మనం మారిపోయాం! – నిత్యం సత్యం
Manam Maripoyam Nithyam Sathyam - Telugu Inspirational Poetry | Bhattu Venkata Rao
మనం మారిపోయాం! – నిత్యం సత్యం - తెలుగు ప్రేరణాత్మక కవిత | భట్టు వెంకటరావు
Published in manatelugukathalu.com on 04/10/2026
ప్రదేశాలు అలాగే ఉంటాయి… జ్ఞాపకాలు అలాగే నిలుస్తాయి… కానీ కాలంతో మనుషులు మాత్రం మారిపోతుంటారు. ‘మనం మారిపోయాం!’ కవితలో ఊరి పొలిమేరలు, చెట్టు నీడ, ఏరు, బావి, పాత వీధులు వంటి బాల్య–యౌవన జ్ఞాపకాల మధ్య కాలం తెచ్చిన దూరాన్ని కవి భట్టు వెంకటరావు హృద్యంగా చిత్రించారు. ‘నిత్యం – సత్యం’ కవితలో రైతు, తేనెటీగ, తల్లిపిట్ట, ఉదయం, సూర్యాస్తమయం వంటి ప్రకృతి దృశ్యాల ద్వారా ప్రతి ఆరంభం ఒక ప్రయాణమని, ప్రతి ప్రయాణం ప్రకృతిలోని నిత్య సత్యంలో భాగమని తాత్వికంగా ఆవిష్కరించారు.
మనం మారిపోయాం!
***
ఊరి పొలిమేరనున్న విశాల శాద్వలములో
మనం ఒంటరిగా కూర్చున్న పచ్చని చెట్టు నీడ అలాగే ఉంది
చెట్టు కొమ్మల్లో దాక్కుని కూసిన
పిట్టల కల కూజితములు అలాగే ఉన్నాయి
వెచ్చగా విడిచిన నిట్టూర్పు కూడా వినపడే నిశ్శబ్దం అలాగే ఉంది
మనం మాత్రం వేరైపోయాం
విడివిడిగా వెళ్ళిపోయి మారిపోయాం.
ఎప్పుడు ఎడతెగక పారే
మన ఊరి ఏరు అలాగే ఉంది
ఏటి ఆవలి వొడ్డున ఇసుకలో
మంచినీళ్ళ చెలమలు అలాగే ఉన్నాయి
ఆకాశాన్ని అంటుకుందామని ఎత్తుగా ఎదిగిన
సౌక చెట్ల సముదాయాలు క్రింద పరిచే
కవోష్ణపు నీడలు అలాగే ఉన్నాయి
మనం మాత్రం వేరైపోయాం
వడివడిగా వెళ్ళిపోయి మారిపోయాం.
ఊరిలో ఎదురెదురుగా కూర్చుని ఉల్లాసములాడిన
మన ఇళ్ళు ఉన్న వీధి అలాగే ఉంది
వీధి చివర నీళ్ళ బావి అలాగే ఉంది
బావలోకి తొంగి చూస్తే
ఎక్కడో పాతాళంలో కనపడే నీళ్ళు అలాగే ఉన్నాయి
చేదలు అలాగే ఉన్నాయి
చేదలతో నీళ్ళు తోడే గట్టి చేతులు అలాగే ఉన్నాయి
మనం మాత్రం వేరైపోయాం
విడిగా వెళ్ళిపోయి
వడివడిగా మారిపోయాం.
***
నిత్యం - సత్యం
***
కాడెద్దులతో, భుజంమీద నాగలితో
పొద్దున్నే రైతు పొలానికి ప్రయాణమయ్యాడు
కేవలం తన రెక్కల కున్న బలంతో
తేనె తేవడానికోసం తేనెటీగ ప్రయాణమయింది
గూడులో నిద్రిస్తున్న పిల్లపిట్టలకి
తొందరగా ఏదన్నా తెచ్చి పెడదామని
వెదక్కుంటూ చెట్టు మీద నుంచి
ప్రయాణమైంది తల్లిపిట్ట
రోజు తెల్లారిదంటే ప్రయాణం మొదలైనట్లే కదా!
కోడి కూసిందంటే కాసేపట్లో ప్రభాతం మన ముందుంటుందనే కదా!
వెలుగొక ప్రయాణం!
చీకటి విశ్రాంతి!
ప్రతి ప్రయాణం చీకటి లోంచే మొదలవుతుంది కదా!
ప్రతి వెలుతురు ప్రయాణం చీకటిలోకే అంతమవుతుంది కదా!
