నాన్నే నవరత్నం
- Dr. Brinda M. N.
- Jul 15
- 4 min read
#NanneNavarathnam, #నాన్నేనవరత్నం, #DrBrindaMN, #డాక్టర్.బృందఎంఎన్., #TeluguInspirationalStories, #ప్రేరణాదాయకకథలు
Nanne Navarathnam - New Telugu Story Written By Dr. Brinda M N
Published In manatelugukathalu.com On 15/07/2025
నాన్నే నవరత్నం - తెలుగు కథ
రచన: డాక్టర్ బృంద ఎం. ఎన్.
ఒక అందమైన పట్టణంలో పెద్దలు కుదిర్చిన సంబంధంతో వైవాహిక జీవితానికి నాంది పలికారు నటేశ్వర్, నవరాగిణి. వారి అన్యోన్య దాంపత్యానికి తీపి గురుతులు జ్ఞానదీపిక, నాద గీతిక. జ్ఞానదీపికను విపరీతమైన ఆంక్షలు కట్టుబాట్లు క్రమశిక్షణతో పెంచగా, గీతిక గారాలపట్టి అయి వెసులుబాటులో పెరిగింది.
తనకు చెల్లి వచ్చింది అని తెలిసిన దీపిక ఆనందంతో గంతులు వేసింది. ప్రాణప్రదంగా చూసుకుంటూ, ఆడుకుంటూ, చెల్లి భవిష్యత్తును గూర్చి కలలు కనేది. దీపిక ఏ పని చేయాలన్నా తండ్రి ప్రోత్సాహం, తల్లి నిరుత్సాహం ఉండేవి. బాల్యము నుండే ప్రతి విషయాన్ని తండ్రితో పంచుకునేది జ్ఞానదీపిక. ఎనిమిదవ ఏట నుండే తరచూ గుడిలో భజన పాటలు పాడేది దీపిక.
"అన్నయ్యగారు! జ్ఞానదీపిక రాకపోతే మాకు చాలా వెలితిగా ఉంటుంది అండి, పంపించండి" భజన సంఘం వారి వినతి.
"పరీక్షలప్పుడు రావడానికి ఎలా కుదురుతుంది చదువుకోవాలిగా, " తండ్రి జవాబు.
ఇది విన్న తర్వాత దీపికకు పాటలు నేర్పించాలని తండ్రి ఆలోచన సత్వరమే తన పాఠశాల చదువు సమయంలో రాసుకున్నా పాటల పుస్తకంలోని ఒక్కొక్క పాటను దీపికకు నేర్పడం ప్రారంభించారు. ప్రతి ఏడు బడిలోని వీడ్కోలు సభలో, బాలల దినోత్సవంలో పాటలు పాడుతూ ఎన్నో బహుమతులు గెలుచుకునేది దీపిక. అక్కను అనుసరిస్తూనే మధ్యలో వెనక్కి తగ్గేది నాదగీతిక. ఇరువురు ఎంతో ఆనందంగా ప్రేమగా ఆప్యాయతతో ఆడుతూ, పాడుతూ ఉండేవారు.
"అక్క.. అచ్చంద్రరాళ్లు ఆడుకుందాం రా"
"చెల్లి.. ముందు శ్లోకము చదువుకున్న తర్వాతే ఆట"
"ఆ, అక్క.. మళ్లీ చదువుకుంటాను లే "
"చెల్లి.. ఈరోజు హోంవర్క్ చేయి"
"అక్క.. మళ్లీ చేస్తానులే ఎక్కడ పోతుంది?"
జ్ఞానదీపికకు పండగలు పబ్బాలు అన్నా చాలా చాలా ఇష్టం, ఇల్లు పీకి పందిరి వేసేది. దీపిక వేసిన సంక్రాంతి రంగవల్లులు చూసి ఇరుగుపొరుగువారు మెప్పుల వర్షం కురిపించే వారు. భోగి మంటలు ఒకవైపు, భోగి పాటలు ఒకవైపు, భోగి పళ్ళతో తలంటుస్నానం చేసి, చక్కెర పొంగలి నైవేద్యం నివేదించి, సంక్రాంతిన గాలిపటాలు ఎగురవేసి, హరిదాసులకు సేవ చేసేవారు కుటుంబ సభ్యులందరూ.
