సంజీవని
- Munipalle Vasundhara Rani
- 2 hours ago
- 3 min read
#వసుంధరరాణిమునిపల్లె, #VasundharaRaniMunipalle, #Sanjeevani, #సంజీవని, #TeluguInspirationalStories, #ప్రేరణాదాయకకథలు
Sanjeevani - New Telugu Story Written By Vasundhara Rani Munipalle Published in manatelugukathalu.com on 25/02/2026
సంజీవని - తెలుగు కథ
రచన: వసుంధర రాణి మునిపల్లె
రాజేంద్ర ఒక రిటైర్డ్ ఫారెస్ట్ ఆఫీసర్. ఆయనకు మొక్కలన్నా, ప్రకృతి అన్నా ప్రాణం. కానీ ఆయన కొడుకు అజయ్కి మాత్రం అంతా లెక్కలే. అజయ్కి సిటీలో లగ్జరీ లైఫ్ కావాలి. తండ్రి దగ్గర ఉన్న పాతకాలపు ఇల్లు, చుట్టూ ఉన్న రెండెకరాల ఖాళీ స్థలం అమ్మేస్తే కోట్లు వస్తాయని అజయ్ ప్లాన్. కానీ రాజేంద్ర మాత్రం ఆ స్థలం అమ్మనని భీష్మించుకుని కూర్చున్నాడు. నాన్న ఆ పిచ్చి చెట్లు తప్ప అక్కడ ఏముంది అమ్మేస్తే సెటిల్ అయిపోవచ్చు కదా అని అజయ్ రోజూ గొడవ పడేవాడు. ఒకరోజు గొడవ ముదిరి రాజేంద్ర గుండెపోటుతో కన్నుమూశారు.
తండ్రి మరణం అజయ్ని కొంత బాధపెట్టినప్పటికీ, అంత్యక్రియలు ముగిసి పది రోజులు గడిచాక మెల్లగా తన భవిష్యత్తు గురించి, ఆస్తి పత్రాల గురించి ఆలోచన మొదలైంది. తండ్రి ఆస్తిని ఎలా సెటిల్ చేశారో తెలుసుకోవాలని రాజేంద్ర పర్సనల్ బీరువా తెరిచాడు. అక్కడ ఆస్తి కాగితాల పైన ఒక పాత చెక్క పెట్టె, దాని మీద అజయ్ కోసం అని రాసి ఉంది.
అజయ్ ఆత్రుతగా ఆ పెట్టె తెరిచాడు. అందులో కొన్ని ఎండిపోయిన విత్తనాలు, ఒక డైరీ ఉన్నాయి. ఆ డైరీలో రాజేంద్ర ఇలా రాశాడు అజయ్ ఈ విత్తనాలు నీ ఆస్తి. వీటిని మన గార్డెన్ మధ్యలో ఉన్న నేలలో నాటి అవి మొలకెత్తే వరకు నువ్వు ఈ స్థలం అమ్మకూడదు. అది మొలిచాక నీకు ఒక అద్భుతమైన నిధి దొరుకుతుంది. నిధి అంటే బంగారం లేదా వజ్రాలు అయి ఉంటాయని ఆశగా అజయ్ ఆ విత్తనాలను నాటాడు. మూడు నెలల తర్వాత ఒక చిన్న మొక్క మొలిచింది. అది చూసి అజయ్ ఎగిరిగంతేసి నిధి ఎక్కడుందా అని ఆ మొక్క చుట్టూ భూమిని తవ్వడం మొదలుపెట్టాడు. కానీ అక్కడ ఏమీ దొరకలేదు. ఆవేశంతో డైరీలోని ఆఖరి పేజీలు తిప్పాడు.
అక్కడ రాసి ఉంది అజయ్ నువ్వు తవ్వుతున్న చోట నిధి లేదు. ఆ మొక్కే నీ అసలైన నిధి. నీకు ఐదేళ్ల వయసులో తీవ్రమైన ఊపిరితిత్తుల వ్యాధి వచ్చినప్పుడు డాక్టర్లు చేతులెత్తేశారు. అప్పుడు నేను అడవిలోకి వెళ్లి ప్రాణాలకు తెగించి ఒక అరుదైన వనమూలికను వెతికి తెచ్చి దాని రసంతో నిన్ను బతికించాను. ఆ మొక్కలు మళ్ళీ దొరకవు. నీకు వంశపారంపర్యంగా వచ్చే ఆ శ్వాసకోశ వ్యాధి మళ్ళీ ఎప్పుడైనా తిరగబెడితే నిన్ను కాపాడగలిగే ఏకైక మందు ఆ మొక్కే. అందుకే నీ ప్రాణం కోసం ఆ విత్తనాలను ఇన్నాళ్లూ దాచి ఉంచాను.
అయితే ఒక విషయం గుర్తుంచుకో ఈ మొక్క చాలా సున్నితమైనది. ఇది మన ఇంటి వెనుక ఉన్న ఈ ప్రత్యేకమైన నేలలో, ఈ వాతావరణంలో మాత్రమే బతుకుతుంది. దీన్ని వేరే చోటికి మార్చాలని చూస్తే వేర్లు గాలి తగిలి నిమిషాల్లో ఎండిపోతాయి. ఇది కుండీల్లో పెరిగేది కాదు నేలతల్లి ఒడిలో మాత్రమే ప్రాణం పోసుకునే సంజీవని. ఇప్పుడు నీ అవసరం కోసం నీ ప్రాణాన్ని నిలబెట్టిన మొక్కను పీకేసి స్థలం అమ్ముకో నీ ప్రాణం విలువ ఎంతో ఆ రియల్ ఎస్టేట్ డబ్బుతో లెక్క కట్టుకో.
అజయ్ ఒక్కసారిగా నిశ్చేష్టుడైపోయాడు. తన తొందరపాటుకు ఎంతో పశ్చాత్తాపపడ్డాడు కానీ అప్పటికే చేయి దాటిపోయింది. ఆ స్థలాన్ని కొనడానికి వచ్చిన రియల్ ఎస్టేట్ కంపెనీ వారు జేసీబీలతో తోటను క్లీన్ చేయడానికి సిద్ధంగా ఉన్నారు. అజయ్ ఇప్పటికే భారీ మొత్తంలో అడ్వాన్స్ తీసుకుని దాన్ని తన పాత అప్పులకు వాడేశాడు. ఇప్పుడు ఆ అగ్రిమెంట్ రద్దు చేసుకోవాలంటే అడ్వాన్స్కు రెట్టింపు పెనాల్టీ కట్టాలి. మొక్కను వేరే చోటికి మార్చే వీలు లేదు, అలాగని పెనాల్టీ కట్టే స్తోమత లేదు. తన కళ్ల ముందే తన ప్రాణాన్ని నిలబెట్టే ఏకైక ఆధారం మట్టిలో కలిసిపోతుంటే ఏమీ చేయలేని స్థితిలో అజయ్ నిలబడిపోయాడు. తన తండ్రి ప్రేమను అర్థం చేసుకునే సరికి తను తిరిగి రాలేని సుడిగుండంలో చిక్కుకున్నాడని అతనికి అర్థమైంది.
***
సమాప్తం.
వసుంధర రాణి మునిపల్లె గారి కొన్ని ఇతర రచనలు( కథ పేరు పైన క్లిక్ చేయండి.):
వసుంధర రాణి మునిపల్లె గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
ఉగాది 2026 కథల పోటీల వివరాల కోసం
కొసమెరుపు కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత్రి పరిచయం: వసుంధర రాణి మునిపల్లె
నాకు ఈ సదవకాశం ఇచ్చినందుకు ధన్యవాదములు.
నేనొక హౌస్ వైఫ్ ని నాకు కథలు రాయడం ఒక హాబీ.
ఇంతకుముందు జాగృతి లాంటి పత్రికలలో కథలు ప్రచురితమయ్యాయి. ఇంకా కొన్ని కథలు పరిశీలనలో ఉన్నాయి.
Comments