విశ్వ నరుడు
Viswa Narudu - Telugu Emotional Poetry | Thokala Rajesham
విశ్వ నరుడు | తెలుగు భావోద్వేగ కవిత | తోకల రాజేశం
Published in manatelugukathalu.com on 28/09/2026
(సెప్టెంబర్28,జాషువా జయంతి సందర్భంగా)
తెలుగు సాహిత్యంలో సామాజిక చైతన్యానికి బలమైన గొంతుకగా నిలిచిన మహాకవి గుర్రం జాషువాను స్మరించుకుంటూ తోకల రాజేశం రచించిన కవిత ‘విశ్వ నరుడు’.
జాషువా కవిత్వంలోని సరళత, అట్టడుగు వర్గాల పట్ల ఆర్తి, కులవివక్షపై నిరసనను ఈ కవిత హృద్యంగా ఆవిష్కరిస్తుంది.
సెప్టెంబర్ 28 జాషువా జయంతి సందర్భంగా ఆయన సాహిత్య వ్యక్తిత్వానికి అక్షరాలతో అర్పించిన కవితా నివాళి ఇది.
అతడు
ఊరి చివరి గడ్డి గుడిసె మీద పాడిచిన
కవిత్వపు పొద్దు
తెలుగుతల్లి నెత్తిమీద
బంగారు పద్యాలను గుమ్మరించిన మహాకవి
వెలివాడ గడప మీది నుంచి సరాసరి
ఊరి నడిబొడ్డు మీదికి దునికిన
తోలు డప్పు మీది దరువు
అతని కవిత్వం
బరువైన భాషతోనూ
మోయలేని అలంకారాలతోనూ
నడుము విరిగిపోయిన పద్యానికి వైద్యం చేసి
అచ్చతెలుగు పదాల రుచిని చూపించిన వాడు
రాజులతో దేవాధిదేవతలతో
వారి ప్రణయ గాధలతో
పాచి కంపు కొడుతున్న కవిత్వాన్ని
అట్టడుగు మనిషి కన్నీటి చుక్కలతో
పరమ పావనం చేసిన వాడు
ఒక పక్క కులం కత్తి
గుండెలో కుమ్ముతుంటే
మరోపక్క కారే నెత్తురును
కవిత్వం శాంతి పావురానికి పూసి
దేశపు జెండాగా ఎగిరేసిన వాడాయన
తన నోట్లోనుంచి రాలిన పద్యం అంటరానిదని
పండితులంతా పక్కదార్లు పట్టిన చోటనే
కాలికి గండపెండేరాలు పూయించుకున్న ఘనుడాయన
అతడు కవిత్వాన్ని-జీవితాన్ని
రెంటినీ గెలిచిన విశ్వ నరుడు.
-----------------------------------------------------------------
Peekulata - Pillallara - Telugu Emotional Poetry | Thokala Rajesham
పీకులాట – పిల్లల్లారా! | తోకల రాజేశం తెలుగు కవితలు
Published in manatelugukathalu.com on 07/09/2026
మనిషి మనసులో జరిగే సంఘర్షణకు తుదీ మొదలూ ఎక్కడో చెప్పడం కష్టం. అదే సమయంలో తెలియని ప్రపంచాన్ని ప్రశ్నలతో అన్వేషించడమే జ్ఞానానికి ఆరంభం. ఈ రెండు భిన్నమైన జీవన కోణాలను కవి తోకల రాజేశం తన కవిత్వంలో ఆసక్తికరంగా ఆవిష్కరించారు.
‘పీకులాట’ కవితలో మనసును వెంటాడే చింతలు, మనుషుల మధ్య ఎదురయ్యే కిరికిరి, జీవితాంతం కొనసాగే అంతర్మథనాన్ని తెలంగాణ మాండలికంలోని సహజమైన పదాలు, బలమైన ఉపమానాలతో చిత్రించారు. ‘పిల్లల్లారా!’ బాలగేయంలో మబ్బుల్లోని నీటి జాడ నుంచి విత్తులో దాగిన చెట్టు వరకు ప్రకృతిలోని ప్రతి అంశాన్నీ ప్రశ్నిస్తూ తెలుసుకోవాలని, గురువులను అడిగి జ్ఞానాన్ని సంపాదించాలని చిన్నారులకు సందేశమిచ్చారు. ఒకటి జీవితపు సంక్లిష్టతను ఆవిష్కరిస్తే, మరొకటి జిజ్ఞాసతో ఆ జీవితాన్ని అర్థం చేసుకునే మార్గాన్ని చూపుతుంది.
