భ్రమ
- Phani Shyam Devarakonda
- Dec 19, 2025
- 4 min read
#PhaniShyamDevarakonda, #Bhrama, #భ్రమ, #TeluguInspirationalStories, #ప్రేరణాదాయకకథలు
Bhrama - New Telugu Story Written By Phani Shyam Devarakonda Published In manatelugukathalu.com On 19/12/2025
భ్రమ - తెలుగు కథ
రచన: ఫణి శ్యామ్ దేవరకొండ
వేణు, ఎప్పుడూ తన మొబైల్ ఫోన్లోనే మునిగిపోయి ఉండేవాడు. బయట ఏం జరుగుతుందో కూడా పట్టించుకోకుండా, ఫోన్లోని ఆటలే లోకంగా బతికేవాడు. ఒకరోజు వాళ్ల అమ్మ లత, "వేణూ! మనం సినిమాకి వెళ్లాలి, టైమ్ అవుతోంది. లేట్ అయితే 'మహావతార్ నరసింహ' సినిమా పోతుంది. త్వరగా తయారవ్వాలి, " అని చెప్పింది.
కానీ వేణు ఆటలోనే ఉన్నాడు. "ఒక్క నిమిషం అమ్మా, ఈ గేమ్ అయిపోగానే వస్తా, " అన్నాడు.
అంతలోనే వాళ్ల నాన్న రాజేష్ గదిలోంచి బయటకు వచ్చాడు. వేణు ఇంకా యూనిఫామ్లోనే ఫోన్ చూడటం గమనించి, ఆయనకు చాలా కోపం వచ్చింది. "ఎప్పుడూ ఆ ఫోనేనా? దానివల్ల ఏం లాభం? టైమ్ వేస్ట్ తప్ప! ముందు వెళ్లి బట్టలు మార్చుకో, లేకపోతే సినిమా లేదు, " అని గట్టిగా అరిచాడు. వేణు భయంతో ఏడుస్తూ తన గదిలోకి వెళ్ళిపోయాడు.
థియేటర్లో 'మహావతార్ నరసింహ' సినిమా చూస్తున్నప్పుడు, వేణు ఒక విషయం గమనించాడు. సినిమాలో ప్రహ్లాదుడు దేవుడిని పూజిస్తుంటే, వాళ్ల నాన్న హిరణ్యకశిపుడు కోప్పడుతున్నాడు. అది చూసి వేణుకి ఇలా అనిపించింది: ‘ప్రహ్లాదుడికి దేవుడంటే ఎంత ఇష్టమో, నాకు మొబైల్ అంటే అంత ఇష్టం. మా నాన్న కూడా హిరణ్యకశిపుడిలాగే నన్ను కోప్పడుతున్నారు.’
ఆ రోజు నుండి, వేణుకి మొబైల్ అంటే కేవలం ఆటవస్తువు కాదు, అది తన దేవుడు అనిపించడం మొదలైంది. తన నాన్నేమో ఆ దేవుడిని తన నుండి దూరం చేస్తున్న హిరణ్యకశిపుడు అని అనుకున్నాడు. ఒకరోజు రాత్రి, ఇంట్లో అందరూ నిద్రపోయాక, హాల్లో ఛార్జింగ్ పెట్టి ఉన్న మొబైల్ దగ్గరకు వెళ్లి, "నాన్నా, నన్ను కాపాడు" అని దానికి దణ్ణం పెట్టుకున్నాడు. రహస్యంగా దాన్ని తీసుకెళ్లి తన దిండు కింద దాచుకున్నాడు. తరువాత రోజు ఉదయం, రాజేష్ తన ఫోన్ కనపడకపోయేసరికి వెతికాడు. అది వేణు దిండు కింద దొరికింది. ఆయనకు కోపం కట్టలు తెంచుకుంది. "దొంగతనం కూడా చేస్తున్నావా?" అని అరిచాడు.
