విపణి మాయ: వివేకపు వేలం
- Ram Prasad Eruvuri
- Apr 23
- 10 min read
Vipani Maya: Vivekapu Velam - Telugu Poem | Dr. Ram Prasad Eruvuri
విపణి మాయ: వివేకపు వేలం - తెలుగు కవిత | డాక్టర్ రాంప్రసాద్ ఇరువూరి
Published In manatelugukathalu.com On 23/04/2026
నేపథ్యం:
ఆదివారం సాయంత్రం.....
వెలుగులీనే ఒక సూపర్ మార్కెట్.
కళ్లు చెదిరే ఆఫర్లు, 'బై వన్ గెట్ వన్' బోర్డులు.
చేతిలో ఖాళీ ట్రాలీతో లోపలికి వెళ్లిన సామాన్యుడు,
కేవలం పప్పులు, ఉప్పులు కొనాలనుకుని..
చివరకు అవసరం లేని రంగుల ప్యాకెట్లతో,
అనవసరపు వస్తువుల భారంతో బయటకు వస్తున్న ఆ దృశ్యం
వెనుక ఉన్న ఒక చేదు నిజమే ఈ కవిత.
అవసరాల జాబితాను జేబులోనే నిద్రపుచ్చి......
ఆకర్షణల అరల ముందు నువ్వు సాగిలపడుతుంటే,
'తగ్గింపు' అనే తాయిలం చూసి మురిసిపోతూ
నీ ట్రాలీ నిండా
అనవసరపు భారాలను పేర్చుకుంటుంటే......
ఆ క్షణపు ఆడంబరం నీకు విజయంలా అనిపించొచ్చు!
కానీ..
అవసరం లేని వస్తువును 'చౌక' అనే భ్రమలో కొనడం
నీ కష్టార్జితాన్ని అంగడిలో
బలిపశువును చేయడం కాదా?
ఆఫర్ల గాలానికి చిక్కి.......
అవసరం లేకున్నా అలవాటుగా
నువ్వు విసిరేసే ఆ నోట్లు,
నీ రేపటి భద్రతను కాల్చేసే నిశ్శబ్ద కట్టెలు!
ప్రకాశవంతమైన ఆ వెలుతురులో......
నీ ఇంటి గూటికి నువ్వు చేరుస్తున్న
ఆ రంగుల డబ్బాలన్నీ,
నీ ఆర్థిక స్వేచ్ఛను హరించే అదృశ్య సంకెళ్లు కావా?
ఒకటి కొంటే ఒకటి ఉచితమన్న మాయాజాలంలో
నీ వివేకాన్ని తాకట్టు పెట్టి
నువ్వు ఇంటికి తెచ్చిన ఆ రాశులు.......
అల్మారాల్లో మూలుగుతూ నిన్ను వెక్కిరిస్తున్న వేళ..
ఖర్చు పెట్టిన ప్రతి పైసా,
నీ రేపటి కన్నీటి చుక్కగా మారక ముందే
కళ్లు తెరవని నీ అజ్ఞానం ఒక సామాజిక నేరం కాదా?
నీ జీవిత ఖాతాలో
నువ్వు పోగేసుకున్న ఈ వస్తువులన్నీ.......
అసలు విలువలేని
ఒక శూన్యపు రాశి మాత్రమేనని,
అవసరానికి ఆదుకోని
ఈ 'విలాసాల విందు' వ్యర్థమని
నీ అంతరాత్మ నిన్ను నిలదీయదా?
ఇట్లు
మీ మను రామ్.
================================
Manugada Musugulo Avasaram - New Telugu Poem Written By Dr. Ram Prasad Eruvuri Published In manatelugukathalu.com On 18/04/2026
మనుగడ ముసుగులో......అవసరం - తెలుగు కవిత
రచన: డాక్టర్ రాంప్రసాద్ ఇరువూరి
మనిషి విలువ…👉 అవసరం ఉన్నంతవరకేనా?
ఈ ప్రశ్నకు సమాధానం చెప్పే కవిత ఇది.
నీడ దొరికే వరకు చెట్టు అవసరం
ఎండ కాసే వరకు ఆ నీడ అవసరం
రెమ్మ రెమ్మకూ ఆ పచ్చదనం అవసరం
గమ్యం సాగిపోయాక... ఆ వృక్షం ఒక అనవసరం!
ఆకలి దహించే వరకు అన్నం అవసరం
శరీరం నిలవడానికి ఆ ఆహారం అవసరం
ప్రతి ముద్దలోనూ ఆ ప్రాణం అవసరం
కడుపు నిండిన మరుక్షణం... ఆ పళ్లెం ఒక అనవసరం!
దాహం వేసినప్పుడు బావి అవసరం
గొంతు తడిపేవరకు నీటి బిందె అవసరం
ప్రాణవాయువులా ఆ జలం అవసరం
తృష్ణ తీరిపోయాక... ఆ జలాశయం ఒక అనవసరం!
వ్యాధి వేధించే వరకు వైద్యం అవసరం
నొప్పి తెలిసే వరకు మందు బిళ్ళ అవసరం
కుదుటపడే వరకు ఆ పర్యవేక్షణ అవసరం
ఆరోగ్యం చేకూరాక... ఆ ఆసుపత్రి ఒక అనవసరం!
