చిగురించిన ప్రేమ
- Dr. C S G Krishnamacharyulu
- 2 hours ago
- 6 min read
ఈ కథ మనతెలుగుకథలు.కామ్ వారి ఉగాది షడ్రుచుల కథల పోటీకి పంపబడింది.
చిగురించిన ప్రేమ, ఉగాది కథలు, షడ్రుచులు, ఉగాది షడ్రుచుల కథల పోటీ, ప్రేమ కథ, డా సి యస్ జి కృష్ణమాచార్యులు, తెలుగు ప్రేమ కథ, మనతెలుగుకథలు, ఉగాది ప్రత్యేకం, ప్రేమ
Chigurinchina Prema - Telugu Romantic Love Story | Dr. C. S. G. Krishnamacharyulu
చిగురించిన ప్రేమ - తెలుగు రొమాంటిక్ ప్రేమ కథ | Dr. C..S.G . కృష్ణమాచార్యులు
Published in manatelugukathalu.com on 30/07/2026
లవణం (ఉప్పు)
"జీవితం నిస్సారంగా ఉంటోంది, ఉప్పు లేని రసంలా, రుచి లేని విందులా! ఎన్నో ఆనందాలు చుట్టూ ఉన్నా, వాటిని ఆస్వాదించడానికి ఆసక్తి కలగడం లేదు. ఏదో తెలియని వెలితి మనసును వెంటాడుతోంది. కారణం ప్రేయసి లేకపోవడం. ఇరవై అయిదేళ్ళ వయస్సు, మంచి ఉద్యోగం ఉన్న యువకుడికి అంతకన్నా బలమైన లోటు ఇంకేముంటుంది?" అని అనుకుంటూ సాకేత్ గాఢంగా నిట్టూర్చాడు.
సాకేత్ను ఒక ఇంటివాడిని చేయాలని అతని తల్లిదండ్రులు ఎంతగానో ప్రయత్నించారు. కానీ వారు చూసిన ఏ సంబంధమూ అతనికి నచ్చలేదు. "అందం తక్కువ", "ఉద్యోగం చిన్నది", "మాట తీరు బాగోలేదు" అంటూ ఏదో ఒక వంక పెట్టి వచ్చిన ప్రతి సంబంధాన్నీ కాదనడంతో, అతని తల్లిదండ్రులు విసిగిపోయి, "మాకు తెలిసినవి, మాట్రిమొనీల ద్వారా వచ్చినవి అన్నీ చూపించాము. ఇంక మా వల్ల కాదు. నీకు నచ్చిన అమ్మాయిని నువ్వే వెతుక్కో," అని చెప్పి ఉత్తర భారతదేశ యాత్రకు వెళ్లిపోయారు.
నిజానికి సాకేత్ ఒకవైపు తల్లిదండ్రులు చూపించిన సంబంధాలు చూస్తూనే, మరోవైపు తన వంతు ప్రయత్నాలు కూడా చేశాడు. తాను పనిచేసే కంపెనీలో, స్నేహితుల కంపెనీల్లో, షాపింగ్ మాల్స్లో, కేఫేల్లో... ఇలా వెళ్లిన ప్రతి చోట తన మనసుకు నచ్చే అమ్మాయి కోసం వెతికాడు.
కానీ అతని అన్వేషణ ఫలించలేదు. ఇంకేం చెయ్యాలో అర్థం కాక, చేసే పని మీద మనసు లగ్నం కాక, నిరాశగా దిక్కులు చూస్తున్న అతనికి కొద్ది దూరంలో ఒక యువతి హాలులోకి ప్రవేశిస్తూ కనబడింది.
ఆమెను చూడగానే సాకేత్ శ్వాస క్షణం ఆగిపోయింది. ఆ యువతి రూపం మేఘాల చాటున మెరిసే విద్యుల్లతను తలపించింది. దేవతలకు మధురామృతాన్ని పంచిన మోహిని మానవరూపంలో అతని ఎదురుగా ప్రత్యక్షమైనట్లుంది.
మధురం (తీపి)
ఆ యువతి ఆఫీసులో అడుగుపెట్టగానే అక్కడున్న యువతీ యువకులు ఆమెకు స్వాగతం పలికారు.
"హాయ్... నేను జాహ్నవి. ఇవాళే జాయిన్ అయ్యాను," అని చిరునవ్వుతో తనను తాను పరిచయం చేసుకుని, తన వెంట తీసుకొచ్చిన స్వీట్లను అందరికీ పంచింది.
