నిష్ఠురం
- Srinivasarao Jeedigunta
- 3 hours ago
- 4 min read
నిష్ఠురం కథ, Telugu Stories, Emotional Telugu Story, Family Story Telugu, Father Son Story, Moral Story Telugu, Telugu Kathalu, Telugu Storytelling, Family Values, Forgiveness Story, Emotional Family Drama, Father Love, Village Story, Heart Touching Story, Mana Telugu Kathalu
Nishturam - Telugu Emotional Family Story | Jeedigunta Srinivasa Rao
నిష్ఠురం - తెలుగు భావోద్వేగ కుటుంబ కథ | జీడిగుంట శ్రీనివాసరావు | ప్రముఖ రచయిత బిరుదు గ్రహీత
Published In manatelugukathalu.com On 05/07/2026
ఒక తండ్రి అంతరంగమేమిటో శ్రీనివాసరావు జీడిగుంట గారి నిష్ఠురం కథలో తెలుసుకుందాం.
రవిప్రకాష్ గారికి ఊళ్ళో మంచి పేరుంది. ఆయన మాట కఠినంగా ఉన్నా, అందులో నిజం ఉంటుందని అందరూ నమ్ముతారు. కానీ, అదే మాట తీరు ఆయన ఇంట్లో మాత్రం ఒక పెద్ద గోడను కట్టేసింది. ఆయన ఏకైక కొడుకు శోభన్ కి చిన్నప్పటి నుండి తండ్రి అంటే ఒక రకమైన భయం, దానితో దూరంగా ఉండటం, తల్లికి దగ్గరగా ఉండటం చేసేవాడు . రవిప్రకాష్ గారు ఎప్పుడూ మెచ్చుకోలు మాటలు చెప్పరు. కొడుక్కి క్లాసులో ఫస్ట్ వచ్చినా, "బానే ఉంది, కానీ లెక్కల్లో ఇంకాస్త శ్రద్ధ పెట్టాల్సింది" అనేవారు. ఆ 'కానీ' వెనుక ఉన్న నిష్ఠురమే శోభన్ ని తండ్రికి దూరం చేసింది.
చదువు పూర్తయ్యాక శోభన్ సిటీలో ఒక సాఫ్ట్వేర్ ఉద్యోగంలో చేరాడు. నెలకు ఒకసారి ఇంటికి ఫోన్ చేసినా, తండ్రి గొంతు వినపడగానే "అమ్మా, వేరే ఫోన్ వస్తోంది మళ్ళీ చేస్తాను అని ఫోన్ కట్ చేసేవాడు. తండ్రి అంటే మొదటినుండి తనని తక్కువ చేసేవాడు అనే అభిప్రాయం తో వుండి తండ్రితో మాట్లాడటానికి కూడా ఇష్టపడేవాడు కాదు.
రవిప్రకాష్ ఫోన్ తీసుకున్నా కొడుకుతో "ఉద్యోగం జాగ్రత్త, ఖర్చులు తగ్గించుకో" అని మాత్రమే చెప్పేవారు. ఆ మాటలు శోభన్ కి హితవులా కాకుండా, ఎప్పుడూ తనను తక్కువ చేసి మాట్లాడుతున్నట్టు అనిపించేది
కొన్నేళ్ల తర్వాత శోభన్ ప్రేమించిన అమ్మాయి తో పెళ్లి జరిగింది. తండ్రి తన ప్రేమ విషయం లో అల్లరి చేస్తాడేమో అనుకున్నాడు కాని తండ్రి ఏమి మాట్లాడకుండా కొడుకు పెళ్లిలో పాలుగున్నాడు.
పెళ్లయిన కొత్తలో భార్య శ్రావ్య తో కలిసి సిటీలోనే కాపురం పెట్టాడు. ఒకరోజు శోభన్ తన ఉద్యోగం వదిలేసి, స్నేహితులతో కలిసి సొంతంగా సాఫ్ట్వేర్ కంపెనీ పెట్టాలనుకున్నాడు. ఈ విషయం తల్లికి చెప్పి “పెట్టుబడి కోసం ఒక రెండు ఎకరాల పొలం నాన్న అమ్మేసి డబ్బులు యిస్తే నేను అప్పు చెయ్యకుండా వ్యాపారం చేసుకోగలను” అన్నాడు.
“పొలం విషయం నువ్వు మీ నాన్నగారితో మాటలాడటం మంచిది, నేను అడిగితే విరుచుకు పడతారు” అనటంతో, తప్పని పరిస్థితి లో తన తండ్రి రవిప్రకాష్ తో విషయం చెప్పాడు.