చీకటి ముసిరినప్పుడు దీపం అవసరం
దారి చూపే వరకు ఆ వెలుగు అవసరం
కళ్లు తెరిచే వరకు ఆ కిరణం అవసరం
సూర్యుడు వచ్చాక... ఆ ప్రమిద ఒక అనవసరం!
నది దాటే వరకు నావ అవసరం
తీరం చేరే వరకు ఆ తెడ్డు అవసరం
సురక్షితంగా చేర్చే ఆ పడవ అవసరం
గట్టున అడుగు పెట్టాక... ఆ ప్రవాహం ఒక అనవసరం!
అక్షరం రాని నాడు గురువు అవసరం
అజ్ఞానం వీడే వరకు ఆ బోధన అవసరం
విజ్ఞాన ఖనిలా ఆ పుస్తకం అవసరం
వివేకం మేల్కొన్నాక... ఆ బట్టీ పట్టడం ఒక అనవసరం!
పంట పండే వరకు రైతు అవసరం
గింజ రాలే వరకు ఆ శ్రమ అవసరం
లోకానికి ప్రాణాధారమైన ఆ సేద్యం అవసరం
గిడ్డంగి నిండాక... ఆ చెమట చుక్క ఒక అనవసరం!
శరీరం మోయడానికి ప్రాణం అవసరం
ఊపిరి ఆడే వరకు ఈ దేహం అవసరం
క్రియలన్నీ నడవడానికి ఆ శక్తి అవసరం
చితి మంటలు అంటుకున్నాక... ఈ రూపురేఖలు ఒక అనవసరం!
నిజం నిలబడడానికి ధైర్యం అవసరం
న్యాయం గెలవడానికి ధర్మం అవసరం
మనిషి మనిషిగా బతకడానికి నీతి అవసరం
స్వార్థం రాజ్యమేలే చోట... ఈ మంచి తనమే ఒక అనవసరం!
ఇట్లు
మీ మను రామ్.
===========================
O Naruda Manavuda - New Telugu Poem Written By Dr. Ram Prasad Eruvuri Published In manatelugukathalu.com On 10/03/2026
ఓ నరుడా.. ఓ మానవుడా! - తెలుగు కవిత
రచన: డాక్టర్ రాంప్రసాద్ ఇరువూరి
ఓ నరుడా.. ఓ మానవుడా!
మృత్యువు అంచున నిలబడి
విజయ గీతాలు పాడుతున్నావా?
శిథిలాల దిబ్బపై కూర్చుని
సామ్రాజ్యాలు ఏలాలనుకుంటున్నావా?
నీవు ప్రయోగించే ప్రతి క్షిపణి
ఒక పసిపాప ఊపిరిని తుంచే
రంపపు కోత అని తెలియదా?
నీవు కురిపించే బాంబుల వర్షం
భూమాత కడుపు కోత అని గ్రహించవా?
ఓ నరుడా.. ఓ మానవుడా!
ఇరాన్ ఇనుప కవచాల వెనుక
దాగున్నది ధర్మం కాదు, దహించే ద్వేషం!
ఇజ్రాయెల్ ఉక్కు పిడికిలిలో
ఉన్నది రక్షణ కాదు, రగిలే ప్రతీకారం!
అగ్రరాజ్యపు అగ్రపీఠంపై
ఆడుతున్నది రాజకీయం కాదు, రక్తపు జూదం!
సముద్రాల అవతల కూర్చుని
యుద్ధ తంత్రాలు పన్నుతున్న పాలకుడా.
నీ తుపాకి గొట్టం నుండి వచ్చే ప్రతి బుల్లెట్
ఒక తల్లి గుండెను చీల్చుకుంటూ
వెళ్తోందని నీకు తెలుసా?
చూడు.....అక్కడ గడ్డకట్టిన రక్తం!
అది ఇరాన్ దేశానిదా?
ఇజ్రాయెల్ జాతిదా?
లేక అమెరికా వాడిదా?
కాదు....
అది కేవలం "మనిషి" రక్తం!
ఆ ఎర్రని రంగులో ఏ మతం కనిపిస్తోంది?
ఏ జెండా గుర్తు కనిపిస్తోంది?
కన్నీటికి భాష లేదు
కడుపు కోతకు ఖండాలు లేవు!
అమ్మ కడుపున పుట్టిన ప్రతి బిడ్డ
నీ అధికార దాహానికి బలి కావాల్సిందేనా?
ఓ నరుడా.. ఓ మానవుడా!
టెక్నాలజీ పెరిగిందని మురిసిపోతున్నావు.
కానీ నీ మనసు మాత్రం రాతి యుగపు
చీకటిలోనే ఉండిపోయింది!
రోదసిలోకి రాకెట్లు పంపుతున్నావు.
కానీ తోటి మనిషి బాధను తుడువలేక పోతున్నావు!
నువ్వు చేసే యుద్ధం ఎవరిని గెలిపిస్తుంది?
