పక్కింటి పిన్ని
- Munipalle Vasundhara Rani
- 5 minutes ago
- 3 min read
#వసుంధరరాణిమునిపల్లె, #VasundharaRaniMunipalle, #PakkintiPInni, #పక్కింటిపిన్ని, #TeluguInspirationalStories, #ప్రేరణాదాయకకథలు
Pakkinti PInni - New Telugu Story Written By Vasundhara Rani Munipalle Published in manatelugukathalu.com on 23/02/2026
పక్కింటి పిన్ని - తెలుగు కథ
రచన: వసుంధర రాణి మునిపల్లె
హైదరాబాద్లోని ఒక పెద్ద అపార్ట్మెంట్లో సాకేత్, తన్వి అనే దంపతులు నివసిస్తున్నారు. ఇద్దరూ సాఫ్ట్వేర్ ఉద్యోగస్తులు కావడంతో వారి జీవితం అంతా ల్యాప్టాప్లు, మీటింగ్ల చుట్టూనే తిరుగుతుంది. వారి పక్కింట్లోనే సరళమ్మ అనే ఆవిడ ఒంటరిగా ఉంటుంది. ఆమెకు అలవాటు కొద్దీ పక్కింటి వాళ్ళని పలకరించడం, వారి ప్రతి విషయాన్ని గమనించడం ఇష్టం. సాకేత్ ఆఫీసు నుండి కొంచెం ఆలస్యంగా వస్తే చాలు, ఏంటయ్యా ఆఫీసులో ఆలస్యమైందా, ఎందుకంత లేటు అని అడిగేది. ఒకవేళ ఎప్పుడైనా సెలవు తీసుకుని ఇంట్లోనే ఉంటే, ఏమ్మా తన్వీ ఇవాళ ఆఫీసుకి వెళ్ళలేదా, ఒంట్లో బాగోలేదా అంటూ ఆరా తీసేది.
కానీ సాకేత్, తన్వీలకు ఆమె ప్రశ్నలు చాలా చిరాగ్గా అనిపిస్తాయి. ప్రతి చిన్నదానికి ఈవిడ మనల్ని ఎందుకు ఆపుతుంది, మన పనుల్లో ఈవిడ జోక్యం ఏంటి అని వారు తరచుగా అనుకుంటూ ఉండేవారు. ఆమె పిలిచినా పలకకుండా ఫోన్ చూస్తున్నట్లు నటించి లోపలికి వెళ్ళిపోయేవారు.
ఒక శనివారం మధ్యాహ్నం, సాకేత్ తన ఆఫీస్ పని మీద ఊరికి వెళ్ళాడు. తన్వి ఒక్కతే ఇంట్లో ఉంది. సడన్గా ఆమెకు ఛాతీలో విపరీతమైన నొప్పి మొదలైంది. ఊపిరి తీసుకోవడం కష్టంగా మారింది. అది గ్యాస్ట్రిక్ పెయిన్ అనుకుని ఆమె సోఫాలో పడుకుంది కానీ, నొప్పి అంతకంతకూ పెరుగుతూ ఒళ్లంతా చెమటలు పట్టడం మొదలయ్యాయి. ఆమె ఫోన్ తీసుకుని సాకేత్కి కాల్ చేయాలని చూసింది, కానీ నొప్పి వల్ల వేళ్లు పనిచేయడం లేదు. ఫోన్ కింద పడిపోయింది. స్పృహ తప్పుతున్న స్థితిలో ఉన్న ఆమెకు ఏం చేయాలో పాలుపోలేదు.
సరిగ్గా అప్పుడే సరళమ్మ ఇంటికి గ్యాస్ సిలిండర్ వచ్చింది. సిలిండర్ అబ్బాయికి ఇవ్వడానికి ఆమె దగ్గర పది రూపాయల చిల్లర లేదు. తన్విని అడుగుదాం, ఎలాగో ఇవాళ తను బయట కనిపించలేదు కదా, పలకరించినట్లు ఉంటుంది అనుకుంటూ సరళమ్మ వచ్చి బెల్ కొట్టింది. లోపల నుండి సమాధానం రాకపోవడంతో మెల్లగా తలుపు నెట్టింది. సోఫాలో అపస్మారక స్థితిలో ఉన్న తన్విని చూసి సరళమ్మ ఒక్కసారిగా ఉలిక్కిపడింది.
ఒక్క క్షణం కూడా ఆలోచించకుండా, ఆమె లోపలికి పరుగెత్తి తన్వి ముఖంపై నీళ్లు చల్లింది. పరిస్థితి సీరియస్ అని అర్థం చేసుకుని వెంటనే తన ఫోన్ నుండి అంబులెన్స్కు కాల్ చేసింది. సాకేత్కు కూడా విషయం తెలియజేసింది. అంబులెన్స్ వచ్చేలోపు తన్విని ఒక పక్కకు పడుకోబెట్టి, ఆమెకు గాలి ఆడేలా చేసింది.
అస్పత్రికి తీసుకెళ్ళాక, డాక్టర్లు తన్వికి అది మైనర్ హార్ట్ ఎటాక్ అని, సరళమ్మ సకాలంలో స్పందించి హాస్పిటల్కు తీసుకురావడం వల్లే ప్రాణాపాయం తప్పిందని చెప్పారు.
మరుసటి రోజు సాకేత్ కంగారుగా హాస్పిటల్కు చేరుకున్నాడు. బెడ్పై ఉన్న తన్విని, పక్కనే కుర్చీలో నిద్రపోతున్న సరళమ్మను చూసి అతని కళ్లు చెమర్చాయి. తాము ఏ ముసలావిడ అయితే ప్రతి చిన్న విషయానికి ప్రశ్నలు వేస్తూ తమ పనుల్లో తలదూరుస్తోందని విసుక్కున్నారో, ఆవిడే ఈరోజు తమ ప్రాణాన్ని నిలబెట్టిందని వారికి అర్థమైంది.
తన్వి డిశ్చార్జ్ అయ్యి ఇంటికి వచ్చినప్పుడు, సరళమ్మ మళ్ళీ బెల్ కొట్టింది. తన్వీ డాక్టర్ గారు ఆకుకూరలు తినమన్నారు కదా, అందుకే తోటకూర పప్పు చేశాను తింటావా అని అడిగింది. ఈసారి తన్వి చిరాకు పడలేదు. కన్నీళ్లతో సరళమ్మ చేతులు పట్టుకుని, తప్పకుండా పిన్ని మీరు లోపలికి రండి అని సాదరంగా ఆహ్వానించింది.
***
సమాప్తం.
వసుంధర రాణి మునిపల్లె గారి కొన్ని ఇతర రచనలు( కథ పేరు పైన క్లిక్ చేయండి.):
వసుంధర రాణి మునిపల్లె గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
ఉగాది 2026 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత్రి పరిచయం: వసుంధర రాణి మునిపల్లె
నాకు ఈ సదవకాశం ఇచ్చినందుకు ధన్యవాదములు.
నేనొక హౌస్ వైఫ్ ని నాకు కథలు రాయడం ఒక హాబీ.
ఇంతకుముందు జాగృతి లాంటి పత్రికలలో కథలు ప్రచురితమయ్యాయి. ఇంకా కొన్ని కథలు పరిశీలనలో ఉన్నాయి.