ప్రేమ - పెట్రోల్
- Dr. Brinda M. N.
- Jul 10
- 4 min read
#PremaPetrol, #ప్రేమపెట్రోల్, #DrBrindaMN, #డాక్టర్.బృందఎంఎన్., #TeluguInspirationalStories, #ప్రేరణాదాయకకథలు
Prema Petrol - New Telugu Story Written By Dr. Brinda M N
Published In manatelugukathalu.com On 10/07/2025
ప్రేమ - పెట్రోల్ - తెలుగు కథ
రచన: డాక్టర్ బృంద ఎం. ఎన్.
ఆదిదంపతులకు అనురాగ ఫలాలు శ్రీమ, స్వప్న. మధ్య తరగతి కుటుంబం అయినా, పిల్లలు ఇద్దరినీ మంచిగా చదివించారు. శ్రీమ ఉద్యోగ నిర్వాణ బాధ్యతలో పూర్తిగా మునిగిపోయినందున వివాహంపై ఆసక్తి లేక సత్సంగాల్లో నిత్యకృత్యులై ఉండేది. ఒకవైపు తల్లిదండ్రుల సేవ, మరోవైపు ప్రముఖ బాధ్యతను చూసుకుంటూ ఉండేది. స్వప్నకు మంచి సంబంధం చూసి వివాహం చేశారు.
"శ్రీమ ! ఎన్నేళ్లు ఇలానే ఉంటావే, చూడు నీ ఈడువారు అప్పుడే పిల్లలతో కళకళలాడుతున్నారు." తల్లి నిట్టూర్పు.
"అమ్మ! నీకు ఎన్నిసార్లు చెప్పాను వారితో వీరితో పోల్చక నాకు నువ్వు, నాన్న ముఖ్యం మీకంటే గొప్పది ఈ ప్రపంచంలో ఏమీ లేదమ్మా, అర్థం చేసుకోవు" అంటూ శ్రీమ అమ్మ గడ్డాన్ని పట్టుకుని బుజ్జగించేది.
"సరేలేవే, నువ్వు అరవై ఏళ్లకు పెళ్లి చేసుకో" గుర్రుమనేది అమ్మ.
"అబ్బా ! అమ్మ! ఎంత చల్లని మాట అన్నావ్, హాయిగా అప్పుడు అరవై ఏళ్ల వారిని చూసుకుని, చేసుకుని ప్రశాంతంగా ఒక కుటీరం కట్టుకొని గడపవచ్చు" సంతోషంతో శ్రీమ జవాబు.
"చాలు, చాల్లేవే ! నీ మాటలకేం గానీ, ఎప్పుడు నువ్వే నెగ్గుతావ్"
"ఏంటి? తల్లికూతుళ్ల మధ్య మళ్లీ తుఫాను వచ్చిందా?” తండ్రి హాస్యధోరణితో అన్నాడు.
"అదే నాన్న, అమ్మ తన పెళ్లి పాటను ఇంకా మరవలేకుంది"
గలగల గోదారిలా నవ్వుతూ అంది శ్రీమ.
కాలప్రవాహం వేగవంతం అవడం సహజమే కదా, పెద్దవారు ఇరువురు చిన్నచిన్నగా అస్వస్థకు గురి అవుతున్నారు. శ్రీమ వారిపై ప్రత్యేక శ్రద్ధతో సేవలు చేస్తూ ఉండేది.
ఇంతలో హఠాత్తుగా స్వప్న ఊడిపడింది సొంత పనుల కోసం, వస్తూ వస్తూ ఊరికే రాక తన భర్త వైపు బంధువు ఒకతను చాలా మంచివాడని శ్రీమ ఫోటోను చూసి ఒప్పుకున్నాడని వార్త మోసుకొచ్చింది. ఇల్లరికపు అల్లుడుగా ఉండడానికి కూడా సరే అన్నాడని ఇలా ఏవేవో చెప్పుకొచ్చింది. తల్లితో తిమ్మిరి బమ్మిరి చేసి తల్లిదండ్రులను ఒప్పించింది.
"అక్క! అవన్ కు మన ఇంటి గురించి, నీ గురించి అంతా చెప్పాను, వాళ్ళ అమ్మానాన్నకు కూడా నువ్వు బాగా నచ్చావు ఒప్పుకో" అంటూ బ్రతిమలాడింది స్వప్న.
