పల్లె పిలిచింది - 3

#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #పల్లెపిలిచింది, #PallePilichindi, #కందం, #అంబురుహము, #ధృతవిలంబితము, #దోదకము #కావ్యము

Palle Pilichindi - 3 - New Telugu Poem Written By T. V. L. Gayathri

Published In manatelugukathalu.com On 30/04/2025

పల్లె పిలిచింది - 3 - తెలుగు కవిత ప్రథమాశ్వాసము

రచన: T. V. L. గాయత్రి

పల్లె పిలిచింది పార్ట్ 1 కోసం ఇక్కడ క్లిక్ చేయండి.

పల్లె పిలిచింది పార్ట్ 2 కోసం ఇక్కడ క్లిక్ చేయండి.

పల్లె పిలిచింది 3

(స్వతంత్ర కావ్యము )

ప్రథమాశ్వాసము

******************************

11.

అంబురుహము.

భ,భ, భ, భ, ర, స వ.

యతి -13 వ అక్షరము.

పల్లెకు నుత్తర దిక్కున నిల్చెను పర్వతంబట ఠీవిగన్ 

జిల్లను నల్లని మబ్బులు కప్పగ జీవజాలము వర్థిలన్ 

జల్లని వాయువు లెల్లెడ వీచగ శైలమందున సాలముల్ 

వల్లెయటంచును సంతస మొందుచు పల్లవించెను హాయిగన్.//

తాత్పర్యము.

ఆ గ్రామమునకు ఉత్తర దిక్కుగా ఒక పర్వతము ఉంది. ఆ పర్వతము మీద నల్లటి మేఘాలు కప్పుకొని ఉన్నాయి. ఎన్నో జీవులు ఆ పర్వతము మీద నివాసము ఉంటున్నాయి.చల్లని గాలులు వీస్తూ ఉంటే ఆ పర్వతము మీది చెట్లు సంతోషంగా చివర్లు వేస్తూ ఉన్నాయి.//

12.

ధృతవిలంబితము.

న, భ, భ, ర.

యతి -7

తలలనూపుచు దంతిసమూహముల్ 

బిలములందున వృష్ణిమృగంబులున్ 

పులులు శూకరముల్ బహు శక్తిగన్ 

చెలగు చుండును చిందులు వేయుచున్ //

తాత్పర్యము.

ఆ పర్వత గుహల్లో ఎన్నో జంతువులు చిందులు వేయుచు  హాయిగా నివాసముంటున్నాయి.//

13.

కందము.

ఆ గిరి సానువు లందున 

భోగించుచు తిరుగుచుంద్రు పొలుపుగ దివిజుల్ 

యోగాభ్యాసాసక్తుల్

సాగిలి పడి జప తపములు సల్పుదురు మునుల్.//

తాత్పర్యము.

ఆ పర్వత ప్రాంతమందు దేవతలు సంతోషంతో తిరుగుతూ ఉంటారు. మునులు, సిద్ధులు అక్కడ తపస్సులు చేసుకుంటూ ఉంటారు.//

14.

దోదకము.

భ, భ, భ, గగ.

యతి -7.

ఖ్యాతిని నిల్పెడి గ్రామపు సీమన్ 

భాతిగ నిల్చిన పర్వత మాయెన్ 

ధాతువు లెల్లెడ దర్శనమీయన్ 

జాతికి కల్గెను సంపద లెల్లన్ .//

తాత్పర్యము.

ఆ పర్వతపు కీర్తి చాలా గొప్పది. ఆ పర్వతము నందు ఎంతో ఖనిజసంపద ఉంది. ఆ పర్వతము వలన జాతికి ఎంతో సంపద లభిస్తూ ఉంది.//

పల్లె పిలిచింది పార్ట్ 4 కోసం ఇక్కడ క్లిక్ చేయండి.

టి. వి. యెల్. గాయత్రి.

పూణే. మహారాష్ట్ర.

Profile Link:

https://www.manatelugukathalu.com/profile/tvlgayathri