నదీతీరం!
Nadeetheeram - Telugu Poem | A. Annapurna
నదీతీరం! - తెలుగు కవిత | ఏ. అన్నపూర్ణ(ఉత్తమ అభ్యుదయ రచయిత్రి)
Published in manatelugukathalu.com on 04/10/2026
సాయం సందెవేళ నదీతీరాన ప్రకృతి తన అందాలన్నింటినీ ఒక్కచోట పరచినట్టు అనిపిస్తుంది. మబ్బులు కమ్మిన ఆకాశం, చల్లని గాలి, పూలవనాల చుట్టూ ఎగిరే తూనీగలు, చెట్లకొమ్మలపై చేరిన పక్షులు, నదిలో నెమ్మదిగా కదిలే అలలు, నీటిపై వజ్రాల్లా మెరిసే సూర్యకిరణాలు — ఈ మనోహర దృశ్యాలను కవయిత్రి అన్నపూర్ణ ‘నదీతీరం’ కవితలో అందంగా ఆవిష్కరించారు. ప్రకృతిని ఆస్వాదించే మనసుకు స్వర్గం ఎక్కడో లేదని, మన చుట్టూ ఉన్న ప్రకృతి సౌందర్యంలోనే ఉందని ఈ కవిత గుర్తుచేస్తుంది.
సాయం సందెవేళ మబ్బులు కమ్మిన ఆకాశం చల్లగాలితో సరాగాలు ఆడుతోంది
తూనీగలు పూలవణాలచుట్టూ ఉల్లాసంగా ఎగురుతున్నాయి
విరిసిన తోటలో పూలన్నీ అతిధులకు స్వగాతాలు పలుకుతున్నాయి
వర్షంలో తడవాలని అరవిరిసిన వీరులు తహ తహ లాడుతున్నాయి
గగనవిహారం చేసే పక్షులు చెట్లకొమ్మలమీద చేరి ఊసులాడుకుంటున్నాయి
నదిలో అలలు గాలికి బద్ధకంగా కదులుతున్నాయి
రోజంతా వెలుగును పంచి అలసిన ఆదిత్యుడు పడమట ఇల్లుచేరాలని ఆత్రపడుతున్నాడు
దినకారుని కిరణాలు నీటిమీద పడినపుడు పట్టపగలు నక్షత్రాలు
కిందకు దిగివచ్చినట్టు వజ్రాల్లా మెరుస్తూఊంది
సందెగాలివీచి సన్నజాజుల పరిమళాన్ని అందరికి పంచుతూపరవశింపచేస్తున్నవి వెన్నెలకొసం వేచివున్న చకోరాలు విరహ వేదనతో అలమటిస్తున్నాయి.
నదీతీరాన ప్రక్రుతి అందాలు
పరికిస్తున్న నాకు స్వర్గమంటే ఎక్కడోలేదు అనిపించింది .
=================================
Majileelu - Telugu Poem | A. Annapurna
మజిలీలు - తెలుగు కవిత | ఏ. అన్నపూర్ణ(ఉత్తమ అభ్యుదయ రచయిత్రి)
Published in manatelugukathalu.com on 24/07/2026
జీవితం ఒక నిరంతర ప్రయాణం. ప్రతి మజిలీ ఒక కొత్త అనుభవాన్ని, ఒక కొత్త పాఠాన్ని మనకు అందిస్తుంది. బాల్యం నుంచి వృద్ధాప్యం వరకు మనిషి ఎదుర్కొనే మార్పులు, బంధాలు, జ్ఞాపకాలు, సవాళ్లు, ఆశలు, అనుభవాల సారాంశాన్ని హృదయాన్ని తాకే పదాలతో చెప్పిన తాత్విక కవితే "మజిలీలు".
జీవన యానంలో మజిలీలు ఎన్నో.
ఎక్కడో పుట్టి, ఎక్కడో పెరిగి, మరెక్కడో చదివి, వేరొక చోట నివసిస్తాము.
బాల్యం, కౌమారం, యవ్వనం, నడివయసు దశలు దాటి ఎన్నో అనుభూతులు పోగుచేసుకుంటాము.
పిల్లల చదువులు, వారి అభివృద్ధి కోసం పాటుపడతాము;
మారుతున్న ప్రపంచానికి ప్రతీకలు వారు.
కొత్త చోట నూతన పరిచయాలు, గతించిన జ్ఞాపకాలను పంచుకుంటాము; వినోదాలు, విహారాలు, వేడుకలతో కొంతకాలం గడుస్తుంది.
ఆరోగ్య సూత్రాలతో ప్రయోగాలు చేయడం, నడక పేరుతో ప్రకృతిని ఆస్వాదించడం.
జీవితం పూలబాట కాదు సుమా అంటూ కలవరపరిచే సంఘటనలు కొన్ని, జీవితానికి అర్థం చెబుతాయి.
అన్నీ అధికమించగల స్థైర్యం, ధైర్యం అలవర్చుకుని మనుగడ సాగించాలి.
జీవితం ఎప్పుడూ ఏదో ఒకటి నేర్పుతూనే ఉంటుంది.
మనిషి నిత్య విద్యార్థిగా నేర్చుకుంటూనే ఉంటాడు.
