డైలీ ఆర్టిస్ట్
Daily Artist - Telugu Social Story | Sanjeeva Kumar Y
డైలీ ఆర్టిస్ట్ - తెలుగు సామాజిక కథ| వై. సంజీవ కుమార్
Published in manatelugukathalu.com on 09/11/2026
కెమెరా ముందు నవ్వులు పంచే జూనియర్ ఆర్టిస్టుల జీవితాల్లోని ఆర్థిక ఇబ్బందులు, కుటుంబ బాధ్యతలు, పారితోషికం కోసం ఎదురుచూపులను ప్రతిబింబించే హృదయస్పర్శి కథ “డైలీ ఆర్టిస్ట్”.
ప్రముఖ సినీ నిర్మాణ సంస్థ నుంచి విక్రమ్‌కు ఫోన్ వచ్చింది.
“మీకు పది రోజుల రెగ్యులర్ షూటింగ్ ఉంది. ఇంకో గంటలో లొకేషన్‌కు రావాలి. వస్తారా? లేక వేరేవాళ్లను చూసుకోమంటారా?” అని అడిగారు.
“వచ్చేస్తాను సార్” అని చెప్పి, సరిగ్గా గంటలో లొకేషన్‌కు చేరుకున్నాడు విక్రమ్.
సినిమాలో అతనిది కోటీశ్వరుడి పాత్ర. ఖరీదైన దుస్తులు, విలాసవంతమైన ఇల్లు, చేతిలో లక్షల రూపాయల కట్టలు. తెరపై అతని జీవితం ఎంతో రిచ్‌గా కనిపిస్తుంది.
కానీ
నిజజీవితంలో మాత్రం షూటింగ్ లేని రోజు ఇంట్లో పొయ్యి వెలగడం కూడా కష్టమే.
ఒకరోజు ఉదయం ఆరు గంటలకే షూటింగ్ లొకేషన్‌కు చేరుకున్నాడు విక్రమ్.
అతనితో పాటు మరో ముప్పై మంది జూనియర్ ఆర్టిస్టులు కూడా వచ్చారు. ఉదయం నుంచి మధ్యాహ్నం వరకు ఎండలోనే ఎదురుచూశారు. చివరకు దర్శకుడి నుంచి సమాచారం వచ్చింది.
“ఈరోజు మీ సీన్ క్యాన్సిల్ అయింది. రేపు చూసుకుందాం.”
అంతే! ఆ రోజు సంపాదన లేకుండానే ఇంటికి తిరిగి వెళ్లాల్సి వచ్చింది. ఆటో ఖర్చులకు కూడా అప్పు చేయాల్సి వచ్చింది. అయినా మరుసటి రోజు ఫోన్ వస్తుందనే ఆశతో తన ఫోన్‌ను పదేపదే చూస్తూనే ఉన్నాడు.
మరో సినిమాలో పెళ్లి వేడుక సన్నివేశం చిత్రీకరిస్తున్నారు. విక్రమ్‌తో పాటు చాలామంది జూనియర్ ఆర్టిస్టులు పెళ్లికి వచ్చిన అతిథులుగా నటిస్తున్నారు. అందరూ కొత్త దుస్తుల్లో నవ్వుతూ, ఆనందంగా కనిపిస్తున్నారు.
కెమెరా ముందు పెళ్లి సంబరాలు జరుగుతుండగా, విక్రమ్ ఫోన్‌కు ఇంటి నుంచి కాల్ వచ్చింది.
“అమ్మాయికి జ్వరం ఎక్కువైంది. డాక్టర్ దగ్గరకు తీసుకెళ్లాలి. డబ్బులు పంపించగలవా?” అని భార్య అడిగింది.
జేబులో చూస్తే వంద రూపాయలు కూడా లేవు. షూటింగ్ పూర్తయిన తర్వాత డబ్బులు వస్తాయని చెప్పి ఫోన్ పెట్టేశాడు. కెమెరా ఆన్ కాగానే మళ్లీ నవ్వుతూ పెళ్లి సంబరాల్లో పాల్గొన్నాడు.
మధ్యాహ్నం షూటింగ్ విరామం వచ్చింది. ప్రధాన నటీనటులకు ప్రత్యేక భోజన ఏర్పాట్లు చేశారు. జూనియర్ ఆర్టిస్టుల కోసం మాత్రం భోజనం ఆలస్యమైంది.
