పల్లె పిలిచింది - 10

#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #పల్లెపిలిచింది, #PallePilichindi, #ఉత్పలమాల, #చంపకమాల, #మత్తకోకిల, #ధ్రువ కోకిల, #తేటగీతి, #కావ్యము

Palle Pilichindi - 10 - New Telugu Poetry Written By T. V. L. Gayathri

Published In manatelugukathalu.com On 21/05/2025

పల్లె పిలిచింది - 10 - తెలుగు కావ్యము ప్రథమాశ్వాసము

రచన: T. V. L. గాయత్రి

పల్లె పిలిచింది పార్ట్ 1 కోసం ఇక్కడ క్లిక్ చేయండి.

పల్లె పిలిచింది పార్ట్ 2 కోసం ఇక్కడ క్లిక్ చేయండి.

పల్లె పిలిచింది పార్ట్ 3 కోసం ఇక్కడ క్లిక్ చేయండి.

పల్లె పిలిచింది పార్ట్ 4 కోసం ఇక్కడ క్లిక్ చేయండి.

పల్లె పిలిచింది పార్ట్ 5 కోసం ఇక్కడ క్లిక్ చేయండి.

పల్లె పిలిచింది పార్ట్ 6 కోసం ఇక్కడ క్లిక్ చేయండి.

పల్లె పిలిచింది పార్ట్ 7 కోసం ఇక్కడ క్లిక్ చేయండి.

పల్లె పిలిచింది పార్ట్ 8 కోసం ఇక్కడ క్లిక్ చేయండి.

పల్లె పిలిచింది పార్ట్ 9 కోసం ఇక్కడ క్లిక్ చేయండి.

 44.

ఉత్పలమాల.

 వసంతఋతువు.

ఆమని శోభలన్ గనుచు హాయిగ త్రుళ్లగ పుల్గుపాళికల్ 

మామిడి పూతలన్ దినుచు మత్తుగ కూయుచు నుండకోయిలల్ 

సేమము నీయగా భువికి శీర్షములూపెను వృక్షరాజముల్ 

కాముని మాసమందున వికాసముతో విలసిల్లె పల్లెలున్.//

తాత్పర్యము.

అలా ఆ పల్లె ప్రజలు హాయిగా ఉండగా వసంతఋతువు వచ్చింది. వసంతఋతువును చూచి పక్షి గుంపులు చాలా సంతోషించాయి. మామిడి పూతలను తినుచు కోయిలలు తీయగా కూస్తూ ఉన్నాయి. భూమికి క్షేమాన్ని కలుగచేయుచు చెట్లు తమ చిటారు కొమ్మలను ఊపుతున్నాయి. ఆ పల్లెలన్నీ వసంత ఋతువులో ఎంతో అభివృద్ధిని పొందుతున్నాయి.//

45.

చంపకమాల.

విరులట తొంగలించ బహు వేగముగా రవి పర్వులెత్తగా 

మురియుచు భృంగరాజములు మూగుచు నత్తరి సందడించగన్ 

జెరువున తామరల్ చిలుక స్నిగ్ధముగా తమ పుప్పొడుల్ వెసన్ 

ధరణికి వచ్చె మాధవము తద్దయు రమ్యముగా చరించగన్ //

తాత్పర్యము.

 వసంతంలో పూవులు పూస్తూ ఉంటే తుమ్మెదలు ఆనందంగా ఆ పువ్వుల దగ్గరికి చేరుతున్నాయి. చెరువులో తామరలు తమ పుప్పొడులను చిల్కుతూ ఉంటే భూమికి అందాన్నిచ్చే వైశాఖమాసం వచ్చింది.//

46.

మత్తకోకిల.

జీవరాసుల జీవనంబున శ్రేయమున్ గలిగించగా 

భావికంతయు నాశ నిల్పెడు భావనల్ వికసించగా 

చేవ నిచ్చెడు మాసమియ్యది చేరవచ్చె వసంతమై 

దీవెనల్ కురిపించి జాతికి దివ్యమౌ పథి చూపగన్ //

తాత్పర్యము.