కొందరు దూరం అవుతారని దిగులు వద్దు, కొత్తగా చేరువ అయ్యేవారు ఉండొచ్చు.
మనుషులు దూరమైనా మనసులు దగ్గరగానే ఉంటాయి; దూరాభారాలు అయినా, దేశాంతరాలు అయినా, గాఢంగా అల్లుకున్న పొదరింటి బంధంలో అందరమూ బందీలమే!
=================================
Roju Chuse Andalu - Telugu Poem | A. Annapurna -
రోజూ చూసే అందాలు - తెలుగు కవిత | ఏ. అన్నపూర్ణ(ఉత్తమ అభ్యుదయ రచయిత్రి)
Published in manatelugukathalu.com on 25/03/2026
రోజూ మనకు కనబడే వింతలు ...ఉషోదయంతో మొదలై
సాయం సంధ్యతో జతగట్టిన అందాలు!
ఆకాశంలో మారే వర్ణాలను చూసారా ఎవరైనా
ఆస్వాదించే మనసుంటే ప్రతిరోజూ ఆనందమే!
మనసుకి సంతోషం కలిగినప్పుడు
అణువణువునా అందాలు కనిపిస్తాయి
కలతచెందిన మనసుకి రోజు భారంగా గడుస్తుంది
మనసుకి గాయమైతే ప్రకృతికూడా రోదిస్తున్నట్టు అనిపిస్తుంది
నిశిరాత్రిలో కమ్ముకున్న మంచుతెరలు
సూర్యోదయంతో కరిగి హరిత పత్రాలపై బిందువులై మెరుస్తాయి
ఈ అందాలను చూస్తుంటే మైమరచి పోతాము
చీకటి ముసురుకునే సంధ్యవేళ మిణుకుమంటూ
ఆకాశంలో మెరిసే నక్షత్రాలు ఎంత అందాన్ని పంచుతాయో
మనసుకి ఆహ్లాదం కనులకు విందు రేపటిపై ఆశ కలిగిస్తాయి
అమావాస్యరోజుల్లో చుక్కలు కొలువుతీరి చక్కదనాలు ప్రదర్శిస్తే
పున్నమి రోజులలో చంద్రుడు వారిని అక్కున చేర్చుకుంటాడు
మనిషి మనుగడకు సూర్య చంద్రులు ప్రక్రుతి సహకరిస్తాయి
వాటిపట్ల మానవజాతి ,అన్నిప్రాణులు కృతజ్ఞత కలిగి ఉంటూ
పర్యావరణాన్ని కాపాడుకోవటం మన అందరి కర్తవ్యమ్!
------------------------------------------------------------------------------
Pula Manasu Antharangam - Telugu Poem | A. Annapurna - పూల మనసు అంతరంగం - తెలుగు కవిత | ఏ. అన్నపూర్ణ(ఉత్తమ అభ్యుదయ రచయిత్రి)
Published in manatelugukathalu.com on 16/03/2026
''అందమే ఆనందం, ఆనందమే జీవిత మకరందం...'' అన్నాడో కవి.
అక్షరాలా ఇది నిజం!
నీటిలో ఈదులాడే రంగు రంగు చేపలున్న నీటి తొట్టెను తెచ్చి పెట్టి రోజూ
వాటిని చూస్తుంటే కాలమే తెలియదు!
ఒక మొక్కను నాటి, నీరు పోసి, అది చిగురులు వేసి, మొగ్గలు తొడిగితే
చెప్పలేని మమకారం!
గాలివాటానికి కొట్టుకువచ్చే గింజలు, వర్షం నీరు తగలగానే మొలకెత్తిన గడ్డిపూలే
అయినా ఎన్నెన్నో రంగులతో హొయలు పోతూ ఉంటాయి!
అందంగా లేకపోవచ్చు, ఊరేదో పేరేదో తెలియకపోవచ్చు, దాన్ని ఎవరూ పట్టించుకోకపోవచ్చు,
కానీ పరిమళం వెదజల్లి దగ్గరకు రప్పించుకుంటాయి!
పూల రాణి గులాబీ అంటారు, కానీ నీటిలోని తామర పూవులు, శ్రావణంలో పూసే చామంతులు
తక్కువా? దేని అందం దానిదే కదా!
భ్రమరానికి తేడా లేదు, తేనె కోసం వెతుకుతుంది, మనసైన వాడు తాకితే చాలని
మురిసిపోతాయి పూల కన్నెలు!
అందాల ఆరబోత పూలకు సహజం, ఎవరైనా పులకరించి పోతారు, కొందరు అలంకరణకు వాడితే,
మరికొందరు చెట్టుకే వదిలేసి సంతోషపడతారు!
ప్రకృతి వరప్రసాదాలు వాడుకోవడంలో మనుషులు రకరకాలుగా ఉంటారు.
కొందరు మంచికి ప్రాధాన్యం ఇస్తే, మరికొందరు నిర్దయగా నాశనం చేస్తారు.
ఏదైనా భరిస్తుంది, 'నా పుట్టుక ధన్యం' అనుకుంటుంది!
*******************
-ఏ. అన్నపూర్ణ
Comments