"స్వప్న! మనిద్దరికీ చాలా వ్యత్యాసం. హంగు, ఆర్భాటం, కోలాహలం, ఆడంబరాలకు నేను చాలా దూరం, వచ్చిన పని చూసుకో ఎన్ని రోజులు ఉంటావో ఉండు, అంతేకానీ ఇలాంటివి చెప్పకు" కోపంగా అంది శ్రీమ.
స్వప్న ఊరికే రాక ఒక నిప్పురవ్వ ఇంటిపై చిమ్మి పోయింది. శ్రీమ ఎంత ప్రేమను పంచినా తల్లిదండ్రులు పరాయిదానిగా చూసేవారు, తరచుగా స్వప్నతో చరవాణిలో సంభాషించేవారు, దీనితో అవన్ పెద్దలను మాయమాటలతో బాగా ఆకట్టుకున్నాడు, వాటికి దాసోహం అయ్యారు వారు.
"శ్రీమ! నీతో ఉండాలంటే అవన్ ను పెళ్లి చేసుకో లేకపోతే మేమే అవన్ దగ్గరకు వెళ్ళిపోతాం" హెచ్చరించారు కాదు బెదిరించారు.
"అమ్మా!నాన్న! నేనున్నదే మీకోసం మీ సేవతో జీవితం పునీతం కావాలని నిరంతరం తపించేదాన్ని. ఎందుకు ఈ వివక్ష? పైపై మెరుపులు నిజం కాదమ్మా! ఆలోచించండి, అలా ఎలా ఒప్పుకుంటారు వాళ్ళందరూ?" అని ఎంత చెప్పినా పెడచెవిన పెట్టారు తల్లిదండ్రులు.
ఇష్టం లేకపోయినా పెద్దవారి మనసు కష్టపెట్టలేక ఒప్పుకుంది శ్రీమ. నెల రోజులపాటు ఇరువురి తల్లిదండ్రులు శ్రీమతోనే ఉన్నారు.
అవన్ ఏదో బిజినెస్ అని అక్కడికి ఇక్కడికి వెళుతూ ఉండేవాడు. రాను రాను ఇద్దరి మధ్య గొడవలు చిలికి చిలికి వాన చందాన కొనసాగాయి. తన జీతంతోనే మోటార్ సైకిల్ కొనిచ్చింది శ్రీమ.
"శ్రీమ! బయటకు వెళ్లాలంటే పెద్ద వాహనం మన దగ్గర ఉంటే బాగుంటుంది కదా, కారు కొందాం, లోన్ తీసుకుంటావా? అన్నాడు.
"చూడండి! ఎప్పుడూ లేనిది వింత వింతగా జరుగుతుంది. స్కూటర్ కొని 15 రోజులు కూడా కాలేదు, అప్పుడే కారు ఏంటి?" వినమ్రంగానే శ్రీమ జవాబు.
శ్రీమ రోజు కార్యాలయానికి ఆటోలో వెళ్లి వచ్చేది అనుకోకుండా అనారోగ్య రీత్యా అతను మానేశాడు. రోజుకు ఒక ఆటోను రోడ్డు మీదికి వెళ్లి మాట్లాడుకుని వెళ్లడం మరి కార్యాలయం నుంచి రోడ్డు మీదకు వచ్చి ఆటో కోసం వేచి వేచి చాలా ఆలస్యంగా రావడం, ఇంట్లో అమ్మా నాన్న కోపడ్డం, పనంతా చేసుకోవడం, ఇలా మూడు నెలలు విపరీతంగా కష్టపడేది శ్రీమ.
ఇది చూసి తోటి వారు "మేడం! స్కూటర్ ఉంది ఆయన కూడా ఫ్రీగానే ఉంటారు కదా! ప్రొద్దున సాయంత్రం మిమ్మల్ని పిక్ అప్, డ్రాప్ చేయొచ్చు కదా!" అన్నారు.
అదే విషయాన్ని చెప్పింది అవన్ కు.
"కుదరదు, నాకు చాలా పనులు ఉంటాయి. "
"సరే, కొన్ని రోజులు సెలవు పెడతా"
"వద్దు, వద్దు! లీవ్ పెడితే జీతం తక్కువ అవుతుంది కదా! వస్తాలే"
ఆ మాసం చివరి మూడు రోజుల్లో మొదలు పెట్టాడు శ్రీమను స్కూటర్పై తీసుకెళ్లడానికి. తర్వాత నెల రెండవ రోజుకి
"శ్రీమ! ఆరు వందలు ఇవ్వు" హక్కుగా అన్నాడు అవన్ పొద్దు ప్రొద్దునే.