"వ్యాపారం అంటే మాటలు కాదు శోభన్ . నీకు ఆ అనుభవం లేదు. ఉన్న ఉద్యోగాన్ని వదులుకుంటే అప్పులు చేసి రోడ్డున పడతావు. ఈ వయసులో నీకు సాహసాలు అవసరం లేదు," అన్నారు రవికాంత్ కొడుకు తో.
ఆ మాటలు శోభన్ మనసును తీవ్రంగా గాయపరిచాయి. "నాన్నగారికి ఎప్పుడూ నాపై నమ్మకం లేదు. నా ఎదుగుదల ఆయనకు ఇష్టం లేదు" అని భావించి, తండ్రితో మాట్లాడటం పూర్తిగా మానేశాడు. తండ్రి మాటను పక్కన పెట్టి, ఉద్యోగానికి రాజీనామా చేసి వ్యాపారంలోకి దిగాడు.
మొదటి ఆరు నెలలు అంతా బాగానే సాగింది. కానీ ఆ తర్వాత మార్కెట్ తిరగబడింది. భాగస్వాములు మోసం చేశారు. శోభన్ పెట్టిన పెట్టుబడి అంతా మునిగి పోయింది. ఆఫీస్ అద్దె కట్టడానికి, ఉద్యోగులకి జీతాలు ఇవ్వడానికి కూడా డబ్బుల్లేని పరిస్థితి వచ్చింది.
క్రెడిట్ కార్డ్ అప్పులు, పర్సనల్ లోన్లు పెరిగిపోయాయి. బ్యాంక్ నుండి నోటీసులు రావడం మొదలయ్యాయి.
శోభన్ పూర్తిగా కుంగిపోయాడు. స్నేహితులెవరూ సహాయం చేయలేదు. భార్య శ్రావ్య ముందు తలదించుకోవాల్సి వచ్చింది.
ఊరిలో ఉన్న తన అత్తమామల కి ఈ విషయం తెలిసి ఫోన్ చేసి ఏడ్చింది. కానీ, రవిప్రకాష్ గారి నుండి ఎలాంటి ఓదార్పు దొరకలేదు .
‘చూశావా, నేనప్పుడే చెప్పాను కదా అని నిష్ఠురంగా నవ్వుకోవడానికే నాన్న ఎదురుచూస్తున్నారు’ అని శోభన్ మనసులో మరింత కసి, బాధ పెంచుకున్నాడు.
పరిస్థితి చేయి దాటిపోయేసరికి, శోభన్ తదుపరి అడుగు ఏంటో తెలియక తలపట్టుకుని కూర్చున్నాడు. సరిగ్గా అదే సమయంలో ఒకరోజు ఉదయం రవిప్రకాష్ గారు నేరుగా సిటీలోని కొడుకు ఇంటికి వచ్చారు.
తండ్రిని చూడగానే శోభన్ ముఖం మాడ్చుకున్నాడు. "ఏంటి నాన్న, నేను ఓడిపోయానని ఎగతాళి చేయడానికి వచ్చారా? మీరన్నదే నిజమైంది, సంతోషమా?" అన్నాడు ఆవేశంగా.
రవిప్రకాష్ గారు ఏమాత్రం కోప్పడలేదు. ఆయన ముఖంలో ఎప్పుడూ ఉండే ఆ కఠినత్వం లేదు, కేవలం ఒక తండ్రి తాలూకు ఆవేదన మాత్రమే ఉంది. ఆయన తన చేతిలోని ఒక పాత సంచీని టేబుల్ మీద పెట్టారు. అందులో కొన్ని బాండ్లు, కొంత డబ్బులు , తన భార్య నగలు ఉన్నాయి.
"ఇదిగో... నీ అప్పులన్నీ తీర్చడానికి ఇది సరిపోతుంది. రేపే వెళ్లి ఆ బ్యాంక్ నోటీసుల సంగతి చూడు," అన్నారు ప్రశాంతంగా.
శోభన్ ఆశ్చర్యపోయాడు. "నాన్న... మీరా నన్ను కాపాడేది? నా బిజినెస్ వద్దు అన్నది మీరే కదా? మరి ఇవన్నీ ఎందుకు తెచ్చారు?" అని అడిగాడు నమ్మలేనట్టు.
రవిప్రకాష్ గారు కొడుకు దగ్గరకు వచ్చి, అతని భుజం మీద చేయి వేశారు. ఆయన కళ్లల్లో నీళ్లు తిరిగాయి.
"చూడు ... నిష్ఠురంగా మాట్లాడే ప్రతివాడూ నీ శత్రువు కాడురా. సమాజం చాలా క్రూరమైనది. నువ్వు పడిపోతే తొక్కేయడానికి చూస్తుంది కానీ, లేవనెత్తదు.