పీకులాట
బొత్తిగ మనసుల మనసుండది
గుల్ల చెరువుల నీళ్లిగ్గినప్పుడు
బురుదల కొట్టుకునే మొట్టపిల్ల లెక్క
గుండెకాయ గిలగిల కొట్టుకుంటది
పాతాళ గరిగెతోని ఎంతగనం తోడినా
తప్పిపోయింది గింతసుతం తలుగది
నీటి స్పర్శ సోకని పొలం గొంతులోని దుఃఖం
లోపటెక్కడో పాయలు తెగి పారుతుంటది
పెయ్యి మీది నుంచి బరువుగా ఒరుసుకుంట
ఎడారి పాము పాకుతునట్టు
గుండెనుయ్యిలోని తడినెవడో
గొట్టం పెట్టి పీల్చినట్టు
లోపటా బయటా సూదిపోట్ల సలపరింత
సిన్నప్పడు సమ్మక్క జాతర్ల
చేతిలోనుంచి జారిపోయిన రూపాయి బిళ్ళలా
తెలియనిదేదో రప్పన జారిపోతది
మనాది ఎక్కడ పుడుతదో గానీ
పందిరిమీది బీరతీగె తీరి
మనసంతా అల్లుకపోతది
చింతచెట్టు మీది నుంచి దిగని కోతిలా
చింత వింతవింతల విన్యాసాలతో
మనోఫలకాన్ని పొక్కిలి పొక్కిలి చేస్తది
నది పుట్టువడిని
గిది అని గీతగీచి చూపలేనట్టు
ఈ పీకులాటకు
తుదీ మొదలు సక్కగ ఎరుక గాదు
మనుషుల మధ్య బతుకుడు ఎట్లనైనా తప్పది
మనుషులతోని కిరికిరి గూడ తప్పది
గందుకే
బతుకు పొడుగూతా
ఈ పాకులాట పీకులాట సుతం తప్పది
పిల్లల్లారా! ( బాల గేయం)
పిల్లల్లారా!పిల్లల్లారా!!
మల్లెచెట్టు పూరెమ్మల్లారా!
తెలియని వెన్నో ఉన్నాయి
ప్రశ్నలొ అవి దాగున్నాయి
మబ్బుల కడుపున నిదురించే
నీటి జాడనే అడగండి
చెట్టు కొమ్మలో పుష్పించే
కాయ నీడనే తెలియండి
కొండల గుండెలొ ఏముందో
స్టెతస్కోపుతో వినరండి
బండరాయిలో దాగున్న
శిల్పములేవో చూడండి
విత్తు లోపల ఒదిగిపోయిన
చెట్టు పుట్టుకను వెతకండి
మట్టి లోపలి మర్మమేమిటో
గట్టి ప్రయత్నము చేయండి
పాఠశాలలో గురువులను
తెలియనివన్నీ అడగండి
ప్రశ్న లోపలే జ్ఞానమున్నది
జీవితమంతా నమ్మండి
***
పాఠకులు ఇప్పుడు మా వాట్సాప్ ఛానల్ ఉచితంగా ఫాలో చెయ్యడం ద్వారా మనతెలుగుకథలు.కామ్ లో ప్రచురింపబడే అన్ని కథలు, కవితలు, ప్రత్యేక వ్యాసాలు, సీరియల్ ఎపిసోడ్స్ వీటన్నిటికి సంబంధించిన లింక్స్ చూసి, కావలసిన వాటిని క్లిక్ చేసి చదువుకోవచ్చును.
మా whaatsApp ఛానల్ ను ఫాలో చెయ్యండి. మీ సన్నిహితులకు షేర్ చెయ్యండి.
తోకల రాజేశం గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం: నా పేరు తోకల రాజేశం.
తోకల రాజేశం మంచిర్యాల జిల్లాలోని నెన్నెల మండలం ఆవడం గ్రామానికి చెందిన వారు. ప్రస్తుతం ప్రభుత్వ ఉపాధ్యాయునిగా పనిచేస్తున్నారు.9 వ తరగతి చదువుతున్నపటి నుంచే పద్యాలు రాస్తున్నారు.వీరి ఊరు ఆవడంలో చదివే పిల్లలు 20 మందితో శతకాలు రాయించారు.ఇప్పటివరకు వీరు తెలుగు బాల శతకం(2006),చెమట చుక్కలు(నానీలు-2010),పాతాళ గరిగె(సాహిత్య వ్యాసాలు-2013),అడవి దీపాలు(వచన కవిత్వం-2017),మంచిర్యాల జిల్లా సాహిత్య చరిత్ర(తెలంగాణ సాహిత్య అకాడెమీ ప్రచురణ-2020),కొబ్బరి నీరా! శతకం(పదిమందితో కలిసి-2023),మట్టి విజయం(పద్యకవిత్వం-2024),ఆట సాగుతూనే ఉంటది(వచన కవిత్వం-2026)అనే పుస్తకాలు ముద్రించారు.తెలుగులో వెలువడుతున్న ప్రసిద్ధ దిన, వార, మాస పత్రికలన్నింటిలోనూ రాజేశం రాసిన కవితలు, వ్యాసాలూ వచ్చాయి. తెలుగునాట ప్రతిష్టాత్మక ఎక్స్ రే ప్రధాన పురస్కారం(2012),సహస్ర వసంతాల పద్య పురస్కారం(2012),సాహితీ శిరోమణి పురస్కారం(2015),సినారె పురస్కారం(2023),తో పాటు రాష్ట్రస్థాయిలో పలు పురస్కారాలు అందుకున్నారు. ప్రస్తుతం తెలంగాణ రచయితల వేదికకు మంచిర్యాల జిల్లా అధ్యక్షునిగా ఉన్నారు.
Comments