా మనసులో ఏమనుకుం టున్నావు రా.. నేను తింగరి దాన్ని అనుకుంటూ న్నావు కదూ.. నేను తెలివి తక్కువ దద్దమ్మని.. అనుకుంటున్నావు కదూ.. '' అంటూ

లలిత అతని నుండి 100రూపాయల నోటు లాగేసుకుంది. 

ఇప్పుడు ఆమె 10 అడుగులకు ఒక అడుగు చొప్పున.. ఇంటికి వెళ్తుంది. ఈ పురుష ప్రపంచం మీద ఆమెకు ఉన్న కసిపగాద్వేషం ఆమె ఇంటికి వెళ్లాక తన భర్త మీద ఎలా తీర్చుకుంటుందో ఆ దేవుడికి తెలుసు మన కు తెలియాలంటే.. ఊహించుకోండి ఎవరికైనా తప్పకుండా అర్థమవుతుంది. 

ఎంతకూ అర్థం కాలేదు అనుకోండి. మీరు కూడా మీ భార్య ను ఇలాగే ఆట ఆడించి చూడండి. తప్పకుండా

అర్థమవుతుంది.. అనుభవం ఏర్పడుతుంది మరి. 

 శుభం

ఇది ఎపిసోడ్ కు శుభము చెప్పాలనీ చెప్పానుగాని ఇప్పుడు శుభం ఎలా జరుగుతుంది బాబు. అంతా 

అశుభమే కదా. 

 మన హీరో రవి గారి పని పటాఫట్.. ఫినిష్. 

**

నల్లబాటి రాఘవేంద్ర రావు గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు 

 ఇక్కడ క్లిక్ చేయండి.

విజయదశమి 2025 కథల పోటీల వివరాల కోసం

ఇక్కడ క్లిక్ చేయండి.

కొసమెరుపు కథల పోటీల వివరాల కోసం

ఇక్కడ క్లిక్ చేయండి.

మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.

మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.

లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.

 మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.

దయ చేసి సబ్స్క్రయిబ్ చెయ్యండి ( పూర్తిగా ఉచితం ).

https://www.youtube.com/channel/UCP4xPLpOxrVz33eo1ZjlesQ 

మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.

https://www.facebook.com/ManaTeluguKathaluDotCom

గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.

30 /10 /2022 తేదీన హైదరాబాద్ రవీంద్ర భారతిలో మనతెలుగుకథలు.కామ్ వారిచే సన్మానింపబడి, ప్రముఖ రచయిత బిరుదు పొందారు.

రచయిత పరిచయం: నల్లబాటి రాఘవేంద్ర రావు

30 /10 /2022 తేదీన హైదరాబాద్ రవీంద్ర భారతిలో మనతెలుగుకథలు.కామ్ వారిచే సన్మానింపబడి, ప్రముఖ రచయిత బిరుదు పొందారు.

 https://www.manatelugukathalu.com/profile/nallabati/profile   

ముందుగా  " మన తెలుగు కథలు"  నిర్వాహకులకు నమస్సులు..

"రచయిత పరిచయం"..... ఇది చాలా ముఖ్యం.

రచయిత తన  గొప్పలు చెప్పుకోవడం కాదు గాని తన గతచరిత్ర వివరాలు అందరికీ తెలియ చేయటం అవసరమే. ఈ చర్య ఆ రచయితకు మానసికంగా ఎంతగానో ఉపయోగపడి అతను మరిన్ని మంచి మంచి రచనలు చేసి సమాజానికి అందించే అవకాశం ఉంది.. ఎంతో పెద్ద ఆలోచనతో అలాంటి 'మహా ప్రయత్నం'.. చేస్తున్న 'మన తెలుగు కథలు' కు మరొక్కసారి అభినందనలు.

పునాది....

-----------

ఏడు సంవత్సరాలు వయసు నాది. మా తండ్రి సుబ్బారావు గారు  ప్రోత్సాహంతో శ్రీ కృష్ణార్జున యుద్ధం అనే 10 నిమిషాల నాటకాన్ని నేనే రాసి కృష్ణుడి వేషం  నేనే వేసి దర్శకత్వం నేనే చేసి పెద్ద స్టేజి మీద  దసరా నవరాత్రులకు ప్రదర్శించాము.