పేరంటానికి వచ్చినవారు "వదిన! దీపిక మనసుతో పలకరిస్తుంది ఎంత ముచ్చటగా ఉంటుందో, చిన్నదాన్ని తుంటరితనం ఎక్కువైపోయింది చూసుకో వదిన, "
నవరాగిణి ముఖం చిట్లించి కొనేది, “అంతేలే వదిన. చిన్నపిల్ల.. తర్వాత నేర్చుకుంటుంది.”
తెల్లారున తండ్రి కనిపించకపోయేసరికి,
"అమ్మా! నాన్న ఎక్కడికి వెళ్లారు?”
“లైన్ మీద పోయారు అమ్మ"
తల్లి జవాబుతో భయపడింది దీపిక.
అంత చిన్న రైల్వే ట్రాక్ మీద తండ్రి ఎలా అంత దూరం వెళ్తారు, నాన్న ఎక్కడన్నా పడిపోతే నాన్నకు ఏమన్నా అయితే.. అమ్మో.. అంటూ ఆలోచనతో జ్వరం వచ్చేసింది దీపికకు.
నటేశ్వర్ రైల్వే ఉద్యోగి కావడంతో డ్యూటీ పైన తనిఖీకి వెళ్లేవారు. దీపికకు తండ్రి మాటే వేదవాక్కు. దీపిక పాఠశాల నుండి నాన్న కార్యాలయానికి వెళ్లి బడిలో జరిగిన తరగతుల విషయాలను గూర్చి చెప్పి వచ్చేది ఇంటికి.
"నటేశ్వర్ సార్, మీరు చాలా అదృష్టవంతులు అండి, జ్ఞానదీపిక మీకు కొడుకుతో సమానం, " కార్యాలయంలోని వారి మాట. ఆ రోజు నుండి దీపికా మగరాయుడిలా మారిపోయింది. ప్రతి ఆదివారం సంతకి తీసుకెళ్ళి కాయగూరలు, ఆకుకూరలు కొనుగోలు చేసే విధానాన్ని వివరించే వారు తండ్రి దీపికకు. వయసు పెరిగే కొద్దీ పెంపక ధోరణిలో పెనుమార్పులు వచ్చాయి.
గీతిక తప్పులు చేసినా మందలించకపోగా దీపికను సర్దుకొమ్మని చెప్పేవారు తల్లిదండ్రులు. ప్రతి విషయంలో తండ్రి ప్రోత్సాహం తల్లి నిరుత్సాహం వలన దీపిక జీవితం త్రిశంకుస్వర్గం గా తయారయింది. పిన్న వయస్సులోనే రామాయణ, భారత, భాగవతాలను జీర్ణించుకున్న దీపికకు బడి, గుడి, మాతాపితరుల సేవ, సామాజిక సేవ పరమావధిగా జీవితాన్ని మలుచుకుంది. తల్లిదండ్రులను ఒప్పించి చెల్లిని కూడా పీజీ చదివేలా చేసింది దీపిక.
కాలచక్రం కొత్తపుంతలు తొక్కడం విదితమే. పట్టుదల ఆత్మవిశ్వాసం క్రమశిక్షణతో పెరిగిన దీపిక ఉన్నత చదువులను అభ్యసించి, ప్రభుత్వోద్యోగంలో స్థిరపడింది. కనుమ రోజే తనకు అపాయింట్మెంట్ ఆర్డర్ వచ్చింది.
నవరాగిణి సంతోషానికి అవధుల్లేవు. చుట్టాలు స్నేహితులతో రాగిణి ఆనందాన్ని పంచుకుంది. కానీ నటేశ్వర్ దీపిక ముందు ఎప్పుడూ తనను మెచ్చుకునేవారు కాదు. ఆఫీసర్ పదవి కావడంతో సంతకాలకు వచ్చినప్పుడు
"అమ్మ! ఇదిగో దీపిక ఈ ఆకుపచ్చని కలముతో సంతకం చేయి"
"అబ్బా! నాన్న! ఏదో ఒకటిలే, "
"కాదమ్మా దీని విలువ ఇంకా నీకు తెలియదు", ఇంటికి సంతకం కోసం ఎవరైనా వస్తే ఠక్కున కలము ఇచ్చేవారు నటేశ్వర్.