"ఇంకా జీతమే రాలేదు, అప్పుడే ఏంటి, ఆరు వందలు? దేని కోసం?" అడిగింది శ్రీమ.
"పెట్రోల్ ఖర్చుల నిమిత్తం వారానికి, అదే నీకోసం వస్తున్నానుగా, ఆరు వందలు ఇవ్వాలి"
"వాట్"
" అవును"
"దిస్ ఇస్ టూ మచ్"
"ఏం? ఆటో వాడికి ఇచ్చేదానివిగా"
"స్టాప్ ఇట్! డోంట్ టాక్ రబ్బిష్"
"లేకపోతే, పాపం మహారాణి అని ఊరికే రావాలా?"
"ఏం మాట్లాడుతున్నావో, అర్థం అవుతుందా నీకు?"
"అవును, ఉన్నది అంటున్న, అడుగుతున్నా వారానికి 600 ఇవ్వాల్సిందే. "
" దిస్ ఇస్ నాట్ ఎ బిజినెస్"
"తెలుసు భార్యాభర్తలమే, అయినా ఇవన్నీ కామన్ నువ్వు ఇంకా రామాయణ కాలంలో ఉన్నట్టున్నావ్. "
"ప్రేమనే పవిత్ర బంధానికి పెట్రోల్ తో ముడి పెట్టడానికి సిగ్గుగా లేదు, నిన్ను ప్రాణంగా ప్రేమిస్తున్నాను, నువ్వుంటే చాలు, నీతో ఉంటే చాలు, ఇవన్నీ అబద్ధాలేనా?”
"ఏదో, కడుపు నింపుకోవడానికి మాట్లాడుతాం, అవన్నీ నిజమే అనుకుంటారు మీ ఆడాళ్ళు. ఇదే ప్రాబ్లం. "
ఇలా మాటకు మాట పెరిగి, సంసారం విచ్చిన్నమయింది. ఐదు నెలలకి అసలు రంగు బయటపడింది. శ్రీమ తల్లిదండ్రులతో వేరే ఊరికి బదిలీ తీసుకొని వెళ్ళిపోయింది. పెద్దవారు స్వప్న వ్యూహాన్ని ఎరుగక, నక్క వినయాలకు లొంగి, కూతురి బంగారు భవితని బుగ్గిపాలు చేశామని బాధపడ్డారు.
నీతి: నిజమైన ప్రేమకు పెట్రోల్ ఖర్చులతో పనిలేదు. సమాన ధోరణితో సంసార సాగరాన్ని సహజంగా స్వీకరించగలగాలి.
"జై తెలుగుతల్లి! జై భరతమాత"
సమాప్తం
డాక్టర్ బృంద ఎం. ఎన్. గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
విజయదశమి 2025 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx/docs రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత్రి పరిచయం: డాక్టర్ బృంద ఎం. ఎన్.
కవయిత్రి, రచయిత్రి, గాయని,
స్కిట్ డైరెక్టర్, చిత్రకారిణి
15 సంవత్సరాలుగా నిరంతర తెలుగు భాషా పరిరక్షణ కొరకు పాటుపడుట
భారతీ సాహితీ సమితిలో ప్రధాన కార్యదర్శిగా ఉండి ఆధునిక ప్రాచీన సాహిత్యంపై పని చేయడం అలాగే విద్యార్థులకు సుమతీ, వేమన, భాస్కర శతక పద్య పోటీలు నిర్వహించుట, తెలుగు సాహితీ మూర్తుల జయంతి వేడుకలు జరిపి వారి సేవలను గురించి సమాజానికి తెలియపరచుట, సందేశాత్మక కథలు, నీతి కథలు వ్రాసి విజేతలగుట, ప్రపంచ తెలుగు మహాసభల్లో చురుకుగా పాల్గొని (delegate) పెద్దవారి ప్రశంసలు పొందుట, యువతను ఉద్దేశించి రచనలు చేయుట, భారతదేశ ఔన్నత్యాన్ని దశ దిశల చాటుట, ఆన్లైన్ మరియు ఆఫ్లైన్ కవి సమ్మేళనంలో పాల్గొనుట తదితరమైనవి.
Comments