ఉదయం నుంచి పనిచేస్తున్న కొందరు ఆకలితో నీళ్లు తాగుతూ కూర్చున్నారు. వారిలో ఒక వృద్ధ కళాకారుడు ఉన్నాడు. వయసు అరవై దాటినా కుటుంబాన్ని పోషించడానికి ఇప్పటికీ షూటింగులకు వస్తున్నాడు.
“ఇంకా భోజనం రాలేదా?” అని పక్కనున్న వ్యక్తిని అడిగాడు.
“వస్తుందిలే అన్నా... మనకు ఓపిక ఉండాలి” అని సమాధానం వచ్చింది.
ఆ మాటల్లో ఆకలి కంటే ఎక్కువగా కనిపించింది వారి జీవితాల్లో అలవాటైపోయిన ఎదురుచూపు.
ఒక సినిమా షూటింగ్ పూర్తయి నెల రోజులు గడిచింది. కానీ విక్రమ్‌కు రావాల్సిన పారితోషికం ఇంకా అందలేదు. ఇంటి యజమాని అద్దె కోసం రోజూ ఫోన్ చేస్తున్నాడు.
కిరాణా దుకాణంలో బాకీ పెరిగిపోయింది. చివరకు తప్పని పరిస్థితుల్లో ప్రొడక్షన్ మేనేజర్‌కు ఫోన్ చేశాడు.
“సార్, నా డబ్బులు ఎప్పుడు ఇస్తారు? ఇంట్లో చాలా ఇబ్బందిగా ఉంది” అని అడిగాడు.
“విక్రమ్, అన్నీ వస్తాయి. అకౌంట్స్‌లో మాట్లాడి చెబుతాం. కొంచెం ఓపిక పట్టండి” అనే సమాధానం వచ్చింది.
తన కష్టానికి తగిన డబ్బులు అడగడంలో కూడా ఎందుకో అతనికి సంకోచం కలిగింది. ఎందుకంటే మళ్లీ ఇదే సంస్థలో అవకాశం రావాలి కదా.
ఒకరోజు విక్రమ్ కూతురి పుట్టినరోజు. ఉదయాన్నే ఫోన్ చేసి "నాన్న ఎప్పుడు వస్తావు?" అని అడిగింది.
“సాయంత్రం త్వరగా వచ్చేస్తాను తల్లీ... నీకు మంచి బహుమతి తీసుకొస్తాను” అని మాటిచ్చాడు.
కానీ
ఆరోజు షూటింగ్ రాత్రి పదకొండు గంటల వరకు కొనసాగింది. ఇంటికి వెళ్లేసరికి కూతురు నిద్రపోయింది. టేబుల్‌పై చిన్న కేక్ ముక్క, పక్కనే కూతురు రాసిన చిట్టీ కనిపించాయి.
“నాన్నా... నువ్వు రాలేదు. పర్లేదు. రేపైనా నాతో ఆడుకోవాలి” అని అందులో రాసి ఉంది.
ఆ చిట్టీని చేతిలో పట్టుకుని కొద్దిసేపు మౌనంగా కూర్చున్నాడు. తన కుటుంబం కోసం పనిచేస్తున్నాడు... కానీ అదే కుటుంబానికి సమయం కేటాయించలేకపోతున్నాననే బాధ అతన్ని వెంటాడింది.
మరోరోజు షూటింగ్‌లో నవ్వుతూ నటించాల్సిన సన్నివేశం వచ్చింది. అంతకుముందే ఇంటి అద్దె కోసం యజమాని ఫోన్ చేసి హెచ్చరించాడు. కూతురి స్కూల్ ఫీజు కట్టలేదు.
భార్య అనారోగ్యంతో ఉంది. అయినా కెమెరా ముందుకు వచ్చేసరికి ముఖంపై చిరునవ్వుతో నటనలో జీవించేశాడు.
షూటింగ్ విరామంలో మరో ఆర్టిస్ట్ ఫోన్‌లో మందుల కోసం డబ్బులు అడుగుతున్నాడు. ఇంకొకరు ప్రయాణ ఖర్చులకు అప్పు చేస్తున్నారు.
స్టేజిపై చప్పట్లు కొట్టించుకునే కళాకారులు, స్టేజి దిగగానే తమ బాధలను ఎవరికీ కనిపించకుండా దాచుకుంటున్నారు.
ప్యాకప్ చెప్పగానే అందరూ తమ తమ ఇళ్లకు బయలుదేరారు. విక్రమ్ మాత్రం మరుసటి రోజు షూటింగ్ ఉంటుందో లేదోనని మేనేజర్‌కు ఫోన్ చేశాడు.
ఇది ఒక్క విక్రమ్ కథ కాదు.... వేలమంది జూనియర్ ఆర్టిస్టుల నిజజీవితంలో సాగుతున్న కథ....
