తుమ్ము మంచిదే
- Mohana Krishna Tata
- Jun 6
- 3 min read
#MohanaKrishnaTata, #తాతమోహనకృష్ణ, #ThummuManchide, #తుమ్ముమంచిదే, #TeluguComedyStories, #తెలుగుహాస్యకథలు
Thummu Manchide - New Telugu Story Written By Mohana Krishna Tata
Published In manatelugukathalu.com On 06/06/2025
తుమ్ము మంచిదే - తెలుగు కథ
రచన: తాత మోహనకృష్ణ
తాతారావుకు నమ్మకాలు చాలా ఎక్కువ. చిన్నప్పుడు విన్నవి, చూసినవి నమ్మేవాడు. ఒకసారి వీధి చివర ఎవరో గట్టిగా తుమ్మితే, అప్పుడే బయటకు వెళ్ళిన తన బామ్మ స్పాట్ లోనే బకెట్ తన్నేసిందని ఎప్పుడూ గుర్తు చేసుకుంటాడు. ఆ సంఘటన తన మనసులో బాగా ముద్ర వేసింది.
వయసుతో పాటు ఆ నమ్మకం ఇంకా బాగా పెరిగింది. తన పక్క వాటాలో అద్దెకు ఇచ్చిన వారికి జలుబులు, ఎలర్జీ లాంటి జబ్బులు ఉంటే, వెంటనే ఇల్లు ఖాళీ చేయించేసేవాడు. నెలకు ఒక నాలుగుకు మించి తుమ్ములు తుమ్మితే, పక్క వాటా ఖాళీ చేయించేసేవాడు. తుమ్ము ఎక్కడ వినిపించినా, గుండె ఆగినంత పని అవుతుంది తాతారావుకి..చివరకు టీవీలో ఎవరైనా తుమ్మినా సరే.
పెళ్ళి చేసుకునే వయసు వచ్చింది. జలుబులు, ఎలర్జీ లాంటి జబ్బులు లేని అమ్మాయిని బాగా పరిశీలించి మరీ పెళ్ళి చేసుకున్నాడు. భార్య రమకి ఇలాంటి నమ్మకాలు అసలే లేవు. పెద్దగా ఇలాంటివి పట్టించుకోదు.
కొంత కాలం తర్వాత, భార్యకి జలుబు చెయ్యడము, ఎప్పటికి తగ్గకపోవడం, ఒకటే తుమ్మడం చేత తాతారావుకు ఏమీ తోచలేదు. ఎన్ని మందులు వేసినా తగ్గలేదు. టెస్ట్స్ చేసి, ఎలర్జీ ..జాగ్రత్తగా ఉండమని డాక్టర్ చెప్పారు.
ఒకసారి అర్జెంటుగా బయటకు వెళ్తున్నప్పుడు..తన భార్య తుమ్మింది. తప్పక, తిట్టుకుంటూ బయటకు వెళ్ళాడు తాతారావు. బయట ఉన్న ఒక రాయికి తన కాలు తగులుకుని..కింద పడ్డాడు. కాలికి పెద్ద కట్టు..వారం పాటు బెడ్ రెస్ట్. అప్పటినుంచి..పెళ్ళాం మొహం చూస్తే చాలు, కోపం వచ్చేది. ఆమె తుమ్ము వల్లే ఇలా జరిగిందని కోపం మరి.
"చూడు రమా! నీ తుమ్ము వల్ల, ఈ రోజు నేను ఎలాంటి పరిస్థితిలో ఉన్నానో..? నిన్ను చేసుకున్నాను చూడు..అంతా నా ఖర్మ"
"నన్ను ఏమీ అనకండి. ఎవరైనా కింద చూసుకోకుండా కోపంగా బయటకు వెళ్తే ఏమవుతుంది చెప్పండి? ఇంకా నయం నా మంగళసూత్రం సేఫ్ గానే ఉంది. ఏమైనా..నా తుమ్ము మీకు మంచే చేస్తుంది..నన్ను నమ్మండి" అంది రమ
ఒకసారి...
"ఏమండీ..! ఇంట్లో సరుకులు నిండుకున్నాయి..కాస్త బయటకు వెళ్లి తీసుకురండి.." అంటూ లిస్టు ఇచ్చింది రమ
"సరే లే! అని కోపంగా పెళ్ళాం వైపు చూస్తూ అన్నాడు. అంతవరకు బాగా ఉన్న పెళ్ళానికి, ఎక్కడనుంచో గాలికి ఆరబెట్టిన మిరపకాయ గాటు ముక్కుకు తగిలింది. వెంటనే, ఒక భూకంపం వచ్చే అంత పెద్దగా తుమ్మింది రమ. రెండో తుమ్ము కోసం చూసాడు, కానీ అదృష్టం లేదు.
"వెళ్ళక తప్పదా..?"
"అవునండి..అర్జెంటుగా కావాలి.."
పెళ్ళాన్ని తిట్టుకుంటూ..వెంటనే బయలుదేరాడు.
షుగర్ ఉండడం, పైగా వాతావరణం చల్లగా ఉండడంతో, తాతారావు నడిచిన రెండు నిమిషాలకే అర్జెంటుగా మూత్రం తన్నుకుంటూ వచ్చింది. అంత రద్దీ జనంలో బయట పొయ్యడానికి అవదు.. ఆపుకోలేక తెగ ఇబ్బంది పడ్డాడు. చివరకి ఎక్కడో తుప్పల వెనుకకు వెళ్ళాలి, లేకపోతే కడుపు బద్దలైపోతుందని అనుకున్నాడు. ఆ తుప్పల్లో పని మొదలట్టేసరికి.. ముఖంలో కాస్త ప్రశాంతత, చిరునవ్వు మొదలైంది. కానీ ఈలోపే, కాలి కింద ఏదో మంట మొదలైంది..ఏమిటా అని చూస్తే, తుప్పల్లోకి పారిపోతున్న తేలు కనిపించింది. వెంటనే పరిగెత్తుకుంటూ హాస్పిటల్ కి వెళ్ళాడు.
