నా ఉనికెక్కడ?
Na Unikekkada? - Telugu Inspirational Poem | Naga Suneetha Pokala
నా ఉనికెక్కడ? - తెలుగు ప్రేరణాత్మక కవిత | నాగ సునీత పోకల
Published in manatelugukathalu.com on 02/10/2026
అహింస ఎక్కడ? శాంతి ఎక్కడ? ప్రేమతో గెలవమని చెప్పిన మార్గం మన జీవితాల్లో ఇంకా ఉందా? నాగ సునీత పోకల రచించిన ‘నా ఉనికెక్కడ?’ కవిత సమాజాన్ని ఆలోచింపజేసే ప్రశ్నలను సంధిస్తుంది.
నోట్ల కట్టల మీద కనిపించే బొమ్మను కాదు నేను,
తెల్ల దొరల కబంధ హస్తాల సంకెళ్లను త్రుంచిన
ఓ స్వాతంత్ర్య సమరయోధుడిని నేను.
చేతిలో కత్తులు లేవు, బాంబులు లేవు, ఆయుధాలు లేవు.
ఉన్నది ఒక్కటే — మనసులో శాంతి.
నా బాట అహింస,
నా పాట — శాంతి ముద్దు, యుద్ధాలు వద్దు.
నా మాట — ప్రేమగా జీవించు.
నా అస్త్రం — ఓ చిరునవ్వు.
ఇవే మీ జీవితానికి రక్షక భటులు.
అనుసరించండి, దేశ ఐక్యతకై పోరాడండి.
వద్దు వద్దు పోట్లాటలు
ఇవే మీ జీవిత రాబందులు
త్రుంచు త్రుంచు కులమత భేదాలు,
జీవించు ఐకమత్యంగా.
ఎందుకంత కోపం?
ఎందుకంత రోషం?
ఎందుకంత ద్వేషం?
మనుషులమైనందుకా?
మేధస్సు ఉన్నందుకా?
కోప, ద్వేష, అసూయాగ్నుల సుడిగుండంలో చిక్కిన పడవవై మిగలద్దు.
కుల వివక్ష పెనుభూతాలలో చిక్కినవాడివై నిలవద్దు.
ఎక్కడ శాంతి?
ఏంటీ హింసలు?
ఏమిటీ దారుణాలు?
ఈ నీచ గుణాలను అభ్యాసపరచిన రాక్షస గురువెక్కడ?
నేను నడిచిన బాటెక్కడ?
నేను చూపిన దారెక్కడ?
నేను పాడిన పాటెక్కడ?
తెల్ల దొరల కబంధ సంకెళ్లను త్రుంచినది ఇందుకేనా?
వద్దు వీరా! ఆగు, ఆలోచించు ఒక్కసారి.
ఇవి భారతీయుడి లక్షణాలేమోనని!
భారతీయుడిగా జీవించు,
ప్రగతిని సాధించు.
అటు చూడు పుత్రా! ఆ నీలి ఆకాశం వైపు
కన్నీరు కారుస్తున్న మన సైనికుల ఆత్మలను.
ఇటు చూడు పుత్రా! రక్తంతో తడిసి ముద్దైన మన భూమాత ఎర్రటి శరీరాన్ని.
ఆ వీధి వైపు చూడు మిత్రమా! అనాథల ఆర్తనాదాలను.
ఆ గుడి వైపు చూడు నాయనా! బికారుల ఆకలి కేకలను.
ఇదేనా స్వాతంత్ర్యం?
ఇదేనా సమర రాజ్యం?
దీనికోసమేనా అమరజీవుల ప్రాణత్యాగం?
ఎక్కడ నేను? నీవు నడిచే హింసా బాటలోనా?
నీవు పాడే అశాంతి పాటలోనా?
లేక నీ ద్వేషాసూయాగ్నుల సుడిగుండాల మనసులోనా?
ఎక్కడ నేను? నా అస్తిత్వమెక్కడ?
నా అంతరాత్మ ఎక్కడ?
నా పాటెక్కడ?
నా బాటెక్కడ?
నా మాటెక్కడ?
నా అస్త్రమెక్కడ?
మీకు తెలుసా? వీటిని మింగేసిన మానవ మృగం ఎవరని?
గుండెను పిండేసే చేదు నిజాన్ని ఎలా చెప్పగలను?
అది మీరేనని...