వాళ్లకు నటన కేవలం కళ కాదు... కుటుంబాన్ని బతికించే జీవనాధారం...
ప్రేక్షకులకు వినోదాన్ని పంచే కళాకారుల జీవితాల్లో కూడా ఎన్నో కన్నీటి కథలు ఉంటాయి.
తెరపై వారి నవ్వులను, స్టెప్పులను, భావాలను చూసి చప్పట్లు కొడతారు... కానీ తెర వెనుక వారి కన్నీళ్లను గుర్తించేది ఎవరు?
సినిమా నిర్మాణ సంస్థలు, దర్శక నిర్మాతలు, కళాకారుల సంఘాలు జూనియర్ ఆర్టిస్టుల సంక్షేమంపై మరింత దృష్టి పెట్టాలి.
వారికి క్రమబద్ధమైన పారితోషికం, సమయానికి చెల్లింపులు, తగిన భోజన వసతి, ప్రమాద బీమా, ఆరోగ్య భద్రత వంటి కనీస సౌకర్యాలు కల్పించాలి.
ముఖ్యంగా పనిచేసిన రోజులకు తగిన పారితోషికం అందేలా చర్యలు తీసుకోవాలి. ఎందుకంటే ప్రతి కళాకారుడి వెనుక ఒక కుటుంబం ఉంటుంది.
ఆ కుటుంబానికి వాళ్లే ఆధారం కావచ్చు. కెమెరా ముందు పాత్రలో జీవించే కళాకారుడికి కెమెరా వెనుక కూడా గౌరవంగా జీవించే అవకాశం ఉండాలి.
నా మనస్సులో వచ్చిన ఈ చిన్న కథ... తెరపై కనిపించే జూనియర్ ఆర్టిస్టులు, తెరవెనుక కళాకారుల కష్టాలకు అంకితం.... వీళ్ళు కేవలం డైలీ ఆర్టిస్టులు కాదు... ఎన్నో కుటుంబాల జీవితాల్లో రోజూ వెలుగులు నింపడానికి పోరాడుతున్న నిజమైన కళాకారులు.
📢 మనతెలుగుకథలు.కామ్ WhatsApp ఛానల్‌ను ఉచితంగా ఫాలో అవ్వండి!
మనతెలుగుకథలు.కామ్‌లో ప్రచురించే కథలు • కవితలు • ప్రత్యేక వ్యాసాలు • సీరియల్ ఎపిసోడ్స్ - వాటి తాజా లింక్స్‌ను మా WhatsApp ఛానల్‌లో పొందవచ్చు.
✅ ఛానల్‌ను Follow చేయండి✅ WhatsAppలో Updates → Channels ద్వారా మా పోస్టులు చూడండి✅ మీకు నచ్చిన కథ లేదా పోస్టు లింక్‌పై క్లిక్ చేసి చదవండి✅ కొత్త పోస్టులు మిస్ కాకుండా Notifications 🔔 ON చేసుకోండి✅ మీ స్నేహితులు, సన్నిహితులతో మా ఛానల్‌ను Share చేయండి
👉 మా WhatsApp ఛానల్: https://whatsapp.com/channel/0029VbE7RFB3mFY84MHHSb3y
వై. సంజీవ కుమార్ గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం: వై. సంజీవ కుమార్
నా పేరు వై. సంజీవ కుమార్. హైదరాబాద్‌లో చిన్న కన్సల్టెన్సీ సర్వీస్‌ను నిర్వహిస్తున్నాను. సమాజానికి నా వంతుగా సేవ చేయాలనే ఆలోచనతో స్కై ఫౌండేషన్ అనే సంస్థను స్థాపించి, వివిధ రకాల సేవా కార్యక్రమాలను కొనసాగిస్తున్నాను.
అలాగే సామాజిక కోణంలో ఉండే అనేక అంశాలపై వ్యాసాలు రాయడం నాకు అలవాటు. ఇప్పటివరకు ఎన్నో సామాజిక అంశాలపై వ్యాసాలు రాశాను. వాటిలో అనేక వ్యాసాలు వివిధ దినపత్రికల్లో ప్రచురితమయ్యాయి.
ఇటీవల మొదటిసారిగా తెలుగు కథల ప్రపంచాన్ని పరిశీలించే అవకాశం కలిగింది. కథల ద్వారా భావాలను, జీవితంలోని అనుభవాలను, సామాజిక అంశాలను మరింత ఆసక్తికరంగా చెప్పవచ్చని అనిపించింది.
Comments