భూమిలోని జీవరాసులకు జీవమును ఇచ్చి, భవిష్యత్తు మీద ఆశ కలిగించే భావనలు వికసించేటట్లు ఈ వసంతం వచ్చింది. ఈ మాసము మానవులకు మంచి మార్గాన్ని చూపిస్తుంది.//

47.

చంపకమాల.

శుకపికముల్ చెలంగ బహు శోభగ సాలములెల్ల వర్థిలన్ 

బకపకలాడుచున్ విరులు భాతిగ భానుని స్వాగతించగన్ 

బ్రకటితమాయె రశ్మినిడు పాంథుడు నిర్మలమౌ నభంబునన్ 

వికసీతమాయె వెల్గుమెయి పృథ్వి వసంత విభూతి బొందుచున్.//

తాత్పర్యము.

పక్షులు అన్నీ సంతోషంతో తిరుగుతూ ఉంటే, చెట్లు చిగురులతో అందంగా కనిపించగా, ఆ సూర్యుడు ఆకాశంలో కనిపించగానే భూమి అంతా వెలుగుతో నిండిపోయింది.//

48.

ధ్రువ కోకిల.

నవవసంతపు వేళ కోయిల నాదముల్ వినిపించగా

దివి సమంబుగ గోచరించగ దివ్యమై భువియందముల్

నవయుగాదికి నాంది పల్కుచు నర్మిలిన్ జను లెల్లరున్

భవము పొందగ స్వాగతించిరి భవ్యమౌ శుభ వర్షమున్.//

తాత్పర్యము.

ఆ వసంత వేళలో కోయిలలు పాడుతూ ఉంటే, భూమి స్వర్గాన్ని తల పించేట్లుగా ఉన్న సమయంలో క్రొత్త సంవత్సరం (ఉగాది) వచ్చింది. ఆ ఉగాదిని జనులంతా ప్రేమగా స్వాగతించారు.//

49.

తేటగీతి.

స్వచ్ఛమై నదులన్నియు పాఱుచుండ

ప్రాణవాయువొసంగెడి పచ్చదనము

పరుచుకొన్నట్టి ధరణిలో పసులు పెరుగ

శాంతి కావాసస్థానమై జగతి వెలసె.//

తాత్పర్యము.

నదులన్నీ స్వచ్ఛంగా పారుతున్నాయి. పచ్చదనం అంతటా పరుచుకొంది. పశువృద్ధి జరిగింది. అంతటా శాంతి నెలకొంది.//

50.

తేటగీతి.

వచ్చెనిప్పుడు నూతన వత్సరంబు 

ప్రజలు భక్తిగా పూజించి వైభవంబుగ

దివ్యమౌ యుగాదిని స్వాగతించి కలిసి 

శుద్ధమౌ మదిన్ జేసిరి స్తుతులనపుడు.//

తాత్పర్యము.

ఇపుడు నూతన సంవత్సరం వచ్చింది. ప్రజలు ఉగాది పండుగను ఎంతో భక్తి శ్రద్ధలతో చేస్తూ భగవంతుడిని స్తుతించారు.//

51.

తేటగీతి.

జనులు ధర్మమౌ దారిలో సాగుచుండి 

క్రొత్త వత్సరమీ భువిన్ గొలువు చేయ

'మంచికాలమా!నీకిదే మంగళంబు!'

యనుచు పల్కిరి కాలపు ఘనత తెలిసి.//

తాత్పర్యము.

ఆ పల్లెలో జనులందరూ ధర్మంగా నడుచుకొంటూ మంచికాలము వచ్చిందని సంబరంతో మంగళ గీతాలు పాడుతూ ఉన్నారు.//

పల్లె పిలిచింది పార్ట్ 11 కోసం ఇక్కడ క్లిక్ చేయండి.

టి. వి. యెల్. గాయత్రి.

పూణే. మహారాష్ట్ర.

Profile Link:

https://www.manatelugukathalu.com/profile/tvlgayathri