ఆ తర్వాత భక్త ప్రహ్లాద లో ప్రహ్లాదుడు గా.. మరో నాటకంలో శ్రీరాముడుగా..   రచన దర్శకత్వం నాదే.. ఏడు సంవత్సరాల వయస్సు.

తర్వాత పదిహేను సంవత్సరాల వయసులో

టెన్త్ క్లాస్ యానివర్సరీ కి  15 మంది నటులతో నా దర్శకత్వం లో పెద్ద స్టేజి మీద నాటకం వేసాము.

అప్పుడే నేను రచయితను కావాలన్న

ఆశయం   మొగ్గ తొడిగింది.

నా గురించి..

---------------

50 సంవత్సరాల సుదీర్ఘ సాహితీ ప్రయాణం.

450  ప్రచురిత కథల రచన అనుభవం.

200 గేయాలు  నా కలం నుండి జాలువారాయి

200 కవితలు నా మేధస్సు నుండి ఉద్భవించాయి

20 రేడియో నాటికలు ప్రసారం.

10 టెలీఫిల్మ్ ల నిర్మాణం.

200 కామెడీ షార్ట్ స్కిట్స్

3  నవలలు దినపత్రికలలో

" దీపావళి జ్యోతి "అవార్డు,

"రైజింగ్స్టార్" అవార్డు

" తిలక్ స్మారక" అవార్డు... మరికొన్ని అవార్డులు.

ప్రస్తుత ట్రెండ్ అయిన  ఫేస్బుక్ లో  ముఖ్యమైన 15 గ్రూపుల్లో... ఇంకా అనేక వెబ్ సైట్లు, బ్లాగులు,ఆన్లైన్ పత్రికలలో యాక్టివ్ గా తరచు  నాకథలు,  కవితలు,గేయాలు, ముఖ్యంగా కామెడీ షార్ట్ స్కిట్స్ ప్రతి రోజూ దర్శనమిస్తూ ఉంటాయి..

రమారమి 75 అవార్డులు, రివార్డులు అందు కున్నాను... అని గర్వంగా చెప్పుకునే అవకాశం  కలగటం... ఆ చదువులతల్లి అనుగ్రహమే!

ఇదంతా ఒక్కసారిగా  మననం చేసుకుంటే...  'పడని సముద్ర కెరటం' లా... నూతనశక్తి మళ్లీ పుంజుకుంది.

ఇక నా విజయ ప్రయాణగాధ....

------+------------------------------

పేపర్లెస్ రచయితగా... ఒక కుగ్రామం లో పేరు ప్రఖ్యాతులు పొందిన  నా తండ్రి సుబ్బారావు గారు నా ఆలోచనలకు, రచనలకు ప్రాణప్రతిష్ట చేసిన ప్రథమగురువు. తల్లి వీరభద్రమ్మ  నాకే కాదు నా కథలకూ ప్రాణదాతే!!

తదుపరి రమారమి 50 సంవత్సరాల క్రితమే.. మా ఊరివాడైన నా జూనియర్ క్లాస్మేట్... నా స్నేహితుడు ఇప్పటి సినీ దర్శకుడు " వంశీ "... కథలు రాస్తూ...   నన్ను కూడా కథలు రాయ మని... చెప్తుండేవాడు. అప్పటి నుండి  ఎక్కువగా రాయడం మొదలు పెట్టాను.ఆ తర్వాత మా ఊరి  వారైన  సినీ గేయరచయిత

" అదృష్టదీపక్".. నా కథలు.. చదివి.. మెచ్చు కునే వారు.. దాంతో ఇంకా విరవిగా కథలు రాయడం మొదలు పెట్టాను.

1. మొదటి రచన 1975 నాటి ప్రఖ్యాత పత్రిక "ఆంధ్రసచిత్రవారపత్రిక" లో బుద్ధిలేనిమనిషి  కథ.

2. రేడియో నాటికలు  గొల్లపూడి మారుతీ రావు    గారి సమకాలంలో విరవిగా వచ్చాయి.