"నేను దొంగతనం చేయలేదు! నువ్వే హిరణ్యకశిపుడివి, నా ఇష్టాన్ని దూరం చేస్తున్నావు!" అని వేణు ఏడుస్తూ ఎదురు చెప్పాడు. ఆ మాటలకు రాజేష్ ఆశ్చర్యపోయి, ఫోన్ను తీసుకుని బీరువాలో పెట్టి తాళం వేశాడు.
ఆ రాత్రి రాజేష్ చాలా బాధపడ్డాడు. "నేను వాడి మంచి కోరే కదా ఇంత కఠినంగా ఉంటున్నాను. వాడు నన్ను అలా అంటాడేంటి?" అని భార్య లతతో అన్నాడు.
"ఫర్వాలేదండి, వాడు చిన్నపిల్లాడు. మనమే ఓపికతో చెప్పాలి, " అని ఆమె ధైర్యం చెప్పింది.
కొన్ని రోజుల తర్వాత, ఒక రాత్రి రాజేష్కు ఆఫీస్ నుండి అర్జెంట్గా ఫోన్ కాల్ వచ్చింది. అతను పనిలో పడి, ఫోన్ పెట్టిన బీరువాకు తాళం వేయడం మర్చిపోయాడు.
ఇది గమనించిన వేణు, ఇదే మంచి సమయం అనుకుని, మెల్లగా గదిలోకి వెళ్లి బీరువాలోంచి ఫోన్ తీశాడు. ఫోన్ ఆన్ చేయగానే, "మీకు ఇష్టమైన గేమ్స్ అన్నీ ఫ్రీగా డౌన్లోడ్ చేసుకోండి!" అని ఒక మెసేజ్ వచ్చింది. అది తన దేవుడు పంపిన వరం అనుకుని, వేణు ఆ లింక్ మీద నొక్కాడు. ఏదో యాప్ డౌన్లోడ్ అయ్యి, మాయమైపోయింది. ఏమీ అర్థం కాక, నాన్న వస్తాడనే భయంతో ఫోన్ను మళ్ళీ బీరువాలో పెట్టేసి పడుకున్నాడు. మరుసటి రోజు ఉదయం, రాజేష్కు బ్యాంక్ నుండి ఫోన్ వచ్చింది.
"సార్, మీ అకౌంట్ నుండి రాత్రి రెండు లక్షల రూపాయలు వేరే అకౌంట్కు వెళ్లాయి. మీరే చేశారా?" అని అడిగారు.
రాజేష్ ఫోన్ చూసుకుంటే, అకౌంట్లో డబ్బులన్నీ మాయం! "అయ్యో, డబ్బంతా పోయింది!" అని రాజేష్ తల పట్టుకుని ఏడవడం మొదలుపెట్టాడు. "రాత్రి నా ఫోన్ తీశావా?" అని వేణును అడిగాడు.
"అవును నాన్నా, గేమ్ కోసం ఒక యాప్ డౌన్లోడ్ చేశాను, " అని వేణు ఏడుస్తూ నిజం చెప్పాడు.
అప్పుడు రాజేష్కు అంతా అర్థమైంది. తన నాన్న ఒక చిన్నపిల్లాడిలా ఏడవడం చూసి, వేణు గుండె తరుక్కుపోయింది. తను దేవుడు అనుకున్న మొబైల్ తనకు వరం ఇవ్వలేదని, పెద్ద శిక్ష వేసిందని అతనికి అర్థమైంది.
ఆ రోజు సాయంత్రం, రాజేష్ కొడుకు దగ్గరకు వెళ్ళాడు. అతనిలో ఇప్పుడు కోపం లేదు, బాధ మాత్రమే ఉంది. "చూడు వేణూ, ఈ మొబైల్ ఒక కత్తి లాంటిది. సరిగ్గా వాడితే పనికొస్తుంది, తెలియకుండా వాడితే మనల్నే గాయపరుస్తుంది. నేను నిన్ను అరిచింది దాని మీద కోపంతో కాదు, నీకు ఏదైనా హాని జరుగుతుందేమోనన్న భయంతో. నిన్ను కాపాడుకోవడం నా బాధ్యత కదా?" అని ప్రేమగా చెప్పాడు.