వ్యాపారంలో ఉన్న లోతుపాటులు తెలియకుండా నువ్వు తొందరపడుతుంటే, తండ్రిగా నిన్ను హెచ్చరించడం నా బాధ్యత. నా మాటల్లో కఠినత్వం ఉందేమో కానీ, నీ పట్ల ద్వేషం లేదు.
నువ్వు గెలిస్తే లోకమంతా చప్పట్లు కొడుతుంది, కానీ నువ్వు ఓడిపోతే నీ పక్కన నిలబడేది ఈ ముసలి తండ్రి మాత్రమే. నా నిష్ఠురం నిన్ను బాధపెట్టి ఉండొచ్చు, కానీ అది నిన్ను రక్షించాలనే తాపత్రయం మాత్రమే!"అన్నాడు.
తండ్రి మాటల్లోని అంతరార్థాన్ని, ఆ నిష్ఠురం వెనుక ఉన్న నిఖార్సైన ప్రేమని శోభన్ ఆ క్షణంలో అర్థం చేసుకున్నాడు. పైకి తీపి మాటలు చెప్పి ముంచేసే లోకంలో, ముఖం మీదే చేదు నిజాలు చెప్పే తండ్రే తన నిజమైన బలమని గ్రహించాడు.
శోభన్ కళ్లల్లోంచి కన్నీళ్లు ఆగలేదు. నాన్నను గట్టిగా హత్తుకున్నాడు. ఆ రోజు నుండి తండ్రి చెప్పే నిష్ఠురమైన మాటల్లోని కోపాన్ని కాకుండా, అందులోని నిజాన్ని, ప్రేమని వెతుక్కోవడం అలవాటు చేసుకున్నాడు శోభన్
తండ్రి ప్రేమలో సంతానం కోసం తీసుకునే జాగ్రత్త తప్ప ద్వేషం వుండదు కదా.
శుభం
జీడిగుంట శ్రీనివాసరావు గారి కొన్ని ఇతర రచనలు( కథ పేరు పైన క్లిక్ చేయండి.):
జీడిగుంట శ్రీనివాసరావు గారి ప్రొఫైల్ కొరకు, మనతెలుగుకథలు.కామ్ లో వారి ఇతర రచనల కొరకు
యూట్యూబ్ లోకి అప్లోడ్ చేయబడ్డ జీడిగుంట శ్రీనివాసరావు గారి కథలకు సంబంధించిన ప్లే లిస్ట్ కోసం
విజయదశమి 2026 కథల పోటీల వివరాల కోసం
ఉగాది షడ్రుచుల కథల పోటీల వివరాల కోసం
మేము నిర్వహించే వివిధ పోటీలలో రచయితలకు బహుమతులు అందించడంలో భాగస్వాములు కావాలనుకునే వారు వివరాల కోసం story@manatelugukathalu.com కి మెయిల్ చెయ్యండి.
మాకు రచనలు పంపాలనుకుంటే మా వెబ్ సైట్ లో ఉన్న అప్లోడ్ లింక్ ద్వారా మీ రచనలను పంపవచ్చు.
లేదా story@manatelugukathalu.com కు text document/odt/docx రూపంలో మెయిల్ చెయ్యవచ్చు.
మనతెలుగుకథలు.కామ్ వారి యూ ట్యూబ్ ఛానల్ ను ఈ క్రింది లింక్ ద్వారా చేరుకోవచ్చును.
దయ చేసి సబ్స్క్రయిబ్ చెయ్యండి ( పూర్తిగా ఉచితం ).
మనతెలుగుకథలు.కామ్ వారి ఫేస్ బుక్ పేజీ చేరడానికి ఈ క్రింది లింక్ క్లిక్ చేయండి. లైక్ చేసి, సబ్స్క్రయిబ్ చెయ్యండి.
గమనిక : పాఠకులు తమ అభిప్రాయాలను మనతెలుగుకథలు.కామ్ వారి అఫీషియల్ వాట్స్ అప్ నెంబర్ : 63099 58851 కు పంపవచ్చును.
రచయిత పరిచయం:
నా పేరు జీడిగుంట శ్రీనివాసరావు. నేను గవర్నమెంట్ జాబ్ చేసి రిటైర్ అయినాను. నేను రాసిన కథలు అన్నీ మన తెలుగు కథలు లో ప్రచురించినందులకు ఎడిటర్ గారికి కృతజ్ఞతలు.
30 /10 /2022 తేదీన హైదరాబాద్ రవీంద్ర భారతిలో మనతెలుగుకథలు.కామ్ వారిచే సన్మానింపబడి, ప్రముఖ రచయిత బిరుదు పొందారు.
Comments