3. సినిమాకథలపోటీ లో అలనాటి "విజయచిత్ర"  ద్వితీయబహుమతి కథ..  "డిసెంబర్ 31 రాత్రి"

4. ఉగాది కథలపోటీ "ఆంధ్రభూమి" బహుమతి కథ

5. ఉగాది కథల పోటీలో "ఆంద్రజ్యోతి" బహు మతి కథ

6.  దీపావళి కథలు పోటీలో  "ఆంధ్రజ్యోతి" బహుమతి కథ.

7. అప్పాజోస్యుల( అమెరికా) నిర్వహించిన కథల పోటీలో "నలుగురితో నారాయణ".. ఆంధ్రప్రభ విశిష్ట కథ ప్రచురణ

8. అల్లూరి స్మారక జయంతి "కళావేదిక " కరప తిలక్ స్మారక అవార్డు కథ " బ్రతుకు జీవుడా"

9. "స్వాతి "   తానా అమెరికా కథల పోటీలో ప్రచురణ కు ఎన్నికైన కథ..." వైష్ణవమాయ."

10. రాష్ట్రస్థాయి కథలపోటీ హైదరాబాద్  "నిమ్స్"ద్వితీయ బహుమతి కథ..న్యాయనిర్ణేత శ్రీమతి యద్దనపూడి సులోచనారాణి." బంగారు పేకమేడ"

11. "అనిల్ అవార్డ్" స్వాతి కన్సోలేషన్ బహు మతి..." అమృతం  కురిసింది"

12. సస్పెన్స్ కథల పోటీ "స్వాతి" లో ఎన్నికైన కథ

13. "పులికంటి సాహితీ సంస్థ" రాష్ట్రస్థాయి పోటీలకు ఎన్నికైన కథ..

14. రాష్ట్రస్థాయి కథలపోటీ "ఆరాధన" హైదరా బాద్ ద్వితీయ బహుమతి కథ.." అదిగో స్వర్ణ యుగం"  న్యాయనిర్ణేత   జ్ఞానపీఠ అవార్డు గ్రహీత.. శ్రీ రావూరి భరద్వాజ గారు.

15. "అభ్యుదయ ఫౌండేషన్" కాకినాడ రాష్ట్ర స్థాయి అత్యుత్తమ కథ.. " ఐదేళ్ల క్రితం " .

16. సి.పి.బ్రౌన్ "సాహితీ స్రవంతి".. ప్రత్యేక కథ

" ఇంద్రలోకం".

17.  కొమ్మూరి సాంబశివరావు స్మారక  సస్పెన్సు కథల పోటీలో  "నవ్య' ప్రచురణకు ఎన్నికైన కథ.

18. "వేలూరు పాణిగ్రహి" విజయవాడ "  గాంధీ తాత"  రాష్ట్రస్థాయి ద్వితీయ బహుమతి కథ.

19. 'కదలిక'... సర్వశిక్షఅభియాన్  రాష్ట్ర ప్రభుత్వ సహకారంతో నిర్మింపబడిన అత్యున్నత టెలీ ఫిల్మ్... చిన్న సినిమా.

20. "అల కమ్యూనికేషన్" హైదరాబాద్ కథల పోటీలో ఎంపికైన కథ...." హృదయానికి శిక్ష".

21. రాష్ట్రస్థాయి కథలపోటీ "మైత్రేయ కళాసమితి" మెదక్.. పుస్తక సంకలనానికి ఎన్నికైన కథ. "బిందెడు నీళ్లు".

22. రాష్ట్ర స్థాయి కథల పోటీలు "జాగృతి" కన్సోలేషన్ బహుమతి  కథ "ఆలస్యం అమృతం విషం"

23. రాష్ట్రస్థాయి దీపావళి కథల పోటీ  "ఆంధ్ర ప్రదేశ్" పత్రిక ప్రత్యేక బహుమతి హాస్య కథ.

24. రాష్ట్రస్థాయి దీపావళి కథల పోటీ "ఆంధ్రప్రభ" ప్రచురణకు ఎంపికైన కథ.

25. దీపావళి కథల పోటీ "ఆంధ్రభూమి" ప్రచురణ కు ఎన్నికైన కథ.

26.  రాష్ట్రస్థాయికథల పోటీ "ఆప్కో ఫ్యాబ్రిక్స్" హైదరాబాద్ నిర్వహణ  పోటీ లో ఎన్నికైన కథ.