స్వీట్ రుచి చూస్తూ సాకేత్ మనసులో ఇలా అనుకున్నాడు:
"ఈ స్వీట్ కన్నా ఆమె రూపం ఎంతో తీయగా ఉంది. నిజానికి ఆమె నవ్వు తీపే. ఆమె గొంతు తీపే. ఆమె మాటలు తీపే. ఆమె చూపు తీపే. చివరికి ఆమె నడక కూడా తీపే. ఇంత మాధుర్యం ఒక మనిషిలో ఎలా ఒదిగిపోయిందో! ఎలాగైనా ఆమెకు దగ్గరవ్వాలి. ఆమె మనసు గెలిచి, ఆమెను నా జీవిత భాగస్వామిని చేసుకోవాలి."
అలా నిశ్చయించుకున్న సాకేత్కు జీవితం ఒక్కసారిగా సుధామయమైపోయింది. ఇంతకాలం కళావిహీనంగా కనిపించిన ఆఫీసు, వనదేవత రాకతో కళకళలాడిన ఉద్యానవనాన్ని తలపించింది.
నాటి నుంచి ఉదయం సూర్యోదయం కోసం కమలం ఎలా ఎదురుచూస్తుందో, అలాగే ప్రతి ఉదయం జాహ్నవిని చూడాలనే ఆత్రుతతో అతని హృదయం ఉవ్విళ్ళూరేది. ఆమె చిరునవ్వు వెన్నెల రాత్రిలో జాలువారే చంద్రకాంతిలా అతని అంతరంగాన్ని శాంతితో నింపేది.
@@@
తిక్తం (చేదు)
ప్రత్యేకంగా చెప్పుకోదగ్గ సంఘటన ఏదీ చోటుచేసుకోకుండానే నెల రోజులు దొర్లిపోయాయి. ఈ స్వల్పకాలంలోనే సాకేత్ తన ఊహల్లో జాహ్నవితో ఒక అందమైన ప్రేమ ప్రపంచాన్ని నిర్మించుకున్నాడు. అయితే, జాహ్నవికి దగ్గరయ్యే అవకాశం మాత్రం అతనికి దొరకలేదు.
ఆమె వేరే టీమ్లో పనిచేస్తుండడంతో ఎక్కువ సమయం తన సహోద్యోగులతోనే గడిపేది. కాఫీ విరామాల్లో అప్పుడప్పుడూ ఎదురెదురుపడటం, చిరునవ్వుతో పలకరించుకోవడం, రెండు నాలుగు మాటలు మాట్లాడుకోవడం—అంతే.
కానీ ఆ కొద్ది క్షణాలే సాకేత్ మనసులో ప్రేమను మరింతగా ఇనుమడింప చేయడానికి సరిపోయేవి. తమ పరిచయాన్ని ప్రేమగా వికసింపజేసే శుభక్షణం కోసం అతనెంతో ఆశతో ఎదురు చూడసాగాడు.
అయితే అతని ఆశలు ఎక్కువకాలం నిలవలేదు. ఒకరోజు జాహ్నవి తన సహోద్యోగినితో, "నాకు బాయ్ఫ్రెండ్ ఉన్నాడు. వచ్చే ఏడాదిలో మా పెళ్ళి జరగవచ్చు," అని చెప్పడం అతని చెవిన పడింది. ఆ మాటలు వినగానే సాకేత్ ఒక్కసారిగా వంద చేదు గుళికలు తిన్న మనిషిలా, జీవితం పట్ల విరక్తి చెందాడు.
“ఎడారి లాంటి నా జీవితంలోకి వసంతంలా అడుగుపెట్టిందనుకున్న అమ్మాయి, నాకు గగనకుసుమమై, మరొకరి హృదయరాణి కాబోతోందా? దేవుడా! నా జీవితాన్ని కేవలం చేదుగా, మాధుర్య హీనంగా చేయాలని సంకల్పించావా?
నా జీవితంలో ప్రేమ అనే అధ్యాయం రాసే ఉద్దేశమే నీకు లేదా? నేను బ్రహ్మచారిగానే మిగిలిపోవడమే నీ అభీష్టమని అనుకుంటున్నాను" అని వేదన చెందాడు.
కాలమే గొప్ప వైద్యుడు అంటారు. సాకేత్ కూడా అదే నమ్మాడు. జాహ్నవి జ్ఞాపకాలను తన మనసు లోతుల్లోంచి ఒక్కొక్కటిగా చెరిపేయాలని నిర్ణయించుకున్నాడు.