గెలిచిన వాడు శవాల పైన సింహాసనం వేసుకుంటాడా?
ఓడిపోయిన వాడు స్మశానంలో శాంతిని వెతుక్కుంటాడా?
హిరోషిమా మంటల వాసన ఇంకా ఉంది..
వియత్నాం కన్నీటి తడి ఇంకా ఆరనే లేదు..
అయినా నీ రక్త దాహం తీరలేదా?
ఇంకా నీ ఆయుధాల వేట ఆగలేదా?
మతం పేరిట మారణహోమం.
దేశం పేరిట దేశద్రోహం.
నీవు గీసుకున్న సరిహద్దుల రేఖలు
మానవత్వాన్ని ముక్కలు చేస్తున్నాయి!
ఆపండి! ఈ రక్తపు హోమాన్ని ఆపండి!
కాల్చండి! ఈ ద్వేషపు కోటలను కాల్చండి!
ఏ బాంబు ఆకలిని తీర్చదు.
ఏ క్షిపణి ప్రాణాన్ని పోయదు!
ఒక్క పసివాడి చిరునవ్వు కోసం
వెయ్యి రాజ్యాలను వదులుకోలేవా?
ఒక్క చుక్క కన్నీరు తుడవడానికి
నీ ఆయుధాలను పక్కన పెట్టలేవా?
ఓ నరుడా.. ఓ మానవుడా!
మేల్కో.. మనిషిగా మారి మేల్కో!
ప్రేమను పంచలేని మేధస్సు వ్యర్థం
శాంతిని తేలేని అధికారం అనర్థం!
నేల తడిచింది చాలు.
ఇక కన్నీళ్లతోనైనా ఆ మంటలను ఆర్పండి!
యుద్ధం లేని లోకాన్ని
పసిపిల్లల నవ్వుల తోటగా మార్చండి!
ఇది ఆఖరి హెచ్చరిక.
ఇది ఒక కవి గుండె ఘోష!
పరివర్తన చెందు.
లేదంటే చరిత్ర నిన్ను 'మనిషి'గా కాదు,
'హంతకుడి'గా మిగులుస్తుంది!
ఇట్లు
మీ మను రామ్.
============================================
Kattu Thappani Koumaram - New Telugu Poem Written By Dr. Ram Prasad Eruvuri Published In manatelugukathalu.com On 25/01/2026
కట్టు తప్పని కౌమారం - తెలుగు కవిత
రచన: డాక్టర్ రాంప్రసాద్ ఇరువూరి
వివేక కిరణం: కట్టు తప్పని కౌమారం
=======================
కట్టు తప్పిన కౌమారం......కళ్ళు మూసిన ప్రయాణం
నియంత్రణ లేని వేగం......నిప్పుతో చెలగాటం!
పగ్గం లేని పరుగు......పాతాళానికి దారి
లక్ష్యం లేని ఆవేశం......ఆత్మహత్యా సదృశ్యం!
వయసు ఉడుకున ఉంది కదా అని......
విచక్షణను వదిలితే
అనుభవాల అలల ముందు.....నీ ఉనికి నీటి బుడగే!
కట్టు తప్పిన కౌమారమా....కళ్ళు తెరిచి చూడు.
నీ రక్తంలోని వేడి....దీపం కావాలి కానీ దావాగ్ని కాదు.
నీ గుండెలోని ధైర్యం.....
అండ కావాలి కానీ అహంకారం కాదు.
కట్టలు తెంచుకున్న నది.....ఊరిని ముంచుతుంది.
కట్టలు దాటని నది మాత్రమే.....పంటను పండిస్తుంది!
నీవు తొక్కే ప్రతి అడుగులో.....ఒక ఆలోచన ఉండాలి.
నీవు పలికే ప్రతి మాటలో.....ఒక గమ్యం ఉండాలి.
క్షణికమైన మెరుపు చూసి....అది సూర్యుడనుకోకు.
అనుభవం లేని సాహసం....
అంధకారపు అంచున నిలబెడుతుంది.
మేలుకో యువకిశోరమా! మేలుకో ఈ క్షణమే!
పదును ఉన్న కత్తిలా.....నీ మేధస్సు ఉండాలి.
కానీ అది నిన్నే కోసే.....ఆయుధం కాకూడదు.
గాలిపటం ఎగరాలంటే....దారానికి కట్టుబడి ఉండాలి.
కట్టు తెంచుకున్న పటం...చెత్తకుప్పలో చేరక తప్పదు!
తల్లిదండ్రుల కన్నీరు.....నీ ఎదుగుదలకు శాపం.
పెద్దల అనుభవ సారం.....నీ విజయానికి సోపానం.
రయ్ మనే బైకు వేగం.....చావుతో చేసే విందు.
క్షణికమైన మత్తులో.....వెతకకు నీ ఆనందం!
నీ చూపుల్లో వివేకం.....నీ నడకలో వినయం.
కౌమారపు తొందరపాటు.....నీ జీవితానికి భయం.
ఆకర్షణల మాయలో......అసలైన గమ్యం మరువకు.
రంగుల ప్రపంచంలో.....నీ వ్యక్తిత్వం కోల్పోకు!