ఆ మాటలకు వేణుకు నిజం తెలిసింది. తన నాన్న హిరణ్యకశిపుడు కాదని, తనను ప్రేమించే ఒక మామూలు నాన్న అని అర్థమైంది.
"సారీ నాన్నా, నన్ను క్షమించు, " అని తండ్రిని గట్టిగా కౌగిలించుకున్నాడు.
డబ్బు పోయినా, ఆ నష్టం వల్ల తన కొడుకు ఒక ముఖ్యమైన జీవిత పాఠం నేర్చుకున్నాడని, తమ మధ్య బంధం బలపడిందని రాజేష్కు అనిపించింది.
************
ఫణి శ్యామ్ దేవరకొండ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
ఉగాది 2026 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
నా పేరు ఫణి శ్యామ్ దేవరకొండ. నేను హైదరాబాద్, తెలంగాణలో నివసిస్తున్నాను. గత ఇరవై సంవత్సరాలుగా ఒక ప్రైవేట్ బ్యాంకులో ఉద్యోగం చేస్తున్నాను. ఉద్యోగ బాధ్యతలతో పాటు, రచన పట్ల ఉన్న ఆసక్తితో కథలు రాయడం నా జీవితంలో ఒక భాగంగా మారింది.
2019వ సంవత్సరం నుండి కథా రచనను ప్రారంభించాను. ఇప్పటివరకు ఇరవైకి పైగా కథలు రాశాను. నా కథల్లో ఎక్కువగా సస్పెన్స్, డిటెక్టివ్ థ్రిల్లర్, ఎమోషనల్, ఇన్స్పిరేషనల్ మరియు సందేశాత్మక అంశాలు ఉంటాయి.
ప్రతి కథలో జీవితంలోని ఒక కోణాన్ని, ఒక ఆలోచనను లేదా ఒక విలువను ప్రతిబింబించేలా ప్రయత్నిస్తాను.
నా కథలు ప్రతిలిపి, స్టోరీ మిర్రర్, మాతృభారతి వంటి ప్రసిద్ధ వేదికలలో ప్రచురితమయ్యాయి. స్టోరీ మిర్రర్లో ప్రచురితమైన నా కథ “అదే రోజు” చదివిన ఒకరు, దానిని షార్ట్ ఫిల్మ్గా రూపొందిస్తామని నన్ను సంప్రదించారు. అది నాకు ఎంతో గౌరవంగా, గర్వంగా అనిపించిన సందర్భం. ఆ కథని షార్ట్ ఫిలింగా మలిచి యూట్యూబ్ లో విడుదల చేశారు.
ఇటీవల 'మన తెలుగు కథలు' వెబ్సైట్ చూసి చాలా సంతోషం కలిగింది. కథా రచయితలకు మీరు అందిస్తున్న ప్రోత్సాహం, నిర్వహిస్తున్న పోటీలు, బహుమతులు మరియు అభినందనలు ఎంతో ఉత్తేజాన్నిచ్చాయి.
కథల ద్వారా పాఠకుల మనసును తాకడం, వారిలో స్ఫూర్తిని కలిగించడం, జీవితానికి ఒక చిన్న వెలుగును చూపించడం — ఇదే నా లక్ష్యం.
రచయితలకు మీరు ఇస్తున్న ప్రోత్సాహం, ఆదరణ మరియు సాహిత్య స్ఫూర్తి నిజంగా అభినందనీయం. 'మన తెలుగు కథలు' బృందానికి నా హృదయపూర్వక ధన్యవాదాలు.
Comments