27. రాష్ట్రస్థాయి కథలపోటీ "ఆంధ్రప్రదేశ్పత్రిక" కు ఎన్నికైన హాస్యకథలు." చంద్రమండలంలో స్థలమును అమ్మబడును".

28.దీపావళి కథల పోటీ "జాగృతి" పత్రిక కు ఎన్నికైన కథ.

29. "హాస్యానందం" విశేష స్కిట్స్ కొరకు.. "రైజింగ్ స్టార్".. అవార్డు.

30 ఆంధ్రజ్యోతి "భావ తరంగం"  వారం వారం 30 కథలు.

31. "కళా దర్బార్"  రాజమండ్రి.. రాష్ట్రస్థాయి  కవితలపోటీలలు... 4 సంవత్సరాలు ఉత్తమ  కవిత్వానికి ప్రథమ బహుమతి...మూడుసార్లు.. ఉత్తమ కవిత్వానికి ద్వితీయ బహుమతి.

32.."హాసం" మాస పత్రిక లో ప్రచురింపబడిన  "చిరాకు దంపతులు చింతకాయ పచ్చడి"    కథ చదివిన చాలా మంది సినీ ప్రముఖులు  ఫోన్ కాల్స్ చేసి అభినందించడం.

33. ప్రఖ్యాత సిరివెన్నెల పత్రికలో  సిరివెన్నెల సీతా రామశాస్త్రి గారి నిర్వహణలో జానపద పాటల పోటీలో  ప్రథమ బహుమతి  పాటకు వారి నుండి  పత్రికాముఖంగా ప్రత్యేక ప్రశం సలు.. తదుపరి ఆ పాట అనేక   రంగస్థల ప్రదర్శనలు పొందడం.

34. విశేష కథలుగా  పేరు ప్రఖ్యాతులు తెచ్చిన కథలు

  నలుగురితోనారాయణ

  కొరడా దెబ్బలు

  అమృతం  కురిసింది.

  వైష్ణవమాయ

  ఐదేళ్ల క్రితం

  ఇంద్రలోకం

  బిందెడు నీళ్లు

  చంద్రమండలంలో స్థలములు అమ్మబడును

  డిసెంబర్ 31 రాత్రి

  మహాపాపాత్ముడు

35. రాజమండ్రి ,కాకినాడ ,విజయవాడ, విశాఖ పట్నం ,రామచంద్రపురంలో.. విశేష సన్మానాలు.

ప్రస్తుతం...

1. ఒక పరిశోధన నవల.. ఒక చారిత్రక నవల రాసే ప్రయత్నం

2. పరిషత్ నాటికలు జడ్జిగా..

3.  కొందరు సినీప్రముఖుల ప్రోత్సాహంతో..

సినిమాలకు కథ మాటలు స్క్రీన్ప్లే అందించే ప్రయత్నం.

4. ..  4 కథల సంపుటిలు... రెండు కవితా సంపుటిలు.. 1గేయ సంపుటి.. 2 కామెడీ షార్ట్ స్కిట్స్.. రెండు నాటికల సంపుటిలు..ఒక నవల ప్రచురణ తీసుకొచ్చే ప్రయత్నం.

5. ఒక ప్రింటెడ్ పత్రిక  ప్రారంభించే ఉద్దేశ్యం.

భార్య.. గోవిందీశ్వరి... హౌస్ వైఫ్.

కుమారుడు... వెంకట రామకృష్ణ .. బి.టెక్ సాఫ్ట్వేర్ ఇంజనీర్... మైక్రోసాఫ్ట్.. హైదరాబాద్.

కోడలు... మాధురీ లత..... ఎం ఫార్మసీ.

కుమార్తె.. సౌభాగ్య.. స్టూడెంట్.

మనుమరాలు.. ఆద్య... యాక్టివ్ బేబీ.

నా కథలను ఆదరించి తమ అమూల్య అభి ప్రాయాలు తెలియజేస్తున్న... రెండు రాష్ట్రాల తెలుగు ప్రజలందరికీ... వినమ్ర నమస్సులు.

నల్లబాటి రాఘవేంద్ర రావు