అడ్డదారులు తొక్కేవాడు......
అర్ధాంతరంగా ఆగిపోతాడు.
కష్టపడి నడిచేవాడే......శిఖరాలను అధిరోహిస్తాడు.
ఒక చిన్న పొరపాటు.......వంద ఏళ్ళ దెబ్బ.
ఒక్క నిమిషం ఆవేశం......జీవితాంతం వెక్కిరింత!
శక్తి ఉంది కదా అని......అన్యాయానికి తోడు పడకు.
యుక్తి ఉంది కదా అని......పరులని మోసగించకు.
యువత అంటే దేశానికి వెన్నుముక......
నువ్వు వంగిపోతే.....సమాజం కూలిపోతుంది!
నీ కండరాల బలం......దేశానికి రక్షణ కావాలి.
నీ మెదడులోని ఆలోచన.....
నవ సమాజానికి వెలుగు కావాలి.
కట్టు తప్పిన కౌమారం......కలల సమాధికి పునాది.
నియమబద్ధమైన యవ్వనం.....చరిత్ర పుటలకు నిధి!
అలవాట్ల బానిసగా మారి......
నీ ఆయుష్షుని తగలబెట్టకు.
సోషల్ మీడియా మాయలో......
నిజమైన బంధాలను వీడకు.
లైకుల కోసం కాదు......లోకం మెచ్చేలా బ్రతుకు.
షైనింగ్ స్టార్ లా కాదు.....సూర్యుడిలా వెలుగు!
క్రమశిక్షణ లేని విద్య......వాసన లేని పువ్వు.
సంస్కారం లేని అందం......విషమున్న గిన్నె.
నీ కన్నవారి కళ్లలో......గర్వాన్ని నింపాలి.
నీవల్ల ఈ లోకం......ఒక అడుగు ముందుకు పడాలి!
అనుభవం లేని ఆవేశాన్ని......వివేకంతో కట్టడి చేయి.
ప్రలోభాలకు లోబడక...నీ లక్ష్యాన్ని ముద్దాడి చూపు.
వయసు అనేది ఒక వరం.....దాన్ని శాపం చేసుకోకు.
జీవితం అంటే ఒక యుద్ధం.....
పోరాడకుండా ఓడిపోకు!
మేలుకో యువకిశోరమా......నీ శక్తిని గుర్తించు.
కట్టు తప్పిన కౌమారాన్ని.....గాడిలో పెట్టుకో.
నువ్వు మారితే......నీ ఇల్లు మారుతుంది.
నీ ఇల్లు మారితే......ఈ సమాజం మారుతుంది!
మరోసారి చెబుతున్నా......విను ఓ యువకుడా,
నియంత్రణ లేని వేగం.....నిప్పుతో చెలగాటం!
అనుభవపు అడుగుల్లో....నీ ప్రయాణం సాగనివ్వు.
విజయపు శిఖరంపై.....నీ సంతకం కనిపిస్తుంది!
సంస్కారమే నీకు శ్రీరామరక్ష.....
సహనమే నీ విజయానికి అసలైన దీక్ష.....
కట్టు తప్పకు.....బాధ్యతను వీడకు.
అనుభవపు పాఠాల అచ్చులో......
నీ భవిష్యత్తును చెక్కుకో!
ఇట్లు
మీ మను రామ్.
Spandinchaku Alochinchu - New Telugu Poem Written By Dr. Ram Prasad Eruvuri Published In manatelugukathalu.com On 25/01/2026
స్పందించకు.. ఆలోచించు - తెలుగు కవిత
రచన: డాక్టర్ రాంప్రసాద్ ఇరువూరి
స్పందించకు.. ఆలోచించు
ప్రపంచమొక రణరంగం......
ఇక్కడ ప్రతి కదలిక ఒక ఆహ్వానం,
ప్రతి శబ్దమూ ఒక సవాల్....
ప్రతి సంఘటనా ఒక ప్రలోభం!
కానీ ఓ మనిషీ......
ప్రతి రాయికీ ప్రతిస్పందిస్తే నీ గమ్యం ఏమవ్వాలి?
ప్రతి గాలికీ ఊగిపోతే నీ అస్తిత్వం ఎక్కడ నిలవాలి?
చూసే ప్రతి దృశ్యం
నీ కంటిపాపను గాయపరచకూడదు,
వినే ప్రతి మాట నీ మెదడులో చిచ్చు పెట్టకూడదు.
నిజమైన బలం అంటే
బాహ్యానికి ఇచ్చే సమాధానం కాదు,
అంతరంగంలో అలజడిని అణచి ఉంచే నిగ్రహం!
లోకం ఒక కోలాహలం......
ఎవరో అంటారు......ఇంకెవరో నిందిస్తారు,
ఎవరో పొగుడుతారు.....ఇంకెవరో ఏడిపిస్తారు.
నీ ప్రశాంతతను పరాయివాడి చేతికి తాకట్టు పెట్టకు,
నీ ఆలోచనల పగ్గాలను అజ్ఞానుల చేతికి ఇవ్వకు.
చెట్టును చూడు.....