మొదట్లో అది అసాధ్యంగా అనిపించినా, కాలక్రమేణా అతని మనసు కొద్దికొద్దిగా మామూలు స్థితికి చేరసాగింది.
అలాంటి సమయంలో విధి మరోసారి అతనితో క్రూరమైన ఆట ఆడింది. ఒకరోజు జాహ్నవి ప్రేమించిన రోషన్ అదే ఆఫీసులో ఉద్యోగిగా చేరాడు. రోషన్ చేరిన తర్వాత జాహ్నవిలో క్రొత్త ఉత్సాహం పరవళ్ళు తొక్కింది.
వాళ్ళిద్దరూ కూర్చొని కబుర్లు చెప్పుకోవడం, పకపకా నవ్వుకోవడం, ఒకరి కళ్ళలోకి ఒకరు చూసుకుంటూ చిరునవ్వులు చిందించడం... ఇవన్నీ చూసినప్పుడల్లా, సాకేత్ మనసులో అసూయ అనే అగ్నిపర్వతం బద్దలయ్యేది. అతనికి ఆఫీసు ఇప్పుడు ప్రతి రోజు వెళ్ళక తప్పని కారాగారంలా అనిపించసాగింది.
@@@
కషాయం (వగరు)
భగవానుని లీలలు విచిత్రంగా ఉంటాయి. బండ్లను ఓడలుగా, ఓడలను బండ్లుగా మార్చే శక్తిని కాలానికి ప్రసాదించిన ఘనత భగవంతుడిదే. నిన్న అసాధ్యంగా అనిపించినది ఈ రోజు సుసాధ్యమవుతుంది. అలాంటి అనూహ్యమైన మలుపే రెండు నెలల తర్వాత సాకేత్ జీవితంలోనూ వచ్చింది.
ఒక కొత్త ప్రాజెక్టు కోసం జాహ్నవిని సాకేత్ నాయకత్వం వహిస్తున్న బృందానికి ఎంపిక చేశారు. ఆమె హుషారుగా సాకేత్ దగ్గరకు వచ్చి, "మీతో కలిసి పనిచేసే అవకాశం రావడం నా అదృష్టంగా భావిస్తున్నాను. మా పాత టీమ్ లీడర్ ఎప్పుడూ కస్సుబుస్సులాడుతూ ఉండేవారు. మీ పర్యవేక్షణలో పనిచేయడం చాలా ఆహ్లాదకరంగా ఉంటుందని, కొత్త విషయాలు కూడా సులభంగా నేర్చుకోవచ్చని నా స్నేహితులు చెప్పారు" అంది.
ఆ మాటలు విన్న సాకేత్ ఆనందానికి అవధులు లేకపోయాయి. జాహ్నవి రోజంతా తనతోనే పనిచేయబోతున్నదన్న మధురానుభూతి ఒకవైపు అతన్ని పరవశింపజేస్తుంటే, ఆమె హృదయం మాత్రం మరొకరిదన్న చేదు నిజం మరోవైపు అతన్ని వేధిస్తోంది. ఒక రకంగా అతని జీవితం వాక్కాయలా మారిపోయింది.
బయటకు లేత గులాబీ-పచ్చ రంగులతో కన్నులకు ఇంపుగా కనిపించే వాక్కాయను కొరికినవారికే దాని వగరు రుచి తెలుస్తుంది. అలాగే, పైకి ఉత్సాహంగా, ఆనందంగా కనిపిస్తున్న సాకేత్ అంతరంగాన్ని అర్థం చేసుకున్నవారికే అక్కడ గూడు కట్టుకున్న వేదన కనిపిస్తుంది.
కటువు (కారం / ఘాటు)
ప్రాజెక్టు ముందుకు సాగుతున్న కొద్దీ సాకేత్కు జాహ్నవి గురించి కొత్త కొత్త విషయాలు తెలిసివచ్చాయి. ఆమె కేవలం అందమైన అమ్మాయే కాదని, మంచి ప్రతిభావంతురాలు, కష్టపడే ఉద్యోగిని అని అతను గ్రహించాడు. సౌందర్యానికి, మేధస్సుకు ప్రతిరూపమైన అమ్మాయి తన జీవిత భాగస్వామి కాలేదన్న ఆలోచన అతడిని ఎంతో క్రుంగదీసింది.
అతనికి మనసులో సృష్టికర్తపైనే ఆగ్రహం పొంగుకొచ్చింది.
