స్వచ్ఛతను పెంచగా..

#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #స్వచ్ఛతనుపెంచగా, #పరవశము

గాయత్రి గారి కవితలు పార్ట్ 29

Swachhathanu Penchaga - Gayathri Gari Kavithalu Part 29 - New Telugu Poems Written By 

T. V. L. Gayathri Published In manatelugukathalu.com On 25/06/2025

స్వచ్ఛతను పెంచగా - గాయత్రి గారి కవితలు పార్ట్ 29 - తెలుగు కవితలు

రచన: T. V. L. గాయత్రి

స్వచ్ఛతను పెంచగా...

(కవిత)

**********************************

స్వచ్ఛతెక్కడ? చూడ జగతిలో కనరాదు!

తుచ్ఛమౌ పనులతో దొరలుచుందురు జనులు 

కాలుష్యమును పెంచి కలిమిపై నాశతో 

పాలకులు దుష్టులై బలముతో మెల్గెదరు

చిత్తశుద్ధిని చూపు చేతనత్వము లేదు 

చెత్త నింపగ సంఘ జీవనము లెట్లుండు?

మురికివాడలతోడ పూటకొక నరకంబు

నిరతంబు రోగముల నెలవయిన నగరాలు 

వాడలను శుభ్రముగ బాగు చేసినచాలు

పాడురోగములెల్ల పారిపోవుట నిజము

పుడమిపై జీవులకు ముప్పు కలిగించునా

జడమైన ప్లాస్టిక్కు జగతికి ప్రమాదమ్ము

నీటి కాలుష్యము నేటి యుగముకు చేటు

కాటు వేసెడి విషపు కారకములు పెరుగు

వైరసులు చుట్టుకొని ప్రాణాలు పోవగా

పౌరతతి జీవించి వరలునా జాతిలో?

మేలుకొని జనులెల్ల మేదినిని రక్షింప

కాలుష్యమును ద్రోల కలుగు సౌభాగ్యములు.//

************************************

పరవశము.

(కవిత)

************************************

వానచినుకులు రాలుతుంటే ప్రకృతి కాంతకు పరవశములే 

ప్రాణికోటికి జీవమిచ్చే పనులు చేస్తే పరవశములే 

చెట్టు చేమలు పెరుగుతుంటే జీవరాశికి పరవశములే 

చిట్టడవులను పెంచి భూమికి సేవచేయుట పరవశములే 

నదులు నిండుగ పారుతుంటే నాగరికతకు పరవశములే 

వదలిపోతే కలుషితములు భావితరముకు పరవశములే 

పొలము లందున పసిడి పంటలు పొంగి పొర్లగ పరవశములే

కలిమితో మన రైతు లందరు కళకలాడుట పరవశములే

పచ్చపచ్చగ పల్లెలుంటే  వసుధకెంతో పరవశములే

సచ్చరిత్రుల బాటలో ప్రజ సాగిపోవుట పరవశములే.

సుందరంబగుసీమ లన్నియు చూచి వచ్చుట పరవశములే

చిందు లేసెడి పిల్లపాపల చిలిపి యల్లరి పరవశములే.

ప్రక్కవారికి మేలు చేయుట భాగ్యమనుటే పరవశములే

చక్కనౌ మనదేశ మందున జన్మనొందుట పరవశములే

నాది నాదను భేదభావము నాశమొందగ పరవశములే

మోదముగ జనులెల్ల మెల్గిన పుడమితల్లికి పరవశములే//

టి. వి. యెల్. గాయత్రి.

పూణే. మహారాష్ట్ర.

Profile Link:

https://www.manatelugukathalu.com/profile/tvlgayathri