గాలి వీచినప్పుడు ఆకులను ఆడిస్తుంది కానీ,
వేళ్లను కదిలించి పరుగు తీయదు కదా!
సముద్రాన్ని చూడు.....
నదులు వచ్చి పడినా ఉప్పొంగదు కానీ,
తన గంభీరతను ఎన్నడూ వదులుకోదు కదా!
నిశ్శబ్దం అంటే నిస్సహాయత కాదు.....
అది వివేకం పురుడుపోసుకునే పవిత్ర స్థలం.
అవసరం లేని చోట నీ గొంతును ఖర్చు చేయకు,
అర్థం లేని వాదనల్లో నీ మేధస్సును బలి చేయకు.
స్పందనలో వివేకం లేకపోతే
అది కేవలం అరుపు అవుతుంది,
ఆలోచనలో లోతు లేకపోతే
అది ఆవేశపు అగాధమవుతుంది.
సమాజంలో నేడు......
ప్రతివాడూ న్యాయమూర్తే, ప్రతివాడూ నేరస్తుడే!
నిజానిజాలు తెలియకముందే తీర్పుల వర్షం,
విచక్షణ మరచి సాగే వికృత స్పందనల పర్వం.
ఈ హోరులో నీ గొంతు కలపకు......
ఈ బురదలో నీ కాలు పెట్టకు,
నీ వ్యక్తిత్వాన్ని అనవసరపు
చర్చల అరుగు మీద పెట్టకు.
నీ అంతరంగమే నీ అసలైన కోట.....
అక్కడ ప్రశాంతతను కాపాడుకునే సైనికుడివి కావాలి.
వంద మాటలు విన్నా.....
ఒక్క మాటలో సారాన్ని గ్రహించు,
వేయి తప్పులు చూసినా.......
నీ నీడను తప్పు దారి పట్టనీయకు.
ఆవేశం వస్తే కళ్లు మూసుకో.......
ఆలోచన వస్తేనే పెదవి విప్పు,
నిగ్రహమే నీకు అసలైన
రక్షణ కవచమని గుర్తుంచుకో!
మౌనమే ఒక భాష......
అది నేర్చుకున్నవాడు మహర్షి,
ఓర్పు ఒక శక్తి.....
అది ఉన్నవాడే అసలైన మనిషి.
ప్రతి చినుకుకూ గొడుగు పట్టాల్సిన పనిలేదు,
ప్రతి నిప్పు కణికనూ ఆర్పాల్సిన అవసరం లేదు.
కొన్నిటిని కాలానికి వదిలేయ్.....
కొన్నిటిని మౌనంతో జయించు,
నీ లోపల ఉన్న 'నువ్వు' చనిపోకుండా కాపాడుకో!
చివరగా ఓ మిత్రమా..
నీ స్పందన ఒక తూటా లాంటిది......
దాన్ని గురి చూసి వదులు,
నీ మాట ఒక మంత్రం లాంటిది......
దాన్ని ప్రాణం పోయడానికి వాడు.
దేనికీ స్పందించని జడత్వం వద్దు.....
ప్రతిదానికీ స్పందించే అతివేగం వద్దు.....
మధ్యేమార్గంలో నడుస్తూ......
నీలో నువ్వు స్థిరంగా నిలబడు!
నువ్వు మౌనంగా ఉన్నావంటే
ఓడిపోయావని కాదు,
నీ స్థాయికి రాని యుద్ధాలను
నువ్వు తిరస్కరించావని అర్థం!
మేలుకో.....
నీ శక్తిని వృధా చేయకు,
నీ మౌనంతోనే ఈ ప్రపంచానికి
నీ విలువ చాటిచెప్పు!
ఇట్లు
మీ మను రామ్.
Nishkama Karma - New Telugu Poem Written By Dr. Ram Prasad Eruvuri Published In manatelugukathalu.com On 25/01/2026
నిష్కామ కర్మ - తెలుగు కవిత
రచన: డాక్టర్ రాంప్రసాద్ ఇరువూరి
నిష్కామ కర్మ
కర్మ అంటే చేష్ట కాదు......
అది ఒక చేతన......
కానీ.....
ఫలితం వైపు చాచిన నీ చూపు,
నీ కర్మను ఒక వ్యాపారంగా.......
నీ ఆత్మను ఒక బేరగాడిగా మారుస్తోంది.
ఆశల సంకెళ్లు పడిన చోట.......
సృజన చచ్చిపోతుంది.
అక్కడ పుట్టేది క్రియ కాదు.......
కేవలం ఒక యాంత్రిక చలనం!
నిష్కామమంటే.......
ప్రేమలో పడటం కాదు,
ప్రేమైపోవడం!
పని చేయడం కాదు,
తానూ ఒక పనైపోవడం!
సూర్యుడు వెలుగునిచ్చేది
నీ మీద దయతో కాదు......
అది ఆయన స్వభావం.
నిప్పు దహించేది నీ మీద కోపంతో కాదు.......
అది దాని ధర్మం.
నీవు కూడా నీ ధర్మాన్ని ఒక సహజాతంగా మార్చుకోగలిగిననాడు.......