తాతారావుని చూడడానికి వచ్చిన తన ఫ్రెండ్ పాపారావు.. తాతారావుని చూసి..
"నువ్వు చాలా అదృష్టవంతుడవురా కొద్దిలో తప్పిపోయింది..! ఇదంతా మా చెల్లెలి అదృష్టమే" అంటూ రమ వైపు చూస్తూ అన్నాడు
"ఆ మాటలకు ఆశ్చర్యపోయిన తాతారావు..వెటకారమారా..?"
"నిజమే కదా.."
"ఎందుకో..? హాస్పిటల్ లో జాయిన్ అవడం అదృష్టమా..?"
"మరి ఎప్పుడూ తిట్టుకుంటూ కోపంగా బయటకు వెళ్లడం ఎందుకో.?" అంటూ పక్కనుంచి అందుకుంది రమ
"పాము కన్నా తేలు మంచిదే కదా మరి.." అన్నాడు ఫ్రెండ్ పాపారావు
" అంటే..?"
"ఇప్పుడు నీకు తేలు కుట్టింది..అదే టైం లో బజార్ కి వెళ్ళిన చాలా మందికి..అక్కడే పాము కరిచింది తెలుసా..? ఇప్పుడు ఏమంటావు?"
"చూసారా..! నేను చెబితే నమ్మరు..నా తుమ్ము వల్ల మీకు అంతా మంచే జరిగింది.." అంది రమ
"ఏదో అలా ఒకసారి జరిగితే సరిపోతుందా..?"
"ఆ రోజు నీ కాలికి దెబ్బ తగిలినప్పుడు కూడా సూపర్ మార్కెట్ లో ఎవరో బాంబు పెట్టారు. చాలామంది చనిపోయారు. ఆ రోజు నువ్వు బయటకు వెళ్లకపోవడమే మంచిదయ్యింది. ఆ రోజు మీ ఆవిడ తుమ్మడం వలనే నువ్వు బతికావు. ఇలా నీకు తెలియకుండానే ఎప్పుడూ మంచే జరుగుతోంది. అందుకే మీ ఆవిడ తుమ్ము మంచిదే.."
"మరి మా బామ్మ చనిపోవడానికి కారణం ఈ తుమ్మే..దానికి ఏమంటారు..?"
"మీ నాన్నను ఎప్పుడైనా ఈ విషయం అడిగావా..? ఈసారి తప్పకుండా అడుగు"
అప్పుడే తాతారావు నాన్న దగ్గరనుంచి ఫోన్..
"హలో నాన్నా..! ఎలా ఉన్నారు?"
"నేను సూపర్. ఒరేయ్..! నువ్వు కోడలిని ఇబ్బంది పెడుతున్నావంట కదా...మీ ఫ్రెండ్ ఫోన్ చేసి చెప్పాడులే "
"అదేమీ లేదు నాన్నా..!"
"నాకంతా తెలుసులే..! నీ సంగతి కోడలు కూడా చెప్పింది..పాపం ఆమె చాలా బాధపడుతోంది. నీకు ఒక విషయం చెప్పాలి..బామ్మకు ముందునుండి హార్ట్ ప్రాబ్లం ఉంది..దానితోనే ఆవిడ చనిపోయింది..అదే టైంలో ఆవిడ బయటకు వెళ్ళింది. ఈ విషయం ఇంతవరకు ఎవరికీ చెప్పలేదు. కోడలు కోసం ఈ రోజు నీకు చెప్పాల్సి వస్తోంది. నీకు తేలు కరచినా, కాలు విరిగినా, పాము కరిచినా సరే...నీ భార్య తుమ్మే నీకు శ్రీరామ రక్ష..తానే నీ అదృష్ట దేవత"
"నిజం చెప్పినందుకు థాంక్స్ నాన్నా..! ఇక నా భార్యను ఎప్పుడూ ఇబ్బంది పెట్టను.." అంటూ ఫోన్ పెట్టేసాడు
"రమా..! ఇకపైన నేను ఎప్పుడు బయటకు వెళ్ళినా..నువ్వు తుమ్ముతూ ఎదురు రావాలి..ఒక్కటి మాత్రమే" అంటూ నవ్వుతూ అన్నాడు తాతారావు
**********
తాత మోహనకృష్ణ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
యూట్యూబ్ లోకి అప్లోడ్ చేయబడ్డ తాత మోహనకృష్ణ గారి కథలకు సంబంధించిన ప్లే లిస్ట్ కోసం
ఉగాది 2025 కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం:
Profile Link:
YouTube Playlist Link:
నా పేరు తాత మోహనకృష్ణ. నాకు చిన్నతనం నుండి కథలంటే ఇష్టం. చందమామ, వార పత్రికలలో కథలు, జోక్స్ చదివేవాడిని. అలా, నాకు సొంతంగా కథలు రాయాలని ఆలోచన వచ్చింది. చిన్నప్పుడు, నేను రాసిన జోక్స్, కథలు, కొన్ని వార పత్రికలలో ప్రచురింపబడ్డాయి. నేను వ్రాసిన కధలు గోతెలుగు.కామ్, మనతెలుగుకథలు.కామ్ లాంటి వెబ్ పత్రికలలో ప్రచురింపబడ్డాయి. బాలల కథలు, కామెడీ కథలు, ప్రేమ కథలు, క్రైం కథలు రాయడమంటే ఇష్టం.
ధన్యవాదాలు
తాత మోహనకృష్ణ
Comments