"నా కలల రాణిని నా కళ్ళముందు నిలబెట్టిన వాడివి, ఆమెను నా జీవిత భాగస్వామిగా చేసుకునే అదృష్టాన్ని ఎందుకు ఇవ్వలేదు? నా మనసులో ఆశలు రేపి వాటిని నువ్వే ఎందుకు ఛిద్రం చేశావు?" అని భగవంతుణ్ని నిలదీశాడు.
అయితే... ఒకరోజు అనూహ్యంగా జరిగిన సంఘటన అతనికి విధి లీల అర్థమయ్యేలా చేసింది.
ఆ రోజు సాయంత్రం సాకేత్ పార్కింగ్లో తన కారు వద్దకు చేరుకున్నాడు. కొద్ది దూరంలో జాహ్నవి, రోషన్ ఇద్దరూ వాదించుకుంటూ కనిపించారు.
కోపంతో ఎర్రబడిన ముఖంతో జాహ్నవి ఆవేశంగా అంటోంది: "రెండు వారాల క్రితమే నీతో బ్రేక్అప్ అని స్పష్టంగా చెప్పాను. అయినా నువ్విలా వచ్చి గొడవ చేయడం కరెక్టు కాదు. నేను మూవ్ అయ్యాను. ఇక మీదట నా వెంట పడకు."
ఆ మాటలు సాకేత్ చెవుల్లో పడగానే అతని మనసులో ఆశలు ఒక్కసారిగా పురివిప్పాయి. ఆశ్చర్యం, ఆనందం, ఉత్కంఠ... ఆ మూడు భావాలు ఒకేసారి అతనిని ఆవరించాయి. అతను అక్కడే విగ్రహంలా నిలబడిపోయాడు.
అంతలో రోషన్ కోపంతో అతని వైపు దూసుకొచ్చాడు. "ఇదంతా నీ వల్లే!" అంటూ ఏమాత్రం హెచ్చరిక లేకుండా సాకేత్ చెంపపై గట్టిగా కొట్టాడు.
ఊహించని దాడికి క్షణం పాటు సాకేత్ నిర్ఘాంతపోయాడు. కానీ మరుక్షణమే తేరుకుని రోషన్ మణికట్టును గట్టిగా పట్టుకుని వెనక్కి మెలిపెట్టాడు.
"ఆహ్..." అంటూ రోషన్ నొప్పితో అరిచాడు. అయినా అతని ఆగ్రహం ఏమాత్రం తగ్గలేదు.
"నీ వల్లే జాహ్నవి నన్ను వదిలేసింది. దుర్మార్గుడా! నిన్ను చంపేస్తాను!" అంటూ ఉన్మాదిలా కేకలు వేశాడు.రోషన్ ఆరోపణలు విన్న సాకేత్ పూర్తిగా అయోమయంలో పడ్డాడు.
"ఏమిటి నువ్వు మాట్లాడుతున్నది? మరోసారి నాపై చేయి చేసుకోవడానికి ప్రయత్నిస్తే చేతులు విరగ్గొడతాను."
అతని మాటల్లో ఆగ్రహం ఉప్పొంగుతున్నా, కళ్ళలో మాత్రం దాచలేని ఆనందం మెరుస్తోంది.
రోషన్ వెటకారంగా నవ్వాడు: "సరే... నీ ఖర్మను నువ్వే అనుభవించు. త్వరలోనే నరకం అంటే ఏమిటో నీకే తెలుస్తుంది. ఆమెలో అందం తప్ప ఇంకేమీ లేదు. ఆ అందం లేకపోయి ఉంటే ఒక్క పైసా విలువ కూడా ఇచ్చేవాడిని కాదు.
పాతకాలపు ఆలోచనలతో నీ స్వేచ్ఛను పూర్తిగా హరించి, నిన్ను ఇంటికే పరిమితం చేస్తుంది. మూర్ఖుడా! అప్పుడే నా మాటలు గుర్తుకొస్తాయి," అని విషం కక్కినట్లు అన్నాడు.
ఆ తర్వాత సాకేత్ సమాధానం కోసం కూడా ఆగకుండా వేగంగా అడుగులు వేస్తూ అక్కడి నుంచి వెళ్లిపోయాడు.
ఆమ్లం (పులుపు)
రోషన్ వెళ్ళిపోతున్న వైపు చూస్తూ నిలబడ్డ సాకేత్, జాహ్నవి స్పర్శకు ఉలిక్కిపడి ఆమె వైపు తిరిగాడు. ఆమె రోషన్ కొట్టిన చోట అతని చెంపను స్పృశిస్తూ, "ఐ యామ్ సారీ... నా వల్ల మీకు ఈ అవమానం జరిగింది," అంది.