నీ శ్రమ నుండి 'శ్రమ' మాయమై......
ఒక 'నాట్యం' మిగులుతుంది.
చూడు.......
కాలం ఒక అంతులేని కాన్వాస్......
నువ్వు వేసే ప్రతి కుంచె దెబ్బ.......
ఒక కర్మ.
కానీ గెలుపు అనే ఫ్రేము కోసం
నువ్వు తాపత్రయపడితే,
చిత్రంలోని జీవం నీ స్వార్థంలో
సమాధి అయిపోతుంది.
కర్తృత్వాన్ని కాలదన్ను!
"నేను చేస్తున్నాను" అనే అహంకారం......
నీకూ,
విశ్వానికి మధ్య ఉన్న ఒక గోడ.
ఆ గోడను కూల్చినప్పుడే.......
విశ్వశక్తి నీ చేతుల మీదుగా ప్రవహిస్తుంది.
అనాసక్తి అంటే నిర్లిప్తత కాదు.......
అది అత్యున్నతమైన అంకితభావం!
బాణం వేసే వేటగాడికి గురి మీద ఉండే ఏకాగ్రత.......
ఆ బాణం తగిలే పక్షి మాంసం మీద ఉండకూడదు.
మాంసం మీద ఆశ.......
గురిని తప్పిస్తుంది.
పని మీద ప్రేమ.......
ఫలితాన్ని నీ పాదాక్రాంతం చేస్తుంది.
నువ్వు కేవలం ఒక నిమిత్తానివి......
ఒక మట్టి పాత్రను చేసే కుమ్మరి చేతిలో......
మట్టికి ఏం తెలుసు తన రూపం గురించి?
కానీ ఆ మట్టి తనను తాను సమర్పించుకుంటుంది కాబట్టే......
అది ఒక పాత్ర అవుతోంది.
నీ జీవితాన్ని ఆ కాలపు చేతుల్లో సమర్పించు......
ప్రతిఫలం అనే చెరసాల నుండి బయటపడు.....
అప్పుడు......
ఓటమి నిన్ను కుంగదీయదు,
ఎందుకంటే నువ్వు దాన్ని ఆశించలేదు.
గెలుపు నిన్ను గర్వపర్చదు,
ఎందుకంటే అది నీ వల్ల జరగలేదని నీకు తెలుసు.
ఈ శూన్యతలోనే ఉంది అసలైన పూర్ణత్వం!
ఏమీ ఆశించని వాడికి......
సర్వమూ లభిస్తుంది.
ప్రతిఫలాన్ని త్యాగం చేసిన రోజే......
నువ్వు కర్మకు యజమానివి అవుతావు.
అప్పటి వరకు......
నువ్వు ఫలితానికి బానిసవే!
వేణువు రంధ్రాల గుండా గాలి వెళ్తేనే సంగీతం......
అది గాలిని ఆపుకోవాలని చూస్తే......
కేవలం ఒక నిశ్శబ్దం!
ప్రవహించు......
ప్రతిఫలం అనే ఆనకట్టలు కట్టకుండా.......
అనంతత్వంలో కలిసిపోయే
కర్మ వాహినివై ప్రవహించు!
ఇట్లు
మీ మను రామ్.
===================================================
Emi Jaruguthondi Ikkada - New Telugu Poem Written By Dr. Ram Prasad Eruvuri Published In manatelugukathalu.com On 22/01/2026
ఏమి జరుగుతోంది ఇక్కడ? - తెలుగు కవిత
రచన: డాక్టర్ రాంప్రసాద్ ఇరువూరి
ఏమి జరుగుతోంది ఇక్కడ?
కాలం ముందుకు నడవడం మానేసి
భయానికి కర్రలాగా మారిపోయింది.
చరిత్రను పాఠంగా కాదు,
హెచ్చరికగా చదువుతున్నారు.
ఏమి జరుగుతోంది ఇక్కడ?
మనిషి విలువ
తన శ్రమలో కాదు,
తన మౌనంలో కొలవబడుతోంది.
మాట్లాడేవాడు ప్రమాదం,
నిశ్శబ్దం పాటించేవాడు ఆదర్శం!
ఏమి జరుగుతోంది ఇక్కడ?
బతకడం ఒక హక్కు కాదు,
అనుమతితో ఇచ్చే వెసులుబాటు.
ఆకలి అడిగితే నేరం,
ఆకలితో చస్తే గణాంకం.
పేదవాడి మరణం
ఒక చిన్న వార్త,
కానీ
పెద్దవాడి అపహాస్యం
జాతీయ చర్చ!
ఏమి జరుగుతోంది ఇక్కడ?
చెమట ఒకప్పుడు గౌరవం,
ఇప్పుడు అవమానం.
పని చేసిన చేతికి పగుళ్లు,
దోచుకున్న చేతికి పతకాలు.
శ్రమ నేలలో కలిసిపోతే
భవనాలు ఎత్తెక్కుతున్నాయి,
ఆ భవనాల నీడలోనే
శ్రమ ఊపిరి ఆడకుండా మగ్గుతోంది!
ఏమి జరుగుతోంది ఇక్కడ?