అంతాల సంగతి ఇప్పుడెందుకంటావా...
సరే, ఆరంభాల గురించే మాట్లాడుకుందాం!
పువ్వు విరిసిన ఉదయంలో ఆరంభం ఎవరిది?
పువ్వుదా లేక ఉదయానిదా?
ప్రకృతిలో సమాధానాలు 'అది' లేక 'ఇది' అని తేల్చి చెప్పగలిగేట్లుగా ఉండవు కదా!
ఉదయం లేకుండా పువ్వు విరియడం జరగదు అనగలమా?
అనలేము. కారణం ఏమిటంటే,
కాలం ముందుకే వెళుతుంది కాబట్టి
ఉదయం కాకుండా చేయడం కాలం పరిధిలో లేదు. కాలం నుదుటిన అది బ్రహ్మ వ్రాత.
కనుక, ఉదయం అవుతుంది. పువ్వు పూస్తుంది.
పువ్వుదీ ఆరంభమే, ఉదయానిదీ ఆరంభమే!
ప్రయాణాలు మొదలవడం ప్రకృతిలో భాగం.
మొదలైన ప్రయాణాలు అంతమవడం ఆ ప్రకృతిలోనే ఒక అవసరం.
సాయం సంధ్యలో ప్రయాణాన్ని ముగించిన సూర్యుడు
ఉదయ సంధ్యలో మళ్ళీ ప్రయాణం మొదలుపెడతాడు
ఇందులో సంధ్య నిత్యం, ప్రయాణం సత్యం!
***
==============================
Pondaku Mathigaa Vedana - Telugu Inspirational Poetry | Bhattu Venkata Rao
పొందకు మతిగా వేదన… - తెలుగు ప్రేరణాత్మక కవిత | భట్టు వెంకటరావు
Published in manatelugukathalu.com on 03/09/2026
క. పొందకు మతిగా వేదన;
చెందునని తలచిన వన్ని చెందక నీవి
బ్బందుల పాలైనా ని
న్నందరు చులకనగ చూసి నవ్విన గానీ!
క. అందరికీ వచ్చును యి
బ్బందులు, పెనుగాలి వీచి భయపెట్టెడు రీ
తిన్; దైవము తోడై యుం
డున్ దీనుల కెపుడు; భయపడుట తగనిదియౌ!
క. బ్రతుకంటే కేవలముగ
వెతలే ఉండవు గద! తెలి వెన్నెల వచ్చుం
గా తప్పక చీకటికి అ
వతలని మరువంగ నెపుడు వలదది మదిలోన్!
క. ఎవరెన్ని నింద లేసిన
సవరించుక వెళ్ళుటదియె సరియగు నదియౌ;
పవనానికి తల వంచు త
రువది గడచినంతనే మెరుగగును కాదా!
భట్టు వెంకటరావు గారి కొన్ని ఇతర రచనలు:
భట్టు వెంకటరావు గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
విజయదశమి 2026 కథల పోటీల వివరాల కోసం
ఉగాది షడ్రుచుల కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం: భట్టు వెంకటరావు
నా పేరు భట్టు వెంకటరావు.
కేంద్ర ప్రభుత్వ విశ్రాంత అధికారిని.
సాహిత్యంపై అభిలాషతో విశ్రాంత జీవితంలో తెలుగు సంప్రదాయ సాహిత్యం చదవడం మొదలుపెట్టాను. అలా చదవడం మొదలుపెట్టిన కొన్నాళ్ళకి చిన్న చిన్న వ్యాసాలు వ్రాయడం ఆరంభించి, కొనసాగిస్తున్నాను.
నా రచనా వ్యాసంగం ప్రథానంగా పూర్వ కవుల రచనలలోని ఆసక్తికరమైన విషయాలపై సాహిత్య సంబంధమైన వ్యాఖ్యలతో కూడినదిగా ఉంటుంది. అన్ని ప్రథాన దినపత్రికల సాహిత్యం పేజీలలో నా వ్యాసాలు గత ఆరేడు సంవత్సరాలుగా ప్రచురితమయ్యాయి, అవుతున్నాయి. వాటితో పాటు అప్పుడప్పుడు ఛందోబద్ధమైన పద్యాలను, కంద పద్యం వ్రాయడంతో మొదలుపెట్టి, వ్రాస్తున్నాను.
ప్రస్తుతానికి నా రచనా వ్యాసంగం గురించి చెప్పుకోగలిగినది ఇంతవరకే. ధన్యవాదములు!
నమస్కారములతో,
భట్టు వెంకటరావు,
హైదరాబాదు.
Comments