ఓ భారతీయుడా! ఇది నిజమైన స్వాతంత్ర్యం కాదని తెలుసుకో.
నిజమైన పోరాటం కోసం పరితపించు.
నువ్వు చేసే దేశసేవలో నేనుంటాను,
నువ్వు నడిచే అహింసా బాటలో నేనుంటాను,
నువ్వు పాడే శాంతి పాటలో నేనుంటాను.
ఓ భారత పౌరుడా! కన్నీరు కారుస్తున్న మన భూమాతను చూడు.
ఆ తల్లికి ఏమని సమాధానం చెప్పగలవు?
భారత వీరులారా! కళ్ళు తెరవండి.
హింసను విడనాడండి, అహింసను విత్తండి.
అశాంతిని పారద్రోలండి, శాంతికి ఆహ్వానం పలకండి.
ద్వేషంతో కాదు, ప్రేమతో గెలువు.
కత్తితో కాదు, కరుణతో జీవించు.
మోసంతో కాదు, ధర్మంతో నీ విజయగీతాన్ని పాడు.
యుద్ధాలు వద్దు, శాంతితో జీవించు.
ఇదే నా కోరిక.
ఇదే నా ఉనికి.
ఇదే నా అంతరాత్మ.
ఇదే నా కృషికి సరైన ఫలితం.
నీ మార్పు నీ ఇంటికి వెలుగు.
నీ ఇంటిలోని మార్పు నీ ఊరికి వెలుగు.
నీ ఊరి వెలుగు ఈ దేశానికే వెలుగు.
ఆ మార్పు కోసం నీదే తొలి అడుగు కావాలి!
జై హింద్!
=========================================
Andhrapradesh Uniki - Telugu Inspirational Poem | Naga Suneetha Pokala
ఆంధ్రప్రదేశ్ ఉనికి - తెలుగు ప్రేరణాత్మక కవిత | నాగ సునీత పోకల
Published in manatelugukathalu.com on 24/09/2026
అనగనగా ఒక ప్రపంచం ఉంది.
ఆ ప్రపంచంలో 7 ఖండాలున్నాయి.
ఆ ఖండాలలో ఆసియా ఖండం ఒకటి
ఆ ఆసియా ఖండంలో 48 దేశాలున్నాయి.
ఆ దేశాలలో భారతదేశం ఒకటి.
ఆ దేశానికి ఉత్తరాన హిమాలయాలు
తూర్పున బంగాళాఖాతం,
పడమరన అరేబియా సముద్రం
దక్షిణాన హిందూ మహాసముద్రం హద్దులుగా ఉన్నాయి.
ఆ భారతదేశంలో 28 రాష్ట్రాలున్నాయి.
ఆ రాష్ట్రాలలో ఆంధ్రప్రదేశ్ ఒకటి.
ఆ రాష్ట్రానికి ఉత్తరాన ఒడిశా, ఛత్తీస్‌గఢ్‌లు,
తూర్పున బంగాళాఖాతం,
పడమరన కర్ణాటక,
దక్షిణాన తమిళనాడు ఎల్లలుగా ఉన్నాయి.
మెగస్తనీస్, మార్కోపోలో, పేయస్ వంటి విదేశీ యాత్రికులు ప్రశంసించిన రాష్ట్రం ఇది.
శాతవాహనులు, ఇక్ష్వాకులు, చాళుక్యులు, కాకతీయులు, రెడ్డిరాజులు, విజయనగర రాజులు, కుతుబ్‌షాహీలు, నిజాం పాలకులు పాలించిన రాష్ట్రం ఇది.
రుద్రమదేవి పాలించిన వీరగడ్డ ఇది.
శ్రీకృష్ణదేవరాయలు పరిపాలించిన శాంతిగడ్డ ఇది.
నన్నయ, తిక్కన, ఎర్రన, శ్రీనాథుడు, పోతన, పెద్దన, వేమన రచనలు ఆంధ్రవారి సొత్తు.
అన్నమయ్య, త్యాగయ్య, రామదాసు జన్మించిన పుణ్యక్షేత్రమిది.
అందుకే నేనంటున్నాను గోదావరి, కృష్ణమ్మ వంటి నదులతో, సారవంతమైన భూములతో పునీతమైన తెలుగు నేలలో
పుట్టడం మన అదృష్టమని.
***
పరిచయం: నాగ సునీత పోకల
Comments