రైతు
మట్టిని తల్లి అనుకున్నాడు,
కానీ
ఆ తల్లి అమ్ముడుపోయిందని
తనకు చివరికి తెలిసింది.
విత్తనం వేసినవాడికి
విలువ లేదు,
భూమిని అమ్మినవాడికి
భవిష్యత్తు ఉంది!
ఏమి జరుగుతోంది ఇక్కడ?
పిల్లవాడు “ఎందుకు?” అడిగితే
బాధ్యతల పేరుతో
అతని నోటికి మూత.
యువకుడు “ఎలా?” అన్వేషిస్తే
నిరుద్యోగం అనే
శిక్షా గోడ.
వృద్ధుడి అనుభవం
ఇప్పుడు జ్ఞానం కాదు,
కాలం చెల్లిన ఫైలు!
ఏమి జరుగుతోంది ఇక్కడ?
భాష బతికే ఉంది,
కానీ
భావాలు మృతి చెందాయి.
పదాలు మిగిలాయి,
అర్థాలు పారిపోయాయి.
ప్రజల నోటి నుంచి కాదు,
ఆదేశాల రూపంలో
భాష దిగివస్తోంది!
ఏమి జరుగుతోంది ఇక్కడ?
మీడియా
నిజానికి అద్దం కాదు,
అబద్ధానికి అలంకారం.
కన్నీరు కథ కాదు,
కానీ
అరుపు మాత్రం వినోదం!
పీడితుడి బాధ
“కంటెంట్”,
పీడకుడి ముఖం
“డిబేట్”!
ఏమి జరుగుతోంది ఇక్కడ?
మతం
మనిషిని వెలిగించలేదు,
మనుషుల మధ్య చిచ్చు పెట్టింది.
దేశం
మనుషుల సమూహం కాదు,
భయాల కంచె!
జెండాలు ఎగురుతున్నాయి,
కానీ
మనుషులు నేలకే కట్టబడ్డారు.
ఏమి జరుగుతోంది ఇక్కడ?
న్యాయం ఆలస్యం కాదు,
ఎంచుకున్నవాళ్లకే చేరే
ప్రైవేట్ రైలు.
పేదవాడి దగ్గర
ప్లాట్ఫారమ్ ఎప్పుడూ మారిపోతూనే ఉంటుంది!
కానీ…
ఇంత చీకటిలోనూ
ఒక చిన్న తప్పు చేసింది ఈ వ్యవస్థ,
నిన్ను పూర్తిగా మౌనంగా చేయలేకపోయింది.
నీ లోపల
ఇంకా చచ్చిపోని
ఈ ప్రశ్నే
దాని భయం.
అందుకే అడుగు.
కేకలా కాదు,
సాక్ష్యంగా.
కోపంగా కాదు,
చైతన్యంగా.
ఎందుకంటే
ఇక్కడ మౌనం కూడా
ఒక పాపంగా మారింది.
ఏమి జరుగుతోంది ఇక్కడ?
ఈ ప్రశ్న
నీ పెదవుల మీద కాదు,
నీ రక్తంలో తిరగాలి.
నిశ్శబ్దం
బద్దలయ్యే వరకు
అడుగుతూనే ఉండు!
ఇట్లు
మీ మను రామ్.
=====================================================
Navvula Madhya NIssabdam - New Telugu Poem Written By Dr. Ram Prasad Eruvuri Published In manatelugukathalu.com On 01/01/2026
నవ్వుల మధ్య నిశ్శబ్దం - తెలుగు కవిత
రచన: డాక్టర్ రాంప్రసాద్ ఇరువూరి
మనిషి పుట్టుకతోనే
ఒక వెతుకులాట మొదలుపెడతాడు,
ఆనందం కోసం కాదు…
అర్థం కోసం.
కానీ మధ్యలో
ఆ అర్థాన్ని మరిచిపోయేలా
ఆనందమే మార్గమై,
మార్గమే గమ్యమై
తప్పుదారి పట్టించిన కాలం ఇది.
ఒకప్పుడు
బాధ మనిషిని బలపరిచేది,
ఇప్పుడు
బాధను తప్పించుకోవడమే
జీవన లక్ష్యమైపోయింది.
కష్టం రాగానే పారిపోవడం,
శ్రమ కనిపించగానే మొహం తిప్పుకోవడం,
ఓర్పు అవసరమైన చోట
ఒక స్వైప్తో
మనసును మార్చేసుకోవడం,
ఇదే భోగలాలసత్వ మనస్తత్వం
మనలో మెల్లగా పుట్టించిన మౌన అలసట.
డోపమిన్ అనే
తీపి మాయ
మెదడులో నాటుకున్న రోజు నుంచే
యువత జీవితం
ఒక ప్రయోగశాల అయింది.
స్క్రీన్ వెలుగులో
రాత్రి మరిచిపోయింది,
నిద్ర పోయింది,
శరీరం అలసిపోయింది.
కానీ మనసు మాత్రం
ఇంకా “ఒక వీడియో”,
“ఒక రీల్”,
“ఒక గేమ్” అంటూ
ఆనందానికి అడుక్కుతింటూనే ఉంది.