ఆ తర్వాత అతని కుడి చేతిని తన చేతుల్లోకి తీసుకుని, సూటిగా అతని కళ్ళలోకి చూస్తూ మంద్రస్వరంతో ఇలా చెప్పింది:
"మిమ్మల్ని మొదటిసారి చూసిన క్షణమే మీరే నా జీవిత భాగస్వామి అని అనిపించింది. కానీ అప్పటికే నేను రోషన్తో బంధంలో ఉన్నాను. అతను ప్రేమికుడిలా కాక ఒక నియంతలా ప్రవర్తిస్తుండడంతో అతనికి దూరమయ్యాను.
అతనికి దూరమైన కొద్దీ మీకు దగ్గరయ్యాను. మీ టీమ్లో చేరడానికి కూడా అదే కారణం. మనం ప్రేమికులుగా మసలుతూ ఒకరినొకరం అర్థం చేసుకుందాం. పరస్పర అనుకూలత ఉంటే పెళ్ళి చేసుకుందాం. సరేనా?"
జాహ్నవి ప్రతిపాదన విన్న సాకేత్ గుండెల్లో వెయ్యి వీణలు ఒకేసారి మోగినట్లనిపించింది. అయితే ఆమె వివాహ ప్రతిపాదన షరతులతో కూడి ఉండడంతో, అతను కొద్దిగా డీలా పడి ఇలా అనుకున్నాడు:
"జీవితం పచ్చి మామిడికాయలా మారింది. ప్రేమ ఫలించింది అన్న ఆనందం తియ్యగా ఉన్నా, జాహ్నవిని మెప్పించగలనో లేదో అన్న అనిశ్చితి వల్ల ఆ మాధుర్యం పులుపుతో మిశ్రితమైంది. ప్రేమతో పాటు సరసమైన సవాళ్ళని విసిరింది.
అయినా చింత ఎందుకు? జాహ్నవి ప్రేమ నన్ను గెలిపిస్తుంది."
సాకేత్ ఆశించినట్టుగానే జరిగింది. ఆరు నెలల తర్వాత ఇరు కుటుంబాల సమ్మతితో, పెద్దల ఆశీర్వాదాల మధ్య జాహ్నవి, సాకేత్ల వివాహం ఆనందోత్సాహాల నడుమ ఘనంగా జరిగింది.
@@@@@
C..S.G . కృష్ణమాచార్యులు గారి కొన్ని ఇతర రచనలు:
C..S.G . కృష్ణమాచార్యులు గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం: Dr. C..S.G . కృష్ణమాచార్యులు
శ్రీ వెంకటేశ్వర విశ్వ విద్యాలయం, తిరుపతి లో మేనేజ్మెంట్ విభాగంలో ప్రొఫెసరుగా రిటైర్ అయ్యాను. ప్రస్తుత నివాసం పుదుచెర్రీ లో. నేను రచించిన మేనేజ్మెంట్ పాఠ్య గ్రంధాలు ప్రెంటిస్ హాల్, పియర్సన్ ఎడ్యుకేషన్, వంటి ప్రముఖ సంస్థలు ప్రచురించాయి.
ఈ మధ్యనే నాకిష్టమైన తెలుగు రచనా వ్యాసంగం, ప్రారంభించాను. ఆ సరస్వతీ మాత కృపవల్ల కొన్ని బహుమతులు గెలుచుకున్నాను. అందులో కొన్ని. చేజారనీకే జీవితం- నవల, ( కన్సొలేషన్ -మన తెలుగు కథలు .కాం ). మనసు తెలిసింది, చీకటి నుంచి వెలుగుకు, (వారం వుత్తమ కథ- మన తెలుగు కథలు .కాం), గురువే కీచకుడైతే (3 వ బహుమతి - విమల సాహితీ ఉగాది కథల పోటీ) ఒకే పథం- ఒకే గమ్యం( ప్రత్యేక బహుమతి --వాసా ప్రభావతి స్మారక కథల పోటీ- వాసా ఫౌండేషన్ & సాహితీకిరణం), తెలుగు భాష (ప్రత్యేక బహుమతి- పద్యాలు - షార్ సెంటర్ ఉగాది పోటీ), జంటగా నాతి చరామి ( కన్సొలేషన్- సుమతి సామ్రాట్ కథల పోటీ).