బాల్యంలో బంధువుల రాకపోకలు అమ్మమ్మ ఊరికి వెళ్ళినప్పుడు చుట్టాల ఆప్యాయత, ప్రేమానురాగాలను చవిచూసిన దీపికకు, అవన్నీ నేటి కాలంలో కొరవడడం చూసి చాలా బాధపడింది.
జన్మనిచ్చిన వారికి వార్ధక్యము దగ్గర పడే కొద్దీ బంధువుల రాకపోకలు పలుచన బడ్డాయి. బెల్లం ఉన్నంతవరకే చీమలు ఈగలు ముసురు తాయి. ఇంటికి మగతోడు అవసరం కావున ఇల్లరికపు అల్లుడిని తెచ్చుకోవాలి అనుకున్నారు దంపతులు.
ఎన్నో విలువైన ఆశయాలు, ఉన్నత ఆలోచనలు, విశాల హృదయం ఉన్న జ్ఞానదీపిక ను షోకేసులోని బొమ్మను చేసి అంగట్లో అమ్మకానికి పెట్టారు తల్లిదండ్రులు. తన ఆత్మాభిమానాన్ని చంపుకొని, పెద్దల మనసు నొప్పించడం ఇష్టంలేక సరే అన్నది దీపిక.
"మీకు నేనంటే ఇష్టమేనా ?"
"అలా కాదు అమ్మ నాన్న నాకు అన్ని సౌకర్యాలు ఇస్తారు కదా!" ఒకరి జవాబు.
"మీరు నన్ను ఎందుకు చేసుకోవాలనుకుంటున్నారు?"
"ఉచితంగా అన్ని సదుపాయాలు ఉన్నప్పుడు ఎవరూ వదులుకుంటారండి!" ఇంకొకరి జవాబు.
"తమరికి నేను ఏవిధంగా నచ్చాను తెలుసుకోవచ్చా?"
"పైసామే పరమాత్మ హై, డబ్బుకు లోకం దాసోహం, లక్ష్మీదేవి తమ ఇంటి తలపు తడ తానంటే వద్దనే మూర్ఖులు ఉంటారా దీపికా!" మరొకరి జవాబు.
ఇలాంటి జవాబులను చవిచూసిన దీపిక ఖరాఖండిగా,
"నాన్న! నా మనసును బాగా ఎరిగిన మీరు దయచేసి నన్ను మభ్యపెట్టకండి. నన్ను ఆధ్యాత్మిక సాగరంలో ఉండనివ్వండి. "
"పదవ తరగతి పాస్ అవ్వగానే పెళ్లి చేసి పంపి ఉంటే బాగుండేది, పెద్ద చదువులు చదివించి తప్పు చేశామేమో, " నవరాగిణి కోపంతో రుసరుస లాడి దీపికను మందలించింది.
ఈ తతంగానికి కొద్ది సంవత్సరాల క్రితమే నాద గీతిక యవ్వన ప్రాయంలో అడుగిడింది. తనది అందమైన బాహ్య సౌందర్యం. అక్క ను చూడడానికి వచ్చిన వారందరినీ ఆకట్టుకుంది.
తను ఒక చీకటి ప్రపంచాన్ని సృష్టించుకుని మత్తులో మునిగి తేలుతూ ఉండేది. తల్లిదండ్రుల మాట పెడచెవిన పెట్టింది. స్నేహితులతో సరదాగా షికార్లు ఆడుతూపాడుతూ తేలి ఆడింది. రక్తసంబంధం ఉన్నప్పటికీ అక్క చెల్లెలు ఇద్దరిలో తారతమ్యాలు చాలా ఎక్కువ.
"గీతిక, నువ్వు వెళ్లే దారి సముచితంగా లేదు, గొప్ప గొప్ప సంబంధాలు వస్తున్నాయి, వివాహం చేసుకుని ఆనందమయ జీవితం గడపమ్మా! జ్ఞానదీపిక ప్రేమతో చెల్లిని అర్థించింది.
"నా జీవితం, నా ఇష్టం, ఏం నీలాగా తల్లిదండ్రుల కోసం త్యాగం చేయాలా?, అయినా టీనేజీని ఎంజాయ్ చేయనీ నీకు ఇవేమీ అర్థం అవుతాయిలే, " వెటకారంగా పలికింది గీతిక.
గీతిక వాలకం చూసి తల్లిదండ్రులు మంచం పట్టారు. కోపంతో పళ్లు పటపటా కొరికే నాన్న అంటే ప్రాణం, నిరుత్సాహపరిచే అమ్మ అంటే ప్రేమ దీపికకు. వారి సేవలో జీవితాన్ని పునీతం చేసుకుంది. చిన్నప్పటి నుండి నాన్న తనను డైరెక్టుగా మెచ్చుకోవాలని ఆశపడ్డ దీపికకు నెరవేరని కలగా మిగిలిపోయింది. కారణం పక్షపాతంతో నోరు, కుడి కాలు, చేయి పడిపోయి మంచానికి అతుక్కున్న నాన్న చెప్పాలనుకున్నా చెప్పలేరు.
"నాన్నా! మొన్న గురుపౌర్ణిమన సాయిబాబా గుడిలో పాడిన భక్తి గీతాలు"
సంగీత విభావరిలో దీపిక పాటలు పాడే ఫోటోలను చూసి వాటిని ముద్దులతో తడిపేసాడు నటేశ్వర్, కవితలను ఎడమచేతితో ఎదకు హత్తుకున్నారు, వ్యాసాలను చూసి నయనాలతో నవ్వారు.
బోసినవ్వుల నాన్న నవ్వితే నవరత్నాలను పొదివి పట్టుకుంటుంది జ్ఞానదీపిక.
"నాన్నా! నాన్నా! నాన్నా! నాన్నా!"
తనకు నాన్నే జీవితం, అందుకే ఎప్పటికీ నాన్నే, నవరత్నం.
నీతి: తల్లిదండ్రులను గౌరవించండి, ప్రేమించండి, సేవించండి, వారే మన కళ్ళ ముందు కనిపించే ప్రత్యక్ష దైవాలు, పెద్దలు కూడా పిల్లలను తారతమ్యాలు లేకుండా పెంచండి.
"జై తెలుగుతల్లి! జై భరతమాత"
సమాప్తం
డాక్టర్ బృంద ఎం. ఎన్. గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
విజయదశమి 2025 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx/docs రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత్రి పరిచయం: డాక్టర్ బృంద ఎం. ఎన్.
కవయిత్రి, రచయిత్రి, గాయని,
స్కిట్ డైరెక్టర్, చిత్రకారిణి
15 సంవత్సరాలుగా నిరంతర తెలుగు భాషా పరిరక్షణ కొరకు పాటుపడుట
భారతీ సాహితీ సమితిలో ప్రధాన కార్యదర్శిగా ఉండి ఆధునిక ప్రాచీన సాహిత్యంపై పని చేయడం అలాగే విద్యార్థులకు సుమతీ, వేమన, భాస్కర శతక పద్య పోటీలు నిర్వహించుట, తెలుగు సాహితీ మూర్తుల జయంతి వేడుకలు జరిపి వారి సేవలను గురించి సమాజానికి తెలియపరచుట, సందేశాత్మక కథలు, నీతి కథలు వ్రాసి విజేతలగుట, ప్రపంచ తెలుగు మహాసభల్లో చురుకుగా పాల్గొని (delegate) పెద్దవారి ప్రశంసలు పొందుట, యువతను ఉద్దేశించి రచనలు చేయుట, భారతదేశ ఔన్నత్యాన్ని దశ దిశల చాటుట, ఆన్లైన్ మరియు ఆఫ్లైన్ కవి సమ్మేళనంలో పాల్గొనుట తదితరమైనవి.
Comments