ఆకలి కాదు
మనల్ని తినిపించేది,
భావోద్వేగమే
మన చేతుల్లో స్పూన్ పెడుతుంది.
చక్కెర తీపి
మన నాలుకను కాదు,
మన భవిష్యత్తును మోసం చేస్తుంది.
ఊబకాయం
ఒక శరీర స్థితి కాదు.
అది కదలలేని మనసు చేసిన ఒప్పందం.
షుగరు, బీపీ,
రోగాలు కావు.
అవి జీవనశైలి
మెల్లగా రాసుకున్న
వేదనల సంతకాలు.
శరీరం అరుస్తుంది,
కానీ మనం వినం.
ఎందుకంటే
మన చెవులు
హెడ్ఫోన్లలో బందీగా ఉన్నాయి.
చదువు ఒకప్పుడు
మనిషిని లోతుగా తీర్చిదిద్దేది,
ఇప్పుడు
అతన్ని ఉపరితలంగా మార్చేస్తోంది.
ఒక పేజీ చదవలేని ఓర్పు,
ఒక ఆలోచనపై నిలబడలేని ధైర్యం,
తక్షణ సమాధానం కావాలనే తొందర,
ఇవన్నీ కలసి
మేధస్సును బలహీనంగా తయారుచేస్తున్నాయి.
యువకుడా…
నువ్వు తెలివైనవాడివే,
కానీ నీ తెలివిని
ఆనందానికి అద్దెకు ఇచ్చావు.
నీ శక్తి అపారమైనదే,
కానీ దాన్ని
సుఖం కోసం ఖర్చు పెట్టేస్తున్నావు.
ఇది నీ తప్పు మాత్రమే కాదు.
నీ చుట్టూ ఉన్న ప్రపంచం
నిన్ను ఎప్పుడూ
ఆలోచించనివ్వలేదు.
ఆలోచన వచ్చేసరికి
ఒక నోటిఫికేషన్తో
దాన్ని మాయం చేసింది.
కానీ ఒక నిజం ఉంది.
తక్షణ ఆనందం
ఎప్పుడూ లోతైన సంతృప్తిని ఇవ్వదు.
దీర్ఘకాల శ్రమ మాత్రమే
నిన్ను నిన్నుగా నిలబెడుతుంది.
రోజుకు ముప్పై నిమిషాల నడక
నీ శరీరాన్ని కాదు,
నీ ఆత్మను మేల్కొలుపుతుంది.
ఫోన్ను పక్కన పెట్టిన ప్రతి క్షణం
నీ ఏకాగ్రతకు
ఒక పునర్జన్మ.
సమయానికి నిద్రపోయిన ప్రతి రాత్రి
నీ భవిష్యత్తు
నిశ్శబ్దంగా నవ్వుతుంది.
సుఖాన్ని త్రోసిపుచ్చొద్దు.
కానీ సుఖం చేత
నడిపించబడొద్దు.
ఆనందాన్ని అనుభవించు.
కానీ దానికి బానిస కావొద్దు.
ఎందుకంటే
సుఖానికి బానిస అయినవాడు
తన శరీరాన్ని కోల్పోతాడు,
తన చదువును కోల్పోతాడు,
తన కలలను కూడా కోల్పోతాడు.
కానీ
సుఖాన్ని నియంత్రించినవాడు
తన జీవితం మీద
అధికారాన్ని సంపాదిస్తాడు.
యువకులారా…
ఈ రోజు త్యాగం
రేపటి విజయానికి మూలం.
ఈ రోజు క్రమశిక్షణ
రేపటి స్వేచ్ఛ.
ఆనందం కోసం కాదు.
అర్థం కోసం బ్రతకండి.
అప్పుడే
మీ యవ్వనం
రోగంగా కాదు,
చరిత్రగా మిగులుతుంది.
సుఖాన్ని కాదు,
స్వయం నియంత్రణను అలవాటు చేసుకోండి.
అదే నిజమైన ఆరోగ్యం,
అదే నిజమైన విజయం.
ఇట్లు
మీ మను రామ్.
***************
డాక్టర్ రాంప్రసాద్ ఇరువూరి గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
ఉగాది 2026 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
నేను డాక్టర్ రాంప్రసాద్ ఇరువూరి.
ప్రజాసేవను జీవన విధిగా మోసుకుంటూ,
పదాలను నిశ్శబ్ద సహచరుల్లా వెంట పెట్టుకునే కవిని.
రోజువారీ పనిలో మనుషుల కథలనూ,
వారి కళ్లలో దాచిన చిన్న చిన్న భావలనూ చూశాక
అవి రాత్రివేళ నా కలంలోకి పదాల్లా చేరి
కవితగా మారుతాయి.
సేవ నాకు నేర్పింది వినడాన్ని,
కవిత్వం నాకు నేర్పింది అర్థం చేసుకోవడాన్ని.
అదే రెండు వెలుగుల మధ్య
నడుస్తున్న నా ప్రయాణమే,
నా పదాల అసలు మూలం.
…ఇదే నా చిరు పరిచయం.
Comments