పల్లె పిలిచింది - 8
- T. V. L. Gayathri
- May 17
- 2 min read
Updated: May 19
#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #పల్లెపిలిచింది, #PallePilichindi, #తేటగీతి, #కందం, #ధ్రువకోకిల, #కావ్యము
Palle Pilichindi - 8 - New Telugu Poetry Written By T. V. L. Gayathri
Published In manatelugukathalu.com On 17/05/2025
పల్లె పిలిచింది - 8 - తెలుగు కావ్యము ప్రథమాశ్వాసము
రచన: T. V. L. గాయత్రి
33.
తేటగీతి.
మల్లనార్యుని పుత్రులు మణివికాసు
డనగ వీరేశుడనుపేర్ల వరలుచుండ
పెద్దవాడు వికాసుడు వినయమూర్తి
తల్లిదండ్రులన్ గాంచును దాలిమిమెయి//
తాత్పర్యము.
మల్లనార్యుని కుమారులలో పెద్దవాడు మణివికాసుడు, చిన్నవాడు వీరేశుడు.పెద్దకొడుకు చాలా వినయంగా పెద్దలను గౌరవిస్తూ ఉంటాడు.//
34.
తేటగీతి.
చిత్ర నామంపు కూతురు చిన్నసుతను
తండ్రి మల్లయ్య ప్రేమగా దరికి జేర్చి
ముద్దు జేయుచు నిత్యము మురిసిపోవ
నాటలాడుచు వర్థిల్లె నాడుపిల్ల.//
తాత్పర్యము.
మల్లనార్యుని కూతురు పేరు చిత్ర. ఆ పిల్లను తండ్రి గారాబం చేస్తూ ఉంటే ఆ పల్లెలో ఆడుతూ పాడుతూ పెరుగుతూ ఉంటుంది.//
35.
కందం.
మల్లయ సుతుడౌ వీరుడు
వెళ్ళడు తగు విద్య నేర్వ విబుధుల కడకున్
చిల్లర పనులను జేయుచు
తల్లికి తండ్రికి బరువుగ తరలుచు నుండున్.//
తాత్పర్యము.
మల్లయ్య చిన్నకొడుకు వీరేశుడు సరిగ్గా చదవడు. అల్లరి చిల్లరగా తిరుగుతూ తల్లిదండ్రులకు తలనొప్పిగా తయారయ్యాడు.//
36.
ధ్రువకోకిల.
చిరుత ప్రాయపు చిన్నబిడ్డడు చిందులేయుచు పొర్లుచున్
గఱకుగా గని తల్లి దండ్రుల గౌరవింపక మెల్గుచున్
పరువు తీయుచు పెద్దవారిని బాధవెట్టుచు నిత్యమున్
తెరలు చుండును గ్రామమందున దిక్కుమాలిన బుద్ధితో.//
తాత్పర్యము.
చిన్న పిల్లవాడయిన వీరేశుడు తల్లిదండ్రులను గౌరవించక గాలికి తిరుగుతూ ఉంటాడు. పెద్దవారిని బాధపెడుతూ ఉంటాడు.//
37.
ధ్రువకోకిల.
కుమతుడౌ నిజ పుత్రు గాంచుచు కోమలమ్మయె బెంగతో
కుములుచుండియు భర్తగారికి కోరి సేవలు చేయుచున్
మమత పంచుచు గేహ మందున మాటలాడక దేవునిన్
నిముసమైనను విస్మరించదు నిష్ఠతో జపియించుచున్.//
తాత్పర్యము.
ఆ వీరేశుని తల్లి వాడిని చూస్తూ మనసులో బెంగపడుతూ, ఎంతో మౌనంగా ఉంటూ, తనపని తాను చేసుకుంటూ ఎప్పుడూ దేవుడి నామమును జపిస్తూ ఉంటుంది.//
టి. వి. యెల్. గాయత్రి.
పూణే. మహారాష్ట్ర.
Profile Link:
Komentarze