పల్లె పిలిచింది - 14
- T. V. L. Gayathri
- Jun 2
- 2 min read
Updated: Jun 5
#TVLGayathri, #TVLగాయత్రి, #TeluguKavithalu, #Kavitha, #Kavithalu, #TeluguPoems, #పల్లెపిలిచింది, #PallePilichindi, #చంపకమాల, #ధ్రువకోకిల, #మత్తకోకిల, #కావ్యము
Palle Pilichindi - 14 - New Telugu Poetry Written By T. V. L. Gayathri
Published In manatelugukathalu.com On 02/06/2025
పల్లె పిలిచింది - 14 - తెలుగు కావ్యము ప్రథమాశ్వాసము
రచన: T. V. L. గాయత్రి
64.
చంపకమాల.
మనదగు సంస్కృతిన్ విడచి మైకములోబడి దొర్లిపోవుచున్
వినరట ధర్మసూక్తులను వింతగు వర్తనతోడ పొంగుచున్
ఘనమగు విద్యలన్ మరచి కానితనంబును జూపి మెల్గునా
ఘనులను నమ్మరాదట !చికాకులు తెత్తురు ధూర్తులై ఖలుల్ //
తాత్పర్యము.
కొంతమంది ఘనులు మన సంస్కృతిని వదిలి, మైకంలో బడి దొర్లుతూ ఎవరైనా మంచి చెబితే వినకుండా వింతగా ప్రవర్తిస్తూ ఉంటారు. మీరు అటువంటి దుష్టులను నమ్మరాదు!అటువంటి వారు చికాకులు తెచ్చి పెడతారు. //
65.
మత్తకోకిల.
అన్నసత్రము లేవి? లేరట నాదరించెడి వారలే!
కన్నవారిని కాంచరక్కట!కాసులే బహుప్రీతియే!
మన్నుపై మమకారమెచ్చట? మాయలో బడి పోదురా
పన్నులన్ విదిలించుకొందురు పట్టణంబున తుచ్ఛులున్//
తాత్పర్యము.
నగరంలో అన్నసత్రాలు ఉండవు. ఏదైనా అవసరం వస్తే మనల్ని పట్టించుకొనే వారు ఉండరు. అసలక్కడ కన్న తల్లిదండ్రులను చూడని ప్రబుద్ధులు ఉంటారు. సహాయం కోరిన వారిని విదిలించుకొని పోతూ ఉండే వాళ్ళే ఎక్కువ. చాలా మంది ధనం కోసం వెంపర్లాడుతూ ఉంటారు.//
66.
ధ్రువకోకిల.
కుఱచ దుస్తులు కట్టుకొంచును కోమలుల్ బహు ప్రీతిగన్
బరుల సంస్కృతి బట్టుకొందురు భ్రాంతిలో పడి మున్గుచున్
గరువు భారము మోసినట్లుగ కాంత లివ్విధి మెల్గగన్
బరువు పోవును భారతాంబకు భావి యెచ్చట తెల్పరే!//
తాత్పర్యము.
ఆ నగరంలో ఆడవాళ్లు కొందరు పొట్టి దుస్తులు వేసుకొని తిరుగుతూ, పాశ్చాత్య సంస్కృతిని ఇష్టపడుతూ ఉంటారు. వాళ్ళను చూస్తే బట్టలకు కరువు వచ్చిందా అని అనిపిస్తుంది. ఇటువంటి వాళ్ళ వలన మన దేశము పరువు పోతుండగా భవిష్యత్తు ఎలా ఉంటుంది?//
టి. వి. యెల్. గాయత్రి.
పూణే. మహారాష్ట్ర